„მანჩესტერ სიტის“ 24 წლის მეკარე ჯო ჰარტს გასული წელიწადი დიდებული ჰქონდა და აი, დაგვირგვინებაც: ისტლენდელებმა ახალი ხუთწლიანი კონტრაქტი მოუმზადეს. როდესაც „სიტი“ ამერიკული ტურნედან ინგლისს დაბრუნდება, ჰარტს გაუფორმებენ ხელშეკრულებას, რომლის თანახმადაც ხელფასი გაუსამმაგდება და კვირაში 90 ათას ფუნტს გაუტოლდება. ამიერიდან, ისტლენდელთა მეკარე იმდენსვე მიიღებს, რამდენსაც კლუბის ყველაზე დიდხელფასიანი ინგლისელი ფეხბურთელები, ჯეიმს მილნერი და გარეთ ბერი.
შეგახსენებთ, რომ 2010 წლის მსოფლიოს ჩემპიონატზე ნაკრების თავკაცმა ფაბიო კაპელომ ჰარტი არ ათამაშა, თუმცა მას მერე ის მთავარი გოლკიპერი გახდა როგორც კლუბში ასევე ეროვნულ გუნდში. ჰარტმა
გასულ სეზონში პრემიერლიგის არც ერთ მეკარეს არ შეუნახავს კარი მშრალად იმდენჯერ, რამდენჯერაც ეს ჯო ჰარტმა მოახერხა. რაც შეეხება „მანჩესტერ სიტის“ მეკარეებს, ბუნებრივია, ჯო კორიგანის (1976) შემდეგ ის პირველია, ვინც რაიმე ჯილდო, ამ შემთხვევაში ფეხბურთის ასოციაციის თასი მოიგო.
ჰარტმა გასულ სეზონში იმდენად კარგად ითამაშა, რომ მისი ხელფასი „სიტის“ უცხოელი ლიდერების, იაია ტურესა და კარლოს ტევესის კვირაში 250 ათასთან შედარებით უსამართლობად ჩანდა. ისტლენდელები ჯერ კიდევ გაზაფხულზე ამბობდნენ, რომ ჯო ჰარტს ახალ ხელშეკრულებას გაუფორმებდნენ და ამას, თითქოსდა, სეზონის დამთავრებამდე აპირებდნენ, მაგრამ რაღაცამ ხელი შეუშალათ. სამაგიეროდ, ზაფხულში გამოსწორდა ყველაფერი და მისი ყიდვის მსურველებს, „არსენალს“, „ტოტენჰემ ჰოთსპურს“, „მანჩესტერ იუნაიტედს“ (დავიდ დე ხეას შეძენამდე) და „ლივერპულს“ ხელი მოეცარათ.
ჯო ჰარტი „მანჩესტერ სიტიში“ 2006 წელს მშობლიური შრუსბერიდან გადავიდა. მაშინ, ისტლენდელებს სათავეში სტიუარტ პირსი ედგათ. მეკარე პირსის შემდგომ მწვრთნელ სვენ გორან ერიქსონსაც ძალიან მოეწონა.
ნაკრებში პირველი შეხვედრა „სიტის“ მეკარემ 2010 წლის სექტემბერში, ბულგარეთის წინააღმდეგ ჩაატარა და შემადგენლობაში დამკვიდრდა.
ყოველდღიური სპორტული გაზეთი "ლელო"
