"ბაიერნის" (1992/98), "ლივერპულისა" (1999/2006) და გერმანიის ნაკრების (1997/2005) ყოფილი ნახევარმცველი დიტმარ ჰამანი საფეხბურთო კარიერის დასრულების შემდეგ საცხოვრებლად ინგლისში დარჩა. შარშან მან "ლესტერსა" და "სტოკპორტში" იმუშავა მწვრთნელად, შემდეგ კი ტელევიზიაში გადაინაცვლა, სადაც საფეხბურთო რეპორტაჟები მიჰყავს.
ამჟამად ის ერთ-ერთ ყველაზე ავტორიტეტულ საფეხბურთო ექსპერტად მიიჩნევა. 38 წლის ვეტერანს გული შესტკივა იმ გუნდზე, სადაც მან საუკეთესო წლები გაატარა და სადაც 2005 წელს კარიერის უმთავრესი ჯილდო - ჩემპიონთა ლიგა მოიგო (1996 წელს "ბაიერნის" რიგებში მას უეფას თასი ჰქონდა მოგებული).
დიდი ჰამანმა "ლივერპულის" თავდამსხმელ ენდი კეროლზე
მხარდაჭერა გულშემატკივრებისგან თუ კლუბის ხელმძღვანელობისგან მას ნამდვილად არ აკლია, მაგრამ იქნება პრობლემა სწორედ მასშია? მესმის, რომ ფეხბურთელები მანქანები არ არიან, ზოგიერთს ადაპტაცია სხვებზე მეტად უჭირს, მაგრამ ის ხომ უცხოელი არ არის? ის ინგლისელი ფეხბურთელია, რომელმაც ჩამოსულებზე უკეთ იცის, რა არის საჭირო პრემიერლიგაში წარმატებული თამაშისთვის.
კლუბმა მას უდიდესი ნდობა გამოუცხადა, როცა მასში 35 მილიონი ფუნტი გადაიხადა. ეს მაშინ, როცა "ლივერპულს" შეეძლო ზაფხულამდე მოეცადა და იმავე ფასად სამი კარგი ფეხბურთელი ეყიდა. კენი დალგლიშს სჯერა მისი და, ვგონებ, დროა, ფეხბურთელმა პასუხი კარგი თამაშით გაგვცეს.
ხომ ნახეთ, რა ქნა "სტოკ სიტისთან"? შეცვლაზე შესულს გულშემატკივრებმა ისეთივე ოვაციები შეაგებეს, როგორითაც სტივ ჯერარდს ესალმებიან ხოლმე. ის კი უპასუხისმგებლოდ მოიქცა. სათამაშოდ სულ 30 წუთი ჰქონდა დარჩენილი, მაგრამ ბუცის გამოცვლა მოინდომა და ამას სრული 2 წუთი მოანდომა. ეს მიუღებელია, რადგან არ ჰგავს პროფესიონალის საქმისადმი დამოკიდებულებას.
ასე ნელ-ნელა ყალიბდება გულშემატკივრების უარყოფითი დამოკიდებულება. მას აქვს ყველაფერი, რათა დიდი ფეხბურთელი გახდეს - მშვენიერი დარტყმა მარცხენა ფეხით, თავით თამაშის შესანიშნავი უნარი. კიდევ რა სჭირდება? ფანები მასში პოტენციალს ხედავენ და თუკი კეროლი მას არ გამოავლენს, ფრთხილად იყოს, რადგან ერთ დღეს თავზე მათ მრისხანებას დაიტეხს. ასეთ შემთხვევაში ის საერთოდ შეწყვეტს გატანას. თუკი ევროპის ჩემპიონატზე ინგლისის ნაკრებში მოხვედრა სურს, ძალები უნდა მოიკრიბოს. თუკი ის მოინდომებს, წარმატებას აუცილებლად მიაღწევს. მე ეს ვიცი".
ყოველდღიური სპორტული გაზეთი "ლელო"
