"არსენალის" თავკაცმა, არსენ ვენგერმა თქვა, რომ 25 წლის ბელგიელმა მცველმა, ტომას ვერმაელენმა კლუბთან ახალ კონტრაქტს მოაწერა ხელი და ამით "ემირეიტ სთედიუმიდან" ფეხბურთელების გაქცევას წერტილი დაესვა. კი მაგრამ, რობინ ვან პერსი? განა "მეთოფეთა" ახალი კაპიტნის ამბავი გარკვეულია?ვერმაელენის ახალი ოთხწლიანი კონტრაქტი ჩრდილოლონდონური კლუბისთვის მართლა ძალიან მნიშვნელოვანი იყო. თან, ხელშეკრულებას მხარეებმა ხელი ვენგერის იმ ინტრევიუს მეორე დღეს მოაწერეს, რომელშიც "არსენალის" ფრანგი მწვრთნელი ყვებოდა თუ როგორ გარბოდა ზაფხულში კლუბიდან თითქმის ნახევარი გუნდი. დღეს, ვენგერი უკვე სხვანაირად ლაპარაკობს:
"ვერმაელენის ამბავი სულ სხვა განწყობილებაზე მიგვანიშნებს.
ინგლისური გაზეთები წერენ, რომ ვერმაელენის ამბავმა მთელი ყურადღება 28 წლის ვან პერსიზე გადაიტანა.
ბელგიელს ჰოლანდიელის მსგავსად, ძველი კონტრაქტის ვადის გავლამდე 19 თვე ჰქონდა დარჩენილი, მაგრამ მისგან განსხვავებით ვან პერსის საქმე ჯერჯერობით წინ ვერ მიდის. მისი მდგომარეობა "არსენალში" ყველას აშფოთებს, თავად ფეხბურთელსაც კი. ანდა, სხვანაირად როგორ იქნება, როდესაც თვალწინ სამირ ნასრის მაგალითია - ნასრი ახალ ხელშეკრულებაზე ლაპარაკს გაურბოდა და საბოლოოდ გადავიდა კიდეც სხვა კლუბში - "მანჩესტერ სიტიში".
სხვა საქმეა, რომ ვენგერი და ვან პერსი ძალიან ბევრს ლაპარაკობენ ერთგულებაზე. ისინი ამბობენ, რომ ჰოლანდიელი "მეთოფეთა" ერთგულია, მაგრამ დაეჭვებული ჟურნალისტების თქმით ლაპარაკი არაფერს ნიშნავს. ნამდვილი ერთგულება ვერმაელენმა გამოამჟღავნა. ის კლუბში ურთულეს დროს დარჩა, როდესაც გუნდმა სეზონი საშინლად დაიწყო და გაჩნდა რეალური საშიშროება, რომ მომავალ სეზონში ჩემპიონთა ლიგაში გამსვლელ ადგილს ვერც კი მოიპოვებს.
ეს დამოკიდებულება ძალიან განსხვავდება ერთგული ვან პერსის დამოკიდებულებისგან, რომელიც სეზონის ჩამთავრებას ელოდება, რათა შეხედოს, გადის გუნდი ჩემპიონთა ლიგაზე თუ არა.
ყოველდღიური სპორტული გაზეთი "ლელო"
