"მანჩესტერ სიტის" მთავარმა მწვრთნელმა, 47 წლის რობერტო მანჩინიმ თავისი შეგირდების დამშვიდება სცადა, რომელთაც, როგორც ჩანს, ნერვები ღალატობთ საჩემპიონო რბოლაში ჩამორჩენის გამო. იტალიელის მტკიცებით, პანიკის საფუძველი ჯერ არ არსებობს, მიუხედავად იმისა, რომ გუნდმა დროის მცირე მონაკვეთში ორმაგი დარტყმა მიიღო: ჯერ "სუონსისთან" დამარცხდა, შემდეგ კი ევროპის ლიგის გათამაშებიდან გამოვარდა. "იუნაიტედი" კონკურენტს უკვე 4 ქულით უსწრებს. მართალია, "ქალაქელებს" ერთი თამაში თადარიგში აქვთ, თუმცა მისი მოგება ჯერ კიდევ მართებთ. მით უფრო, მეტოქე მოგებათა აზარტში შესული "ჩელსია".
აი, რას ამბობს რობერტო მანჩინი:
- "სუონსისთან" წაგების
ახლა მდევრის როლში ვართ. ამას, რა თქმა უნდა, ჯობდა, პირველი ადგილის შენარჩუნება მოგვეხერხებინა, თუმცა რაკი ასე არ მოხდა, ამან ჩვენს მიზნებზე გავლენა არ უნდა იქონიოს.
ჩვენმა რამდენიმე წამყვანმა ფეხბურთელმა ტრავმა მიიღო, მათ შორის - ვენსან კომპანიმ და ჯოლეონ ლესკოტმა. მესმის, რომ დანაკლისი სერიოზულია, მაგრამ ახლა განცდებისა და საკუთარი თავის შეცოდების დრო არ არის. უნდა დავამტკიცოთ, რომ ყველანაირი გამოცდისთვის მზად ვართ ფიზიკურად. ბიჭებმა მსგავსი განსაცდელი აქამდეც რამდენჯერმე გადაიტანეს წამყვანი ფეხბურთელების გამოკლების დროს.
ყველას გვესმის, რომ ფეხბურთი და ტრავმები განუყოფელი ცნებებია და ის, რაც ჩვენ დაგვემართა, ნებისმიერ გუნდს შეიძლებოდა მოსვლოდა.
ცუდია, რომ "სუონსისთან" და "სპორტინგთან" რამდენჯერმე ვერ მოვახერხეთ სახიფათო კონტრშეტევის გამოყენება. შეიძლება ითქვას, რომ ეს ჩვენი ერთ-ერთი უმთავრესი პრობლემაა. კარგი ფეხბურთის ჩვენებას ყოველთვის ვცდილობთ, თუმცა ხან გამოგვდის, ხან - არა.
ეს ფეხბურთია და ამით ბევრი რამის ახსნა შეიძლება. ზოგჯერ შეიძლება ალალად იმსახურებდე გამარჯვებას, მაგრამ მშრალზე დარჩე. იმის გათვალისწინებით, რომ მიმდინარე სეზონში ძალზე ამოუცნობი რამეები ხდება და თანაც წინ საკმაოდ დიდი გზა გვაქვს, გამოდის, რომ გადაწყვეტილი ჯერ არაფერია.
ყოველდღიური სპორტული გაზეთი "ლელო"
