"ლივერპულს" ამ ეტაპზე პრობლემების მეტი რა აქვს, მაგრამ მათგან სამი ყველაზე მეტად არის გამოსარჩევი. კლუბს არ ჰყავს სპორტული დირექტორი, არ ჰყავს მთავარი მწვრთნელი და უკვე წლებია მიდის ლაპარაკი (არამხოლოდ ლაპარაკი) იმაზე, რომ მერსისაიდელებმა ახალი, უფრო ტევადი სტადიონი უნდა ააშენონ.
აქედან, პირველ რიგში, კლუბს სპორტული დირექტორის დანიშვნა მართებს, რადგან სამომავლო ტრანსფერების დაგეგმვა და მომზადება სწორედ მას უნდა დაევალოს. ყოფილი დირექტორი დამიელ კომოლი კლუბის ბოსებმა ჯერ კიდევ სეზონის დასრულებამდე დაითხოვეს თანამდებობიდან.
პრესაში პირველად სწორედ მაშინ დაიწერა, რომ კომოლის კვალში კენი დალგლიშსაც გაუყენებდნენ.
როგორც ჩანს, გუნდის შემადგენლობის სერიოზული გადახალისება მას დაევალება. ვან გაალი ის პერსონაა, ვისაც სიმართლის პირში თქმა უყვარს და ამის გამო ბევრი მტრადაც გადაიკიდა.
მას მთავარი მწვრთნელის პოსტზე უმუშავია "აიაქსში", "ბარსელონასა" და "ბაიერნში". ერთი წლის წინ ლაპარაკი იყო ტურინის "იუვენტუსში" მის დანიშვნაზე, მაგრამ იტალიელებმა ბოლოს ანტონიო კონტეზე გააკეთეს აქცენტი.
ბოლო რამდენიმე თვის განმავლობაში ვან გაალის სახელს ერთი ხმაურიანი სკანდალი უკავშირდება. "აიაქსის" დირექტორთა საბჭოს რამდენიმე წევრმა ის სხვების უკითხავად სწორედ სპორტულ დირექტორად დანიშნა, მაგრამ გადაწყვეტილება იოჰან კრუიფმა სასამართლოში გაასაჩივრა და ლუისთან დადებული კონტრაქტის გაუქმებას მიაღწია.
რამდენად წაადგება "ლივერპულს" უხიაგი ხასიათის ჰოლანდიელთან თანამშრომლობა, ამას მხოლოდ დრო გვიჩვენებს.
ბოლო დღეებში პრესა წერდა, რომ მერსისაიდელებსა და ფაბიო კაპელოს შორის შეთანხმება დროის ამბავიაო. ამის საპირისპირო ინფორმაციას ავრცელებს "ლივერპულ ეხო". გაზეთის მტკიცებით, 65 წლის იტალიელის კანდიდატურა სერიოზულად არც კი განუხილავთ.
არადა, კაპელოს აგენტი აცხადებდა, რომ მისი კლიენტი "ენფილდზე" მუშაობით დაინტერესებული იყო. მოსალოდნელია, რომ კლუბის თანამესაკუთრე ჯონ ჰენრი უახლოესი 48 საათის განმავლობაში კიდევ ერთხელ შეხვდება რობერტო მარტინესსა და ანდრე ვილაშ ბოაშს.
შეხვედრა იგეგმება "სუონსის" დამრიგებელ ბრენდან როჯერსთანაც, ვინც "წითლებს" თანამშრომლობაზე ერთხელ უარი უკვე განუცხადა. კაპელოს გარდა, ჰენრის პრესსამსახურმა უარყო დიდიე დეშამით დაინტერესების ფაქტიც.
"წითლების" აღმასრულებელი დირექტორის, იან ეირის თქმით, კლუბს ჯერ საბოლოოდ არ გადაუწყვეტია, "ენფილდს" ჩაუტარებენ საფუძვლიან რეკონსტრუქციას, თუ ახალი "სტენლი პარკის" მშენებლობას ჩაუყრიან საფუძველს.
"ამ ეტაპზე ორივე ვარიანტს განვიხილავთ. ამ მიზნით უკვე ვაწარმოებთ მოლაპარაკებებს დაინტერესებულ ადამიანებთან.
სიმართლე გითხრათ, გადაწყვეტილება შეიძლება იმაზე ადრე მივიღოთ, ვიდრე ეს ადრე გვქონდა გამოცხადებული.
დავუკავშირდით რამდენიმე ცნობილ ბრენდს, ვისაც სტადიონის სახელის ხანგრძლივი დროით შეძენა შევთავაზეთ. ისინი პრობლემად მიიჩნევენ, რომ რაკი ჯერ არაფერი გადაგვიწყვეტია, შეიძლება არაფერიც არ მოხდეს.
მიმდინარე სიტუაციაში ყველაზე მნიშვნელოვანი ის არის, რომ კლუბის მფლობელები საქმით დაინტერესებულები არიან. იქამდე, ვიდრე საბოლოოდ არ დავრწმუნდებით, ამ საკითხზე კომენტარს აღარ გავაკეთებთ. "ენფილდის" რეკონსტრუქციას თუკი გადავწყვეტთ, ახლომდებარე სახლების მფლობელებთან დალაპარაკება მოგვიწევს.
გულშემატკივრებისგან მომისმენია, "ლივერპული" ხომ ამხელა კლუბია, რატომ არ აშენებთ 60-ათასიან სტადიონსო. ყველაფერი არც ისე იოლია. წარმოიდგინეთ, "ენფილდი" 15 ათასი ადგილით რომ გაიზარდოს, ამისთვის 300 მილიონი ფუნტია საჭირო.
მუშაობა გრძელდება და როგორც კი საქმეს წერტილი დაესმება, ყველაფერს გაცნობებთ," - აცხადებს იან ეირი.
ყოველდღიური სპორტული გაზეთი "ლელო"
