„არსენალიდან“ „მანჩესტერ სიტიში“ ამ დღეებში გადასულმა 24 წლის ფრანგმა ვარსკვლავმა სამირ ნასრიმ ჟურნალისტებს უამბო, როგორ აქეზებდა „მეთოფეთა“ ლეგენდა, მისი თანამემამულე პატრიკ ვიეირა ისტლენდზე გაქცევისაკენ. თურმე სწორედ ვიეირა ეუბნებოდა ნახევარმცველს, გუნდი, რომელიც ახლა აღმავლობას იწყებს „მანჩესტერ სიტია“, „არსენალი“ კი კრიზისში შედის და ჯობს გაერიდო, კარიერა გადაირჩინოო. ნასრიმაც დაუჯერა და არსენ ვენგერის სამყაროდან რობერტო მანჩინის ამბიციურ და მდიდარ ფეხბურთელთა ჯგუფში მოჰყო თავი. ნასრიმ თქვა:
„უდიდესი როლი პატრიკ ვიეირამ ითამაშა. ის ლეგენდაა და საფრანგეთში ყველა განსაკუთრებულ პატივს სცემს. როდესაც მისი კალიბრის ფეხბურთელი, რომელსაც
ნასრიზე ჩრდილოლონდონელთა კიდევ ორი ფეხბურთელის, კოლო ტურესა და გაელ კლიშის გადაწყვეტილებამაც იმოქმედა - მოგეხსენებათ, ორივე „მეთოფე“ იყო, მაგრამ მანჩესტერის ლურჯ ნახევარში გადაბარგდა. ზემოხსენებულმა ვიეირამაც კარიერა გასულ სეზონში სწორედ „მანჩესტერ სიტიში“ დაასრულა, თუმცა ისევ ისტლენდზეა და გუნდში რაღაც თანამდებობაზე მუშაობს.
ნასრიმ დასძინა: „ასეთ დროს ძალიან მნიშვნელოვანია რას გირჩევენ ის ფეხბურთელები, რომლებმაც უკვე დააჭაშნიკეს გუნდი, რომელშიც შენ აპირებ გადასვლას. კლიშიმ და ტურემ ორივე კლუბი კარგად იციან და „არსენალსა“ და „მანჩესტერ სიტის“ შორის განსხვავების თქმაც შეუძლიათ. ჩემზე მათმა მონაყოლმაც ძალიან იმოქმედა“.
ვენგერი ვიეირას მადლობას ნამდვილად არ ეტყვის. მან ნასრი „სიტიში“ მაშინ გადაიტყუა, როდესაც ფრანგ პედაგოგს გუნდი საშინელი დაღმავლობისა და უიღბლობის გზაზე ჰყავდა და თან სესკ ფაბრეგასი გაექცა „ბარსელონაში“. მაგრამ, თუკი „მეთოფეებისგან“ საუკეთესონი გარბიან, „სიტიში“ პირიქით, მჯობნის მჯობნი იკრიბებიან: ნასრის მისვლამდე ცოტა ხნით ადრე „ეტიჰედ სთედიუმზე“ მადრიდის „ატლეტიკოდან“ სერხიო აგუერო გადავიდა.
„როდესაც ფეხბურთელი ახალ გუნდში მიდის, საუკეთესოების მხარდამხარ უნდა თამაში. „მანჩესტერ სიტიში“ სწორედ, დიდი ფეხბურთელები თამაშობენ. აგუერომ სადებიუტო შეხვედრაში გოლები გაიტანა და საგოლე პასი გადააწოდა. ასეთ ფეხბურთელებს უდიდეს პატივს ვცემ. მეც ასე მიყვარს თამაში: სწრაფად და ტექნიკურად.
ასეთ თანაგუნდელებთან ერთად, რასაკვირველია, ნებისმიერ სიმაღლეს შეეჭიდები. იაია, ჯეკო, კარლოს ტევესი... ოღონდ თუ დარჩება გუნდში. ძალიან მიხარია მათი გუნდის წევრი რომ გავხდი და ერთი სული მაქვს როდის ვითამაშებ მათთან ერთად“ - თქვა ნასრიმ.
კიდევ, ნასრი ამბობს, რომ მის სამშობლოში, საფრანგეთში, „სიტის“ ათი წლის წინანდელ „რეალს“ ადარებენ:
„ჩვენთან „სიტის“ გალაქტიკოს უძახიან. ამ გუნდის შემყურე ხალხს ის „რეალი“ ახსენდება, რომელშიც ზინედინ ზიდანი თამაშობდა“.
გამთამაშებელს გული წყდება, რომ ისტლენდელებს ზაფხულშივე ვერ შეუერთდა. არადა, მან მაშინვე ზუსტად იცოდა, რომ „არსენალიდან“ წასვლა უნდოდა და ამის შესახებ არსენ ვენგერს ყოველგვარი მიკიბ-მოკიბვის გარეშე უთხრა.
„გული მწყდება, რადგან მწვრთნელს მაშინვე ვუთხარი, რომ წასვლა მინდოდა. მინდოდა სეზონისწინა პერიოდი ახალ თანაგუნდელებთან ერთად გამეტარებინა და შევგუებოდი მათ. ასეა თუ ისე, საბოლოოდ ყველაფერი მაინც ისე დამთავრდა, როგორც მე მინდოდა და დღეს ჩემთვის დიდი დღეა. კარიერას თითქოსდა ახლიდან ვიწყებ“.
ნასრისთან კონტრაქტის გაფორმებით ძალიან კმაყოფილი გახლდათ რობერტო მანჩინიც. იტალიელმა თქვა:
„ის შესანიშნავი ფეხბურთელია, ტექნიკური და მებრძოლის მენტალიტეტით დაჯილდოვებული. მე მის თამაშს კარგა ხანია ვიცნობ. ნასრი პირველად „არსენალში“ როდი ვნახე, „ინტერის“ მწვრთნელი რომ ვიყავი და ის „მარსელში“ გამოდიოდა, მაშინ მინდოდა მისი „სან სიროზე“ გადაყვანა. რასაკვირველია, პრემიერლიგამ ნასრი სულ სხვა დონეზე აიყვანა და დღეს ის უმაღლესი დონის ფეხბურთელია“.
სამირ ნასრიმ „მანჩესტერ სიტისთან“ ოთხწლიან კონტრაქტს მოაწერა ხელი. ისტლენდზე მას კვირაში 175 ათას ფუნტს გადაუხდიან ანუ სამჯერ მეტს ვიდრე „მეთოფეები“ უხდიდნენ. ფრანგს მანჩესტერელი ქომაგი „ეტიჰედ სთედიუმის“ გარეთ დახვდა, დიდი ოვაციით შეეგება და მასთან სურათებიც გადაიღო. „სიტის“ პატრონებს ამ ზაფხულში მისი, აგუეროს, კლიშისა და სტეფან სავიჩის ყოდვა ჯამში 75 მილიონი ფუნტი დაუჯდათ.
24 წლის შემტევი ნახევარმცველი, რომელსაც საჭიროების შემთხვევაში ფრთაზე გადასვლა და ჰავბეკობაც შეუძლია, მანჩინის გუნდის შემოქმედებით ნაწილს სრულად კრავს - ახალ სეზონში „სიტი“ იბრძვის პრემიერლიგის ჩემპიონობისთვის, პირველად მონაწილეობს ჩემპიონთა ლიგაში და შეეცდება შარშან მოპოვებულ ფეხბურთის ასოციაციის თასს რომელიმე შინაური თასი კიდევ დაამატოს.
შეგახსენებთ, რომ ამ ჯილდოს მოგებამდე „მანჩესტერ სიტის“ 35 წლის განმავლობაში არაფერი მოეპოვებინა. აღსანიშნავია, რომ ინგლისში არც სამირ ნასრის მოუგია რაიმე ჯილდო. ის „მეთოფეებს“ 2008 წელს შეუერთდა, როდესაც ისინი უკვე ვეღარაფერს იგებდნენ.
ყოველდღიური სპორტული გაზეთი "ლელო"
