"მანჩესტერ იუნაიტედის" იტალიელმა თავდამსხმელმა ფედერიკო მაკედამ "ეშმაკების" რიგებში კარიერა გადამწყვეტი გოლის ავტორობით დაიწყო. "ასტონ ვილასთან" შეცვლაზე შესულმა 17 წლის ფეხბურთელმა ბირმინგემელებს გადამწყვეტი დარტყმა აგემა, "იუნაიტედს" კი სამი ქულა და, პრაქტიკულად, განაღდებული საჩემპიონო ტიტული მოუტანა.
მას მერე 3 წელიწადი გავიდა, თუმცა ფედერიკოს სერიოზული პროგრესი არ განუცდია. ამის ახსნა მრავალი მიზეზით შეიძლება: "იუნაიტედში" უზარმაზარი კონკურენცია, ტრავმები და რაც მთავარია, უიღბლობა. თუმცა დაკარგული ჯერ კიდევ არაფერია. აპენინელი ხომ ჯერ მხოლოდ 20 წლისაა.
აი, რას ამბობს ის: "მართლა მოუთმენლად ველით ახალი სეზონის დაწყებას. მშვენიერია,
3 წლის წინ, როცა ძირითად გუნდთან ერთად პირველად გავემგზავრე ტურნეში, ნამდვილად არ ვიცოდი, რომ "იუნაიტედი" ასეთი გრანდიოზული კლუბი იყო. მალაიზიაში, ჩინეთში, კორეაში - ფანები ყველგან გვყავდა. მიხარია აქ დაბრუნება.
როცა იჯარით სხვაგან ხარ, მაშინ ყველაზე მეტად გრძნობ, რა ბედნიერებაა ამ გუნდში თამაში. შარშან სეზონი თითქმის მთლიანად ჩავაგდე. "ქუინზ პარკში" სერიოზული ტრავმა მივიღე, თუმცა დღეს თავს უკვე კარგად ვგრძნობ. მომდევნო სეზონი ჩემთვის გადამწყვეტი იქნება ბევრი თვალსაზრისით".
უელბეკი არ თანხმდება
დენი უელბეკმა "მანჩესტერ იუნაიტედისგან" ახალი, გაუმჯობესებული 4-წლიანი კონტრაქტი ჯერ კიდევ იანვარში მოითხოვა კატეგორიული ტონით, რაზეც სერ ალექს ფერგიუსონისგან მკვახე პასუხი მიიღო.
"მანკუნიანელებმა" 21 წლის თავდამსხმელს კვირაში 15 ათასი ფუნტიდან ხელფასის 40 ათასამდე გაზრდა შესთავაზეს, მაგრამ უელბეკი დამატებით 20 ათასს ითხოვს.
დენის უფროსი ძმა კრის უელბეკი (შეთავსებით მისი აგენტი) მიიჩნევს, რომ შარშან გატანილი 12 ბურთითა და ინგლისის ნაკრებში დამკვიდრების შემდეგ დენი იმსახურებს იმას, რასაც კლუბისგან ითხოვს.
"ეშმაკების" თავკაცი ასე არ ფიქრობს. მიუხედავად იმისა, რომ მოლაპარაკებები მხარეთა შორის რამდენიმე თვეა მიმდინარეობს, შეთანხმება დღემდე ვერ ხერხდება. ფეხბურთელს მოქმედი ხელშეკრულება 2013 წლის 1 ივლისს ეწურება.
ბერბატოვი არავის უნდა
"მანჩესტერ იუნაიტედის" 31 წლის ბულგარელი თავდამსხმელი დიმიტარ ბერბატოვი ჯერ კიდევ შარშანდელი სეზონის წინ აპირებდა "ოლდ ტრეფორდის" დატოვებას, მაგრამ რიგი მიზეზების გამო ეს ვერ მოახერხა.
მთელი წლის განმავლობაში იწერებოდა, რომ ვეტერანი "იუნაიტედს" სეზონის დასრულებისთანავე დატოვებდა, მაგრამ... გავიდა ხანი და ფეხბურთელმა გუნდთან ერთად მორიგი სეზონისთვის დაიწყო მზადება.
ისე, გასაკვირი არაფერია, რადგან თავის დროზე 30,8 მილიონ ფუნტად ნაყიდი თავდამსხმელის გაყიდვას ფერგი 10-ზე ნაკლებად არ აპირებს. პრაქტიკულად, ორი წლის უთამაშებელ თავდამსხმელში კი აღნიშნულ თანხას არცერთი კლუბი არ გადაიხდის, რომლის ხელმძღვანელობასაც ჭკუა მოეკითხება.
"დეილი მირორი" წერს, რომ "მალაგა" და "ლევერკუზენი" ბერბას სიამოვნებით წაიყვანენ, ოღონდაც "ეშმაკებმა" მადა უნდა დაიოკონო.
ყოველდღიური სპორტული გაზეთი "ლელო"
