საფეხბურთო ასოციაციის ჩინოვნიკებმა "ჩელსის" კაპიტან ჯონ ტერის არაორაზროვნად განუცხადეს, რომ თუკი ის დისკვალიფიკაციას ზემდგომ ინსტანციებში გაასაჩივრებს, ისინი მის კიდევ უფრო მკაცრად დასჯის შუამდგომლობას დააყენებენ. შეგახსენებთ, რომ "ქუინზ პარკის" მცველის, ანტონ ფერდინანდის რასისტული ხასიათის შეურაცხყოფის გამო 31 წლის ფეხბურთელს 4-თამაშიანი დისკვალიფიკაცია და 220-ათასფუნტიანი ჯარიმა გამოუწერეს.
დისკვალიფიკაცია ძალაში ჯერ არ შესულა და შესაბამისად, ფეხბურთელს თამაშის უფლება ჯერ კიდევ აქვს.
"ჩვენ, როგორც ბრალდების მხარეს, გვაქვს უფლება, რომ დამოუკიდებელი კომისიის გადაწყვეტილება იმავე ვადაში გავასაჩივროთ, რისი უფლებაც ფეხბურთელს აქვს მინიჭებული.
თუკი ტერი თავის უფლებას გამოიყენებს,
გულწრფელად უნდა განვაცხადოთ, რომ მსგავსი რამ ჩვენს პრაქტიკაში იშვიათად ხდება, მაგრამ თუკი ტერი სიტუაციის გამწვავებაზე კიდევ ერთხელ წავა, სხვა გზა აღარ დაგვრჩება," - განუცხადა ასოციაციის წარმომადგენელმა "სანს".
დამოუკიდებელი საგამოძიებო კომისიის მიერ ტერის მიმართ გამოტანილი არცთუ ყველაზე მკაცრი სანქციების გამო ამ მოვლენისადმი საზოგადოებაში არაერთგვაროვანი პოზიციაა.
მაგალითად, "ქუინზ პარკის" ყოფილი კაპიტანი, ცნობილი ჩხუბისთავი ჯოი ბარტონი ("მანჩესტერ სიტისთან" მოწყობილი აყალმაყალის გამო თავად 12 მატჩით დასჯილი) და ინგლისური ფეხბურთის ყველაზე დიდ ჯენტლმენად წოდებული გარი ლინეკერი (მას კარიერაში ერთი ყვითელი ბარათიც არ მიუღია) აცხადებენ, რომ ერთწლიანი გარჩევების შემდეგ ფეხბურთელის ოთხი მატჩით დასჯა ცოტა გაუგებარია. პირველმა ასოციაციას ფარსის მოწყობაში დასდო ბრალი.
მათგან აბსოლუტურად განსხვავებულ პოზიციას აფიქსირებს ფეხბურთის მმართველი ორგანოს ყოფილი აღმასრულებელი დირექტორი დევიდ ლუისი, აცხადებს რა, რომ მას შემდეგ, რაც სამოქალაქო სასამართლომ ტერი პასუხისმგებლობისგან გაათავისუფლა, საქმეს წერტილი უნდა დასმოდა:
"ხანდახან შეუძლებელია მიუხვდე, თუ რა პრინციპით წერენ სანქციებს. ეს ნამდვილად არ იყო ისეთი რთული საქმე, რომ მთელი წელიწადი გაწელილიყო. იმედი მაქვს, რომ ამ ისტორიიდან ყველამ მიიღო გაკვეთილი და არამხოლოდ მასში მონაწილე მხარეებმა. ასევე - დაინტერესებულმა პირებმა და ასოციაციის ჩინოვნიკებმა," - თქვა მან.
ჟოზე მოურინიოს თავისი ფეხბურთელები პრესისა და საზოგადოების "საჯიჯგნად" არასოდეს გაუმეტებია და ლოგიკურია, რომ მან ამ საქმეშიც ტერის მხარე დაიჭირა.
"ყველამ იცის, რომ ტერი რასისტი არ გახლავთ. ეს ყველასთვის ცხადია. შესაძლოა, მეტოქეს მან რაღაც ცუდი უთხრა, მაგრამ ფეხბურთში ხანდახან ისეთი ემოციები გადმოდუღს ხოლმე, რომ ზოგჯერ მართლა ცუდ რამეებს ჩავდივართ.
თუკი მან ფერდინანდს უკადრებელი აკადრა, ამისთვის უნდა დაისაჯოს, მაგრამ ეს მაინც არ ცვლის იმ ფაქტს, რომ ჯონი რასისტი არ არის", - აცხადებს პორტუგალიელი.
