"მანჩესტერ სიტის" "სუონსისთან" მარცხით "იუნაიტედმა" ისარგებლა, "ვესტ ბრომვიჩთან" 3 ქულა აიღო და პრემიერლიგას სათავეში მოექცა. ეს სწორედ ის მიზანია, რისკენაც "ეშმაკები" ბოლო თვეების განმავლობაში მიიწევდნენ. ჩემპიონატის დასრულებამდე ჯერ კიდევ 10 ტურია და ერთქულიანი უპირატესობა ძალიან ცოტაა, მაგრამ ალექს ფერგიუსონის ბიჭებისთვის ეს, პირველ რიგში, ფსიქოლოგიური თვალსაზრისით არის სასარგებლო. აი, რას ამბობს საკლუბო არხთან ინტერვიუში "იუნაიტედის" ლიდერი უეინ რუნი: "პირველი ადგილი ის მიზანია, სადაც ყოფნა ყოველთვის გიხარია და მით უფრო, სადაც ჩემპიონატის დასრულებას ესწრაფვი.
დიახ, წელს ევროტურნირებზე ჩვენი თამაში გულშემატკივრებში იმედგაცრუებას იწვევს,
"ვესტ ბრომვიჩთან" დიდი ძალისხმევა დაგვჭირდა, რათა სამი ქულა აგვეღო. მეტოქე დაცვაში დიდი ძალებით თამაშობდა, რამაც პრობლემები შეგვიქმნა. კიდევ კარგი, პირველივე ტაიმში გავიტანეთ, რამაც სიმშვიდე მოგვგვარა. მართალია, იმაზე მეტის გატანა შეგვეძლო, ვიდრე რეალურად მოვახერხეთ, მაგრამ მთავარი მაინც გამარჯვებაა, რადგან ასეთ მძიმე თამაშებში ყველაფერი შეიძლება მოხდეს - ერთმა უხეიროდ მოგერიებულმა ბურთმა, ერთმა რიკოშეტმა, რაღაც ნახევრად მომენტის მსგავსმა შეიძლება მთელი შრომა წყალში გადაგიყაროს".
სერ ალექსის სავარაუდო მემკვიდრეებზე უკვე იმდენი დაიწერა, რომ ვეღარც კი მოვთვლით. აღნიშნულ თემაზე თავისი მოსაზრება "ნიუკასლისა" და ინგლისის ნაკრების ყოფილმა თავდამსხმელმა ალან შირერმა დააფიქსირა. ვეტერანი ვარსკვლავის თქმით, ლეგენდარული შოტლანდიელის შემცვლელად მას ისევ შოტლანდიელი ეგულება. ლაპარაკია "ევერტონის" 48 წლის თავკაც დევიდ მოიესზე.
"ბევრს ლაპარაკობენ გვარდიოლასა და მოურინიოზე და ეჭვი არ მეპარება, რომ სწორედ ისინი იქნებიან უმთავრესი კანდიდატები, მაგრამ ინგლისური ფეხბურთის სპეციფიკიდან გამომდინარე, ამ პოსტის ჩაბარების საუკეთესო კანდიდატად დევიდ მოიესი მიმაჩნია. წინა კვირას მან "ევერტონში" მუშაობის 10 წელიწადი აღნიშნა. ის არის მენეჯერი, რომელიც პრემიერლიგას ზეპირად იცნობს და რაც მთავარია, იცის, როგორ გაიმარჯვოს," - აცხადებს შირერი.
ყოველდღიური სპორტული გაზეთი "ლელო"
