გთავაზობთ “გარდიანის” მცირე ინტერვიუს “ჩელსის” მთავარ მწვრთნელ ანდრე ვილაშ ბოაშთან, სადაც ის საკმაოდ უცნაურ (სკანდალურს თუ არ დავარქმევთ) განცხადებას აკეთებს. მასალაში გაეცნობით “არისტოკრატთა” სხვა ამბებსაც.
- შეგიძლიათ აგვისხსნათ, თქვენი რა იდეები არ მოსწონთ თქვენს ფეხბურთელებს?
- მთავარია, რომ პრეზიდენტის ნდობა მაქვს, მოთამაშეებს რაც შეეხება, მათ მხარი კი არ უნდა დაუჭირონ ჩემს იდეებს, ისინი უნდა შეასრულონ. განა ნორმალურია, როცა ფეხბურთელებს მწვრთნელის არ სჯერათ? დარწმუნებული ვარ, რომ ისინი, ვინც გვერდში არ მიდგანან, დანარჩენებს მალე მიბაძავენ.
“ჩელსიში” მოედანზე ის ფეხბურთელები გამოდიან, რომლებიც საუკეთესო
იანვარში ორმა ფეხბურთელმა უკვე დაგვტოვა. გამორიცხული არ არის, მას მალე ისინიც შეუერთდნენ, რომელთაც არ სურთ საერთო იდეების გაზიარება. რამდენიმე მოთამაშეს კონტრაქტი ეწურება, ალბათ ისინიც ამ გზას დაადგებიან. ჩვენ გუნდი სამომავლო პერსპექტივაზე გათვლით უნდა დავაკომპლექტოთ.
- დარწმუნებული ხართ, რომ “ჩელსიში” დარჩებით?
- პირადად დარწმუნებული ვარ, რომ რომან აბრამოვიჩთან ერთად სწორ გზას ვადგავარ. ცვლილებები შეგვაქვს როგორც გუნდის ტაქტიკაში, ისე მთლიანად გუნდის შემადგენლობაშიც. მხოლოდ იდეებით ჩემპიონატის მოგება შეუძლებელია. ვხვდებით, რა გვინდა და რა გვჭირდება სამომავლოდ. ჯობს, ჩემს მომავალზე აბრამოვიჩს დაუსვათ კითხვა.
- რას ელით “ბირმინგემთან” მატჩისგან?
- ამ შეხვედრაში წარმატების მიღწევა ჩვენთვის ძალიან მნიშვნელოვანია. ამ ტურნირში გამარჯვების შანსი გვაქვს, თუმცა ჩემპიონატშიც ვაპირებთ სიტუაციის გამოსწორებას. პრემიერლიგის მესამე გუნდი 10 ქულით გვისწრებს. ამიტომ უფრო მეოთხე ადგილისთვის ბრძოლა მოგვიწევს, რაც ჩემპიონთა ლიგაში მონაწილეობის უფლებას მოგვცემს.
- რა მოხდა აბრამოვიჩისა და ფეხბურთელების შეხვედრაზე?
- ჩვეულებრივი სამუშაო კრება იყო, რომელიც კლუბის მესაკუთრემ მოიწვია. შეხვედრა ძალიან დრამატული იყო. ყველა მიხვდა, რომ წარუმატებლობებში ბრალი ყველას მიუძღვის. ვგულისხმობ იმას, რომ შედეგებზე პასუხისმგებლობა პერსონალიდან დაწყებული, ფეხბურთელებით დამთავრებული, ყველაზე უნდა გადანაწილდეს.
- რას იტყვით ჟოზე მოურინიოს სმს-ზე? ინგლისში ის პოპულარულ სალაპარაკო თემად იქცა.
- და რა არის აქ მოსაყოლი? ყველა ჩვენგანს აქვს ურთიერთობა ამა თუ იმ პიროვნებასთან. ჩემი ფეხბურთელები მეგობრობენ ყოფილ მწვრთნელებთან, ასევე პრინციპული მეტოქეების წარმომადგენელ ფეხბურთელებთან. პირადად დღემდე მაქვს ურთიერთობა “პორტუს” მოთამაშეებთანაც და ხელმძღვანელობასთანაც.
- რა მოხდება სეზონის ბოლოს?
- უბრალოდ ვალდებულნი ვართ, რომ ოთხეულში მოვხვდეთ. დარწმუნებული ვარ, რომ ასოციაციის თასისა და ჩემპიონთა ლიგისთვისაც ვიბრძოლებთ. გჯეროდეთ ჩვენი.
ვილაშ ბოაშის შესახებ კომენტარი ისურვა ლონდონში დაბრუნებულმა დიდიე დროგბამ. ვეტერანმა ივუარელმა დაადასტურა, რომ კლუბმა მას უკვე შესთავაზა კონტრაქტის გახანგრძლივება და ამჟამად ამ საკითხზე მოლაპარაკებები მიმდინარეობს.
“ჩემი აზრით, მწვრთნელის ახალგაზრდული ასაკი არაფერ შუაშია. მას აქვს თავისი მოსაზრებები, რომელთაც სხვებმა პატივი უნდა სცენ. ჩვენთან ის წინა მწვრთნელებისგან განსხვავებული ფილოსოფიით მოვიდა. სწორედ ამ ფილოსოფიამ მოაპოვებინა მას გამარჯვებები “პორტუში”, რის გამეორებასაც ახლა “ჩელსიში” აპირებს.
ხდება ხოლმე, როცა მიდიხარ ახალ სამსახურში და ყველაფერი ისე არ მიდის, როგორც გეგმავდი. ის არ არის იოლ სიტუაციაში და პასუხისმგებლობის ტვირთი მხოლოდ მარტომ არ უნდა ზიდოს. ანდრე ცდილობს ფეხბურთელების მოტივაციას და ეს გამოსდის კიდეც. ის ამბიციურია და სურს იყოს წარმატებული პრემიერლიგაში”, - აცხადებს დიდიე დროგბა.
ბოლოს კი იმას გაცნობებთ, რომ გოალ.ცომ-ის ინფორმაციით “ჩელსიმ” უარი თქვა “ლილის” 21 წლის ბრაზილიელი ცენტრალური ნახევარმცველის ედენ აზარის ტრანსფერზე. შეიძლება ამის მიზეზი ისიც გახდა, რომ ფეხბურთელის განცხადებით მას კარიერის გაგრძელების პერსპექტივა ყველაზე მეტად “ტოტენჰემში” ან “არსენალში” ხიბლავს. აზარის გადაბირება მსურველს 33,2 მილიონი ფუნტი დაუჯდება.
ყოველდღიური სპორტული გაზეთი "ლელო"
