თუ გახსოვთ, ბოლო დღეებში ინგლისში ერთი ამბავი იყო, ჩვენი ფეხბურთელები სვამენ და უმაღლეს დონეზე იმიტომ ვეღარ თამაშობენო. თამაშის შემდეგ უკვე ნახსენები „მეილი“ ირონიულად აღნიშნავდა, ინგლისმა რომ ითამაშა ისეთი ფეხბურთის გამო სმისთვის
ერთი სიტყვით, ფაბიო კაპელომ საფრანგეთის წინააღმდეგ ექსპერიმენტული შემადგენლობა, ასე ვთქვათ ინგლისის ხვალინდელი ნაკრები ათამაშა და საშინელი რისხვა დაიმსახურა. მასპინძლებმა სასეირო და სახეირო ვერც სტუმრებს შესთავაზეს რამე და ვერც მაყურებელს. ხსენებული ქეროლი მოედანზე თამაშის დამთავრებამდე 18 წუთით ადრე შევიდა და ბევრი ვერაფერი მოასწრო... ფანებს გული ცოტა პიტერ კრაუჩმა მოფხანა, რომელმაც 85-ე წუთზე სტივენ ჯერარდი შეცვალა და ერთ წუთში გოლიც გაიტანა, მაგრამ ვაგლახ, მაგ დროისთვის ფრანგები უკვე 2:0-ს იგებდნენ. ცნობისათვის: ეს გახლდათ კრაუჩის 22-ე გოლი ინგლისის ნაკრების შემადგენლობაში. „ტოტენჰემის“ ფორვარდმა ეშლი იანგის მიერ კუთხურიდან ჩაწოდებული გადაგზავნა „ლურჯების“ კარში.
ინგლისის ნაკრებმა საჯარიმოში მაღალი ბურთების ჩაწოდებით ვერაფერი დააკლო გუნდს, რომელიც მას სჯობდა. სტუმართაგან ანგარიში ქარიმ ბენზემამ გახსნა, მეორე კი მატიო ვალბუენამ შეაგდო. ეს გახლდათ კაპელოს გუნდის პირველი წაგება სამხრეთ აფრიკის ქალაქ ბლუმფონტეინში გერმანიასთან მსოფლიოს ჩემპიონატზე დამარცხების შემდეგ.
მატჩის შემდეგ კაპელოს რაღაც დადებითი ხომ უნდა ეთქვა და ენდი ქეროლის თამაშზე გაამახვილა ყურადღება: „მისი თამაშით ძალიან კმაყოფილი ვარ. ქეროლი ინგლისის ნაკრების მომავლისთვის ძალიან მნიშვნელოვანი ფეხბურთელია“.
კაპელოს თქმით, რთული და ინგლისის ნაკრებისთვის წინააღმდეგობრივი 2010 წლის ერთ-ერთი უდიდესი მონაპოვარი სწორედ ენდი ქეროლის აღმოჩენა იყო. შემდეგ, ინგლისელთა იტალიელმა თავკაცმა ზოგადად, ამ დღეს საქმეში ნანახ ახალგაზრდებზე ილაპარაკა:
„ძალიან მნიშვნელოვანი გახლდათ ის, რომ ისეთ ძლიერ გუნდთან, როგორიც საფრანგეთის ნაკრებია თავი ახალგაზრდათა მთელმა ჯგუფმა გამოსცადა. მათი რეალური ფასი სწორედ ამ ტიპის შეხვედრებში უნდა გამოჩდეს. მე ბიჭებს ვუთხარი, რომ 21 წლამდელთა ნაკრებში თამაში სულ სხვაა, დიდი ნაკრების შემადგენლობაში „უემბლიზე“ საფრანგეთის წინააღმდეგ თამაში კი სხვა. პირველ ტაიმში ფრანგებმა გვაჯობეს, მეორეში ჩვენ უფრო კარგად ვითამაშეთ“.
ხოლო „ლურჯების“ თავკაცმა ლორან ბლანმა პრეს-კონფერენციაზე ასე თქვა:
„ჩვენ კარგად გვქონდა მოფიქრებული და დამუშავებული როგორ მოგვექცია მოწინააღმდეგე ზეწოლის ქვეშ და პირველ ტაიმში სიტუაციის ბატონ-პატრონებიც ვიყავით. მინდოდა ბიჭებს თავიანთი თამაშითა და დღევანდელი დღით ესიამოვნათ. ამიტომაც ვუთხარი, ისეთ ადგილზე, როგორიც „უემბლია“ შეიძლება სულ ერთი ან ორი შანსი მოგეცეთ და სწორედ ის უნდა გამოიყენოთ მეთქი. „უემბლიზე“ გამარჯვება ისეთი რამ არის, რასაც მთელი ცხოვრების განმავლობაში გაიხსენებ და როგორც მოგონებას გაუფრთხილდები. ჩვენ გუნდის შენებას კვლავაც განვაგრძობთ და ინგლისის ნაკრებმთან მოგებამ ეს პროცესი შეიძლება დაგვიჩქაროს, მაგრამ საქმე მაინც ბევრი გვაქვს გასაკეთებელი“.
ინგლისელთა კაპიტანმა რიო ფერდინანდმა თქვა: „რასაკვირველია, უკეთ შეგვეძლო თამაში. ბოლო 15 წუთს თუ არ ჩავთვლით, ფაქტობრივად კომბინაციური ფეხბურთი ვერ ვითამაშეთ და ჩვენი ძალა ვერ გამოვამჟღავნეთ. ვერც ბურთს ვფლობდით და ინიციატივაც მოწინააღმდეგეს გადავაბარეთ“.
ყოველდღიური სპორტული გაზეთი
"ლელო"
