მაშინ, როდესაც ნაკრების მიერ ჩერნოგორიაში ნათამაშებმა 2:2-მა ინგლისელი გულშემატკივარი და მას-მედია ცუდ გუნებაზე დააყენა, "ასტონ ვილას" 27 წლის თავდამსხმელი დარენ ბენტი გახარებულია და მიიჩნევს, რომ ეროვნულმა გუნდმა დიდ შედეგს მიაღწია. კაცმა რომ თქვას, თუკი ინგლისელთათვის შესარჩევი ეტაპის დაძლევა და ევრო 2012-ის ფინალურ ეტაპზე გასვლა დიდი მიღწევაა, მაშინ ალბიონზე მართლაც ჰქონიათ საქმე საზეიმოდ. სხვა საქმეა, რომ ჩერნოგორიაში სტუმრებმა ორგოლიანი უპირატესობა გაუშვეს ხელიდან და სურათი უეინ რუნის გაძევებამაც ჩაამუქა.
თუმცა ბენტი, სავარაუდოდ, პირადმა წარმატებამაც გაახარა - 31-ე წუთზე ინგლისელთა მეორე გოლი ხომ
"ჩვენმა ნაკრებმა დიდ წარმატებას მიაღწია. შეხვედრის მსვლელობისას რამდენიმე მონაკვეთში გაგვიჭირდა, მაგრამ სირთულეებს თავი კარგად გავართვით და ახლა გაისად, ფინალურ ეტაპზე წარმატებით გამოსვლისთვის უნდა მოვემზადოთ.
ტრიბუნებზე მტრული გარემო იყო, სტადიონი პატარა გახლდათ, შედარებით მცირე ზომის იყო მოედანზიც და ამ ყველაფერმა მდგომარეობა, რასაკვირველია, გაართულა, თუმცა რაც გვინდოდა, მაინც მივიღეთ. ცუდია, რომ სამი ქულა ვერ მოვიპოვეთ, მაგრამ მიზანი მიღწეულია".
ბენტმა თავისი ყოფილი თანაკლუბელის, "ასტონ ვილადან" "მანჩესტერ იუნაიტედში" გადასული ეშლი იანგის შექებაც არ დაიზარა. 26 წლის იანგმა ჯერ ერთი ანგარიში გახსნა და მეორეც, ბენტს საგოლე პასი მიაწოდა.
"ჩემი გოლი დიდწილად ეშლის დამსახურებაა - თქვა ფორვარდმა - მთელი მატჩის განმავლობაში, როდესაც მე მეტოქის საჯარიმოში შევდიოდი, მისი პასი მისწრებდა. ვფიქრობ, გოლის მომენტში მას, წამით კარში დარტყმაც კი უნდოდა, მაგრამ ბოლოს მაინც ბურთის ჩემთვის გადმოწოდება ამჯობინა".
იანგი კი თავისი გოლისთვის მადლობას "არსენალის" გარემარბს, 22 წლის თეო უოლკოტს უძღვნის. მანჩესტერელმა თქვა:
"თეომ მთელი შეხვედრა დიდებულად ითამაშა, მე კი, არც მეტი არც ნაკლები, საუცხოო პასი მომაწოდა".
ყოველდღიური სპორტული გაზეთი "ლელო"
