ანხელ დი მარიას საქმე "მანჩესტერში" იდეალურად ნამდვილად არ მისდის და სარეკორდო შენაძენი ჯერჯერობით "წითელ ეშმაკებს" მხსნელად ვერ მოევლინა. მეტიც, ბოლო შეხვედრებში არგენტინელი სათადარიგოთა სკამზე ხვდება.ამ სიტუაციით სარგებლობას ცდილობს "პარი სენ-ჟერმენი" და ფრანგები შეეცდებიან, 27 წლის შემტევი ზაფხულში თავისთან წაიყვანონ, ხოლო მანჩესტერელებს, თავის მხრივ, შანსი ექნებათ, დახარჯული 59,7 მილიონი გირვანქა დაიბრუნონ; ყოველ შემთხვევაში, პსჟ ბევრით ნაკლებს არ გადაიხდის, თუ მეტს არა.
ამ მითქმა-მოთქმას სხვა ჭორიც უმაგრებს ზურგს - თითქოსდა, დი მარიამ მავან ყოფილ თანაკლუბელს, ანუ მადრიდის "რეალის" ერთ-ერთ მოთამაშეს უთხრა,
წავა თუ არა დი მარია, ლუი ვან გაალის ბანაკში ნებისმიერ შემთხვევაში ბევრი ცვლილება იქნება და ოლდტრაფორდელები ტრანსფერებში კიდევ დიდი თანხების დახარჯვას აპირებენ. ამჟამად 4 ახალ სახეზეა საუბარი, რომელთაგანაც ერთ-ერთი ნამდვილად მემფის დეპაია. "პსვ ეინდჰოვენისა" და ჰოლანდიის ნაკრების 21 წლის შემტევს ვან გაალი დიდი ხანია, თავისკენ ექაჩება.
კიდევ ერთი ახალწვეული კი, შესაძლოა, მირანდა გახდეს, რომელიც ასევე აღმოჩენილა მანჩესტერელთა საყიდლების სიაში. "ატლეტიკომაც" პირდაპირ და მარტივად განაცხადა - რატომაც არა, თუ მსურველი მისი გამოსასყიდი თანხით 21.9 მილიონი გირვანქით გაგვამდიდრებსო.
გადაიხდის თუ არა "იუნაიტედი" ამდენს ბრაზილიის ნაკრების 30 წლის მცველში, ზაფხულში გავიგებთ.
(იბეჭდება მცირე ცვლილებით)
ყოველდღიური სპორტული გაზეთი "ლელო"
