"ლივერპულის" თავდამსხმელმა ლუის სუარესმა "მანჩესტერ იუნაიტედთან" მატჩის დასრულებისთანავე ცივ გონებაზე გაიაზრა, თუ რა ჩაიდინა. როცა ლაპარაკია ორი უზარმაზარი კლუბის დაპირისპირებებზე, იქ წმინდა საფეხბურთო კომპონენტი რასაკვირველია უმთავრესი უნდა იყოს, მან კი იმდენი "მოახერხა", რომ ფეხბურთზე არანაკლებ საზოგადოება მის საქციელს განიხილავდა.
ყველას აინტერესებდა, ჩამოართმევდა თუ არა ის ხელს პატრის ევრას. კენი დალგლიში ამტკიცებდა, ამ თემაზე შეგირდს ველაპარაკე და მისი პოზიცია ცალსახაა, შერიგება სურსო.
როგორც განვითარდა მოვლენები, ყველამ ვიცით. მოკლედ, იშვიათად გვეგულება ადამიანი, რომელიც ურუგვაელს საქციელს მოუწონებდა.
ერთი მხოლოდ ალან შირერმა თქვა, სუარესმა
როგორც ჩანს, მატჩის შემდგომ დალგლიშს შეგირდთან მკაცრი საუბარი ჰქონდა. აი, რა თქვა სუარესმა: "ჩემს საქციელზე კიდევ ერთხელ დავფიქრდი და გადავწყვიტე, ბოდიში მომეხადა. მწვრთნელს მატჩის დასრულებისთანავე ველაპარაკე და მივხვდი, რომ სერიოზული შეცდომა დავუშვი.
ვუღალატე არამხოლოდ კენის, არამედ მთელ გუნდს და ყველას, ვინც ჩვენს ზურგს უკან დგას. ვწუხვარ, რომ ეს გავაკეთე. ევრასთვის ხელი ჯერ კიდევ მატჩამდე უნდა ჩამომერთმია. ახლა კი ორი რამ მინდა, პატიება ვთხოვო მას და რაც შეიძლება მალე დავივიწყო ყველაფერი, რაც ამ ისტორიას უკავშირდება.
მინდა, მთელი ყურადღება ფეხბურთზე გადავიტანო". აქვე დავამატებთ, რომ სუარესის ბოდიში სკანდალს წერტილს ვერ დაუსვამს, რადგან საფეხბურთო ასოციაციამ პროფესიონალ ფეხბურთელთა ასოციაციის რეკომენდაციით შეიძლება საქმე ხელახლა აღძრას და ურუგვაელი კიდევ ერთხელ დასაჯოს.
ფეხბურთელთა კავშირის დირექტორი გორდონ ტეილორი ამბობს: "დიდი იმედი გვქონდა, რომ ფეხბურთელები შერიგდებოდნენ, მაგრამ რაც მოხდა თავად ნახეთ. ის, რაც ურუგვაელმა ჩაიდინა, შექმნილ სიტუაციას კიდევ უფრო ამძიმებს, რაც ძალიან სამწუხაროა. თუკი სერიოზულად ვაპირებთ რასიზმთან ბრძოლას, არ გვაქვს უფლება, რომ მსგავს ეპიზოდებზე თვალი დავხუჭოთ".
კომენტარი გააკეთა თავად პატრის ევრამაც. ფრანგი გამოტყდა, რომ ახალგაზრდულ ასაკში მისთვის მიყენებული პირველი მსგავსი შეურაცხყოფა დღემდე ცუდად ახსოვს. ეს მაშინ მოხდა, როცა პატრისი 17 წლის იყო და იტალიის სერია ჩ-ს "მარსალაში" თამაშობდა. "თავი დიდ კაცად ახალგაზრდული ასაკიდანვე ვიგრძენი, რადგან მტკივნეული დარტყმების გაძლება მიხდებოდა როგორც მოედანზე, ისე მის ფარგლებს გარეთ.
სწორედ მაშინ გავიაზრე, რომ ფეხბურთი ზვიგენების სამყაროა. იტალიაში ადამიანები ხანდახან ფოტოს იმიტომ კი არ მიღებდნენ, რომ პატრის ევრა ვიყავი, არამედ იმიტომ, რომ შავკანიანი ვარ. სწორედ მაშინ ვისწავლე საკუთარი თავის ხელში აყვანა.
იყო დრო, როცა ტირილი მინდებოდა, მაგრამ ნელ-ნელა გავძლიერდი. ყველაფერმა ერთად მე ზრდასრულ მამაკაცად მაქცია. 17 წლისა სიცილიურ კლუბში ერთადერთი შავკანიანი ვიყავი. ხანდახან ისე ვბრაზდებოდი, იმისთვისაც კი მზად ვიყავი, ყველას მუშტებით დავრეოდი.
მახსოვს, ერთხელ პალერმოში ვთამაშობდით, ბურთს რამდენჯერაც ფეხი დავაკარე, 20 ათასი ადამიანი მაიმუნის ხმას გამოსცემდა. ამის გამო კი თავს ძალიან მარტოსულად ვგრძნობდი. საშინელებაა, როცა ამას აწყდები, რადგან მსგავსი შეურაცხყოფა ადამიანის თავმოყვარეობაზე დამთრგუნველად მოქმედებს," - განუცხადა ევრამ "სანს".
სტატიის დასასრულს კი გაცნობებთ, რომ მანჩესტერის პოლიციამ სისხლის სამართლის საქმე აღძრა "იუნაიტედის" ფანების ჟურნალ Red Issue-ს გამომცემელთა მიმართ, რომელთაც მატჩის წინა დღეს დაბეჭდეს ჟურნალის დამატება, რომელსაც მოსდევდა პლაკატი კუ-კლუკს-კლანის ფორმაში ჩაცმული ადამიანის გამოსახულებითა და წარწერით "სუარესი მართალია".
პოლიციის წარმომადგენელთა განცხადებით, ისინი ყველაფერს გააკეთებენ, რათა ჟურნალის დამატება მაქსიმალურად სწრაფად ამოიღონ გაყიდვიდან. Red Issue-ის რედაქტორები ჯერჯერობით კომენტარისგან თავს იკავებენ.
ყოველდღიური სპორტული გაზეთი "ლელო"
