"არსენალის" 20 წლის პლეიმეიკერმა ჯეკ უილშირმა კოჭის სერიოზული ტრავმა ჯერ კიდევ ივლისში სეზონისთვის მოსამზადებელ შეკრებაზე მიიღო. ახალგაზრდა ფეხბურთელს ოპერაცია სექტემბერში გაუკეთეს. მკურნალობა მეტისმეტად გაიწელა. თუმცა ამას ვინ დაეძებდა? ის იყო, ალაპარაკდნენ, ჯეკი მოედანს უნდა დაუბრუნდესო, რომ ფეხბურთელმა ტრავმა გაიმიზეზა. უილშირმა მთელი "არსენალი" და ინგლისის ნაკრები საგონებელში ჩააგდო, რადგან ყველას ესმის, რომ ფეხბურთელს მნიშვნელოვანი როლის თამაში შეუძლია ევრო 2012-ზე.
ტრავმის რეციდივის შემდეგ ექიმებს დიაგნოზის დასმა გაუჭირდათ. ისიც კი ითქვა, რომ ფეხბურთელისთვის სეზონი დამთავრებული იყო.
თუმცა გავიდა დრო და ახალმა გამოკვლევებმა აჩვენა,
უილშირის ამბის გარდა "არსენალის" გულშემატკივრებს გაუხარდებათ ისიც, რომ ორიოდე დღეში სრულფასოვან სავარჯიშო რეჟიმს დაუბრუნდება სათადარიგო მარჯვენა მცველი კარლ ჯენკინსონიც.
დადებითი ინფორმაციების პარალელურად "მეთოფეთა" ბანაკში ერთი უსიამოვნო ამბავიც შეიტყვეს. ის, რომ პერ მერტეზაკერმა ტრავმა მიიღო ახალი არაფერია. ჩვენ ამაზე უკვე ვწერდით. თუმცა სიახლეა, რომ ვენგერს პესიმისტური წინასწარმეტყველება აუხდა და აღმოჩნდა, რომ გერმანელს საკმაოდ სერიოზული ტრავმა აწუხებს - კოჭის მყესები აქვს დაჭიმული. 27 წლის ცენტრალურ მცველს მთელი თვით მოუწევს დასვენება.
ბოლოს კი იმას გაცნობებთ, რომ "მეთოფეებმა" ესპანეთის იუნიორთა ნაკრების შემტევ ნახევარმცველ იონ ტორალს პროფესიული კონტრაქტი გაუფორმეს.
ამიერიდან 17 წლის ფეხბურთელი ძირითად გუნდთან ერთად ივარჯიშებს. კატალონიელი ვუნდერკინდი "არსენალმა" გასულ ზაფხულს "ბარსელონადან" გადაიბირა.
ტორალმა მას შემდეგ ჯერ ასაკობრივ გუნდებში დაიმკვიდრა თავი, შემდეგ რეზერვისტთა რიგებში გამოიჩინა თავი (სადაც დებიუტი იანვარში ჰქონდა), სულ რაღაც ერთ თვეში კი პროფესიონალთა შორის ამოყო თავი. ფეხბურთის სპეციალისტები მასა და ფრანსესკ ფაბრეგასს შორის პარალელებს უკვე ავლებენ და არამხოლოდ იმის გამო, რომ ორივე "ბლაუგრანას" სკოლის აღზრდილია. მათ უპირველესად თამაშის სტილი აერთიანებთ.
ყოველდღიური სპორტული გაზეთი "ლელო"
