პარკერის მოტაცება

„ასტონ ვილა“ გათავხედდა: ფულის ტომრად აღიარებულ „ჩელსის“ „ვესტ ჰემისგან“ 30 წლის ნახევარმცველის, სკოტ პარკერის ქირაობა უნდა, ის კი ეჩხირება და მოთამაშის ყიდვას აპირებს - ფაქტობრივად, ცხვირწინ სტაცებს. კიდევ, ბირმინგემელთა თავკაც ალექს მაკლიშს, ამ ზაფხულს გაყიდულების, სტიუარტ დაუნინგისა და ეშლი იანგის ნაცვლად შონ რაიტ-ფილიპსისა და შარლ ნ’ზოგბიას შეძენა სურს. მოგეხსენებათ, 29 წლის რაიტ-ფილიპსი „მანჩესტერ სიტის“ წევრია, 25 წლის ნ’ზოგბია კი „უიგანის“.

თუმცა, დავუბრუნდეთ „ჩელსისა“ და პარკერს. დასავლეთლონდონელები კვირას მალაიზიას მიეშურებიან. ახალ მწვრთნელ ანდრე ვილაშ-ბოაშს სურს, ნახევარმცველი აეროპორტში გამგზავრებამდე უკვე მათი მოთამაშე იყოს. მოგეხსენებათ, „ლურჯებს“ პრობლემა აქვთ: მიკაელ ესიენი ვარჯიშზე დაშავდა და ოპერაციის შემდეგ მოედანზე დასაბრუნებლად ექვსი თვე სჭირდება. ამ დროის გადასაგორებლად პარკერი „ჩელსისთვის“ შესანიშნავი გამოსავალია, თუმცა „დიდ ეკს“ ანუ „ასტონ ვილას“ მწვრთნელ მაკლიშს ჯიბეში 8 მილიონი ფუნტი უდევს და „აპტონ პარკის“ შეფებს გამომწვევად უტრიალებს.

აღსანიშნავია, რომ ჩემპიონშიპში გავარდნილი „ვესტ ჰემის“ ვარსკვლავი გუნდთან ერთად შვეიცარიაში იმყოფებოდა, მაგრამ საკუთარი ბედ-იღბლის რაც შეიძლება მალე გასარკვევად ამ დღეებში ინგლისში დაბრუნდა. ცნობისათვის: საფეხბურთო ჟურნალისტთა გამოკითხვის მიხედვით გასული სეზონის საუკეთესო ინგლისელი ფეხბურთელი სწორედ პარკერი გახდა.

მისი ტრანსფერის საქმე ასე იყო: პარკერს, რასაკვირველია, იმთავითვე „ჩელსიში“ გადასვლა ერჩივნა, მაგრამ დასავლეთლონდონელებს ამ ფეხბურთელის იჯარისთვის 4,5 მილიონი არ ემეტებოდათ და არც კვირაში 65 ათასის ხელფასად გადახდა სურდათ. სამაგიეროდ, „ვილას“ გაუჩნდა ფული - დაუნინგისა და იანგის გაყიდვით შემოსული თანხა აქვს დასახარჯი. დიდი ეკი „ჩელსის“ ჯიბეზე ხელის გაკვრაში, რასაკვირველია, ვერ შეეჯიბრება, მაგრამ მზადაა მისთვის სასურველ ფეხბურთელებში სატრანსფერო თანხაც გადაიხადოს და არც ხელფასზე დაიხიოს უკან.

ყოველდღიური სპორტული გაზეთი "ლელო"