რობინ ვან პერსიმ „არსენალი“ გააფრთხილა, რომ შესაძლოა ახალ კონტრაქტს ხელი არ მოაწეროს. კლუბისთვის, რომელმაც ბოლო პერიოდში სესკ ფაბრეგასი და სამირ ნასრი დაკარგა, კიდევ ერთ წამყვან ფეხბურთელთან გამოთხოვება დიდი დარტყმა იქნება. „მეთოფეთა“ თავკაცმა, არსენ ვენგერმა გასულ კვირაში თქვა, რომ „ემირეით სთედიუმზე“ ვან პერსის მსგავს, გამორჩეულ ფეხბურთელებთან ახალი ხელშეკრულებების გაფორმების პროცესი დაიწყო. ამის მიუხედავად, 28 წლის ჰოლანდიელი, რომელმაც შაბათს, ბოლტონში, ჩრდილოლონდონელთა მაისურით მე-100 გოლი გაიტანა, ამბობს:
„ძველი პირობის თანახმად აქ ჯერ კიდევ ორ წელიწადს უნდა დავყო, რაც ამწუთას მაწყობს,
ინგლისური პრესა იხსენებს, რომ ჰოლანდიელი თავდამსხმელი ვენგერს სეზონის დაწყების წინ საგანგებოს შეხვდა და დაწვრილებით გამოჰკითხა თუ რა მიმართულებით უნდა გავითარდეს „არსენალი“. აშკარაა, რომ დღეს, ვან პერსი „მეთოფეთა“ თამაშის ხარისხით უკმაყოფილოა:
„ჩემთვის მთავარი გუნდია, როგორ თამაშობს ის და რა ფეხბურთს აჩვენებს. თუ ეს მხარე არ გამოსწორდება, შეიძლება მართლა წავიდე. ამწუთას კონტრაქტზე ლაპარაკისთვის შესაფერისი დრო ნამდვილად არ არის. ახლა მთავარი გუნდია. ჯერჯერობით, ყოველ სამ-ოთხ დღეში თამაში გვიწევს და ძალიან დაკავებულები ვართ. საერთოდაც, საკუთარი პრობლემებისა და მოთხოვნების წინა პლანზე წამოწევა სეზონის მსვლელობისას სწორი არ მგონია“.
ვენგერმა კი ასე ბრძანა: „რობინის ადგილზე ყველა შეშფოთდებოდა. მან ნახა, რომ ერთი-მეორის მიყოლებით გაიქცნენ ფაბრეგასი და ნასრი. ფაბრეგასი „ემირეიტს სთედიუმიდან“ ფულის გამო არ გაქცეულა. მიზეზი, რომლის გამოც ის წავიდა, სრულიად გასაგებია, მაგრამ რობინის შემთხვევა სხვაა. ის წარმოშობით ბარსელონიდან არ არის“.
ყოველდღიური სპორტული გაზეთი "ლელო"
