მოგეხსენებათ, „მანჩესტერ იუნაიტედის“ ნახევარმცველმა, 36 წლის პოლ სქოულზმა ფეხბურთის თამაშს თავი დაანება, უეინ რუნიმ კი თქვა, მისი ბადალი ფეხბურთელის მხარდამხარ ცხოვრებაში არ მითამაშიაო. სქოულზი მოკრძალებულ კაცად არის ცნობილი, კამერების წინაშე გამოჩენას ყოველთვის ერიდება, ასეთი ბუნების ადამიანისთვის კი ის დღე, როდესაც მან ფეხბურთიდან წასვლის შესახებ გამოაცხადა, მეტად უხერხული და შემაწუხებელი იქნებოდა. 17 წლიანი კარიერის დასრულების შემდეგ (ამ ხნის განმავლობაში ის ათჯერ გახდა პრემიერლიგის ჩემპიონი და ორჯერ ჩემპიონთა ლიგაში გაიმარჯვა) მას სამწვრთნელო საქმეზე მოუწევს ყურადღების გამახვილება.
რუნიმ თქვა: „ის ძალიან დაგვაკლდება. პირდაპირ
თუმცა, ყველაფერს აქვს დადებითი მხარე. მაგალითად, ვაჯიშებზე რუნის სქოულზთან ორთაბრძოლა აღარ ემუქრება. ფაქტია: 17 წლიანი კარიერის მიუხედავად ინგლისელმა ნახევარმცველმა ეს ელემენტი ვერა და ვერ დახვეწა.
„ის ორთაბრძოლებში ყოველ დღე ვარჯიშობდა. ხშირად, რა საკვირველია, იხელთებდა ხოლმე ბურთს, მაგრამ ხშირად ამას ვერ ახერხებდა. ჩემსკენ წამოსულს რომ დავინახავდი, ვცდილობდი გავრიდებოდი“.
პოლ სქოულზმა „მანჩესტერ იუნაიტედის“ შემადგენლობაში 676 შეხვედრა ჩაატარა და 150 გოლი გაიტანა. ახლა, მისი ფეხბურთიდან წასვლის შემდეგ, „1992 წლის გამოშვების“ ბიჭებიდან ერთადერთი 37 წლის რაიან გიგზიღა დარჩა გუნდში. სქოულზი „იუნაიტედის“ ბავშვთა სკოლაში 14 წლისა მივიდა, პირველი „დიდი“ შეხვედრა კი 1994 წელს ჩაატარა.
ინგლისის ნაკრებში თამაშზე სქოულზმა 2004 წელს თქვა უარი. ის მისთვის უჩვეულო პოზიციაზე თამაშმა დაღალა. 2010 წლის მსოფლიოს ჩემპიონატის წინ ფაბიო კაპელომ მისი ეროვნულ გუნდში დაბრუნება სცადა, მაგრამ ნახევარმცველმა უარი უთხრა. მოგვიანებით მან პრესასთან ლაპარაკში აღნიშნა, რომ ეს უარი ინანა.
სერ ალექს ფერგიუსონი: „ჩვენ წარმოუდგენელი სიდიდის ფეხბურთელს ვკარგავთ. პოლი გუნდისთვის თავდადებული ფეხბურთელი იყო და ბედნიერი ვარ ჩვენთან მწვრთნელად რომ რჩება. მას ერთი გამოკვეთილი თვისება ჰქონდა - ნებისმიერი ასაკის ფეხბურთელს საბრძოლველად განაწყობდა და აღაფრთოვანებდა. დარწმუნებული ვარ, რომ ამას ახალ ამპლუაშიც შეძლებს“.
დღეს, როდესაც პოლ სქოულზი მოქმედი ფეხბურთელი აღარ არის, იხსენებენ იმ წლებს, როდესაც ნახევარმცველთა შორის ჰოლანდიელი ედგარ დავიდსი გამოირჩეოდა. ერთხელ დავიდსს უთხრეს, რომ ის მსოფლიოში საუკეთესოა, რაზეც მან უპასუხა: „მსოფლიოში საუკეთესო მე არ ვარ, პოლ სქოულზია“.
ფეხბურთის ისტორიაში ყველა დროის ერთ-ერთმა საუკეთესო ფეხბურთელმა ზინედინ ზიდანმა თავის დროზე ასე თქვა: „ჩემი ყველაზე უხერხული მოწინააღმდეგე პოლ სქოულზია. ის მრავალმხრივ გამორჩეული ნახევარმცველია, სრულყოფილია, თაობის ერთ-ერთი უძლიერესი წარმომადგენელი გახლავთ“.
თანამედროვეობის ერთ-ერთმა უნიჭიერესმა ნახევარმცველმა, ბარსელონელმა ჩავიმ, რომელსაც სქოულზმა შაბათს, „უემბლიზე“, ჩემპიონთა ლიგის ფინალის დამთავრების შემდეგ მაისურა გაუცვალა, კოლეგა ასე შეაფასა:
„სქოულზი საუკეთესო ცენტრალური ნახევარმცველი იყო მათ შორის ვისი თამაშისთვისაც თვალი მიდევნებია. ის ყველაზე სრულყოფილი გახლდათ. მას საგოლე პასის გადაწოდებაც შეეძლო და გატანაც, ფიზიკურად ძლიერი იყო და ბურთს იოლად არ თმობდა. ესპანელი რომ ყოფილიყო, უფრო დააფასებდნენ“.
