გასული წლის აგვისტოში რაფაელ ვან დერ ვაარტი მადრიდის "რეალიდან" "ტოტენჰემში" გადავიდა. თუკი ''სამეფო გუნდში'' იმედები ვერ გაამართლა და იშვიათად ათამაშებდნენ, ინგლისში თავისი ადგილი იპოვნა და თამამად შეიძლება ითქვას, რომ ჰოლანდიელი ნახევარმცველი ''ტოტენჰემის'' ერთ-ერთი ლიდერია. თუ გახსოვთ, მადრიდში გადასვლამდე ვან დერ ვაარტი გერმანიაში თამაშობდა, სადაც ''ჰამბურგის'' ღირსებას იცავდა. რაფაელს გერმანიაში დღემდე აფასებენ. ამის დასტურია ინტერვიუ, რომელსაც ქვემოთ გაეცნობით და რომელიც ინტერნეტგამოცემა ''სპოქსმა'' გამოაქვეყნა.- ჰერ ვან დერ ვაარტ, როგორ ხართ?
- როგორც იქნა, კვლავ შემიძლია გერმანულად საუბარი. ძალიან კარგად ვარ, თქვენ
- გმადლობთ, კარგად. როგორც ჩანს, ლონდონში ისევ იპოვეთ თქვენი ადგილი. ბედნიერი ჩანხართ...
- მიუხედავად იმისა, რომ ''რეალში'' იშვიათად მათამაშებდნენ, მადრიდში ყოფნაც ძალიან მსიამოვნებდა, მაგრამ ''ტოტენჰემი'' სულ სხვაა. აქ გუნდის ერთ-ერთი ლიდერი ვარ და რაც ყველაზე მთავარია, ყველაფერი კარგად მიდის.
- ''ტოტენჰემის'' მაისურით უკვე 11 გოლის გატანა მოახერხეთ.
- ჰო და თანაც, ეს არც ისე ძნელი იყო, რადგან როცა გუნდში პიტერ კრაუჩი გყავს, მიუხედავად იმისა, რომ ნახევარმცველი ხარ, გოლების გატანა გიადვილდება. კრაუჩი თავით მაძლევს ხოლმე საგოლე პასებს, მე კი ისღა მრჩება, რომ კარში ძლიერად დავარტყა. გოლების უმეტესობა სწორედ ასე გავიტანე. პიტერი ყოველთვის ახერხებს ორთაბრძოლის მოგებას და კარგი პასის მოცემის ჩინებული ნიჭიც აქვს. ასეთ სიტუაციებში მე მხოლოდ ის მევალება, რომ იმ ადგილზე ვიდგე, სადაც კრაუჩი ბურთს თავით დააგდებს.
- ''ტოტენჰემის'' თამაშში სხვაც ბევრი პოზიტიური ასპექტია, არა?
- რა თქმა უნდა. პირადად მე ჩვენი თამაშის სტილი ძალიან მომწონს. გარეთ ბეილის ან ლუკა მოდრიჩის მხარდამხარ თამაში უდიდეს სიამოვნებას მანიჭებს. ბურთთან ურთიერთობა ორივე მათგანს ძალიან კარგად ეხერხება. ზოგადად, ''ტოტენჰემში'' უაღრესად ჯანსაღი ატმოსფეროა.
- რას გულისხმობთ?
- ''ტოტენჰემი'' არის გუნდი, რომელიც არასდროს დაფრინავს მეცხრე ცაზე – აქ ყველა რეალისტია. თუმცა ჩვენ ყველამ ვიცით, რომ ძალიან კარგი გუნდი გვყავს და ბევრის მიღწევა შეგვიძლია, მაგრამ მიუხედავად იმისა, რომ პრემიერლიგაშიც კარგად გამოვიყურებით, ხოლო ჩემპიონთა ლიგაში კი მერვედფინალში გავედით, თავში არავის არაფერი აუვარდა.
- მიუხედავად ამისა, მაინც უნდა აღიაროთ, რომ მადრიდიდან წამოსვლა გაგიჭირდათ.
- ლონდონელებმა ჩემი გადაბირება სერიოზულად მხოლოდ მაშინ მოინდომეს, როცა სატრანსფერო ფანჯრის დახურვამდე ორი დღე იყო დარჩენილი და შესაბამისად, მოსაფიქრებლად ბევრი დრო არ მქონია. იმის თქმა მინდა, რომ გადაწყვეტილების მიღება არ გამიჭირდა.
- გული არ გწყდებათ, რომ ჟოზე მოურინიოს ფორმაციის ''რეალში'' თქვენი ადგილი არ მოიძებნა?
- ჰო, მაგრამ ''რეალის'' ხელმძღვანელები ჩემთან ყოველთვის გულახდილები იყვნენ. მადრიდში თავი ცუდად ერთხელაც არ მიგრძვნია, მაგრამ ეს ყველაფერი არ არის. მე რეგულარულად თამაში მინდოდა, ''რეალში'' კი ამის გარანტიას ვერ მაძლევდნენ. სწორედ ასეთ დროს დამირეკეს ლონდონიდან...
- თუმცა მოურინიოს ხელმძღვანელობით ოთხი კვირა ივარჯიშეთ.
- ერთი თვე საკმარისი დროა იმისათვის, რომ მოურინიოსგან ბევრი რამ ისწავლო. ჟოზეს ხელში ნავარჯიშები ფეხბურთელების აბსოლუტური უმრავლესობა ამბობს, რომ მოურინიო მსოფლიოში საუკეთესო სპეციალისტია. სამწუხაროდ, მე მასთან ძალიან ცოტა ხანს ვივარჯიშე იმისათვის, რომ ახლა მოურინიო დეტალურად შევაფასო, მაგრამ იმის თქმა კი შემიძლია, რომ მისი მუშაობის სტილი და აურა გენიალურია.
- ამბობთ, ''ტოტენჰემთან'' ერთად ძალიან ბევრი რამის მიღწევა მინდაო. დააკონკრეტეთ თუ შეიძლება.
- პრემიერლიგაში სულ ხუთი ისეთი გუნდია, რომლებსაც დღეს ჩემპიონობისთვის ბრძოლა შეუძლიათ და ერთ-ერთი სწორედ ''ტოტენჰემია''. ისევე, როგორც ცხოვრებაში, მთავარი ფეხბურთშიც რწმენაა – თუ ჩვენ ვირწმუნებთ, რომ ინგლისის ჩემპიონატის მოგება შეგვიძლია, ეს მართლა რეალური იქნება. ჰოლანდიის ნაკრების მთავარმა მწვრთნელმა ბერტ ვან მარვიიკმა სამხრეთ აფრიკაში გამგზავრებამდე ფეხბურთელებს გვკითხა, რამდენად გჯერათ იმის, რომ მსოფლიოს ჩემპიონატის მოგება შეგიძლიათო.
არცერთ ფეხბურთელს ხმა არ ამოუღია. ვან მარვიიკმა კი გვითხრა: ''თუ არც ერთ თქვენგანს არ სჯერა, რომ მუნდიალის მოგება შეგვიძლია, მაშინ სახლში უნდა დავრჩეთ, სამხრეთ აფრიკაში ჩასვლას რა აზრი აქვსო. ამის მერე კი რამდენიმე მოთამაშე წამოდგა და თქვეს, ჩემპიონობა ძალიან კარგადაც შეგვიძლიაო. ხომ ნახეთ, ფინალში გავედით.
- რა დააკლდა ჰოლანდიის ნაკრებს ფინალის მოსაგებად?
- ესპანეთს რომ ვერ მოვუგეთ, ეს იკერ კასილიასის დამსახურებაა, რომელმაც 61-ე წუთზე მასთან პირისპირ გასული არიენ რობენის დარტყმა მოიგერია.
- მიუხედავად იმისა, რომ ჰოლანდიამ მუნდიალის ფინალში ითამაშა, საუკეთესო ფეხბურთელის დასახელებისას, სამეულში არც ერთი ჰოლანდიელი არ ყოფილა.
- ეს მაგრად არ მომეწონა. ლიონელ მესი უდავოდ გენიალური ფეხბურთელია, ანდრეს ინიესტას და ჩავი ერნანდესსაც ბრწყინვალე სეზონი ჰქონდათ, თანაც მსოფლიოს ჩემპიონები გახდნენ, მაგრამ ჩემი აზრით, ვესლი სნეიდერი ტიტულს თუ არა, სამეულში ყოფნას მაინც იმსახურებდა. მან მუნდიალის ფინალში ითამაშა, მილანის ''ინტერთან'' ერთად კი ყველაფერი მოიგო.
ყველაფერთან ერთად, სნეიდერმა მთელი სეზონი უმაღლეს დონეზე ჩაატარა და არაერთი უმნიშვნელოვანესი გოლის გატანაც შეძლო.
- თითქმის იგივე ითქმის არიენ რობენზეც.
- ნამდვილად. რობენი რომ არა, მიუნხენის ''ბაიერნი'' ჩემპიონთა ლიგის ფინალში ვერ გავიდოდა.
- როგორ ფიქრობთ, მიუნხენურ კლუბს წელსაც შეუძლია ფინალში გასვლა?
- ჰო, ოღონდ თუ ვან ბომელი დარჩება (იცინის). ხუმრობა იქით იყოს და ''ბაიერნი'' შარშანდელის მერე თითქმის არ შეცვლილა, ლუის ვან გაალი კი ბრწყინვალე მწვრთნელია. ''ბაიერნისთვის'' გადამწყვეტი მნიშვნელობა რობენისა და რიბერის ჯანმრთელობას ექნება.
- როგორ ფიქრობთ, რომელი გუნდები ითამაშებენ 28 მაისს ჩემპიონთა ლიგის ფინალში, რომელიც ლონდონში უნდა გაიმართოს?
- მე მინდა, რომ ფინალში ჩვენ გავიდეთ და მიუნხენის ''ბაიერნს'' შევხვდეთ.
- ვესლი სნეიდერზე ისე ლაპარაკობთ, თითქოს თქვენი კერპი იყოს.
- არა, ვესლი უბრალოდ ძალიან მიყვარს და ვაფასებ. ჩემი კერპი კი ბავშვობაში რომარიო იყო.
- 27 წლის ხართ და ჰოლანდიის ნაკრებში უკვე 88 მატჩი გაქვთ ჩატარებული. თქვენზე მეტი თამაში მხოლოდ ოთხ ფეხბურთელს აქვს ჩატარებული. როგორ ფიქრობთ, ედვინ ვან დერ სარის რეკორდის გაუმჯობესებას შეძლებთ?
- ყოველ შემთხვევაში, ჩემი მიზანია, რომ ნაკრებში 130-ზე მეტი თამაში ჩავატარო. ფეხბურთს კიდევ მინიმუმ 6-7 წელი ვითამაშებ და ეს სავსებით საკმარისია იმისათვის, რომ ვან დერ სარის რეკორდი დავამხო. ზოგადად კი, ჩემთვის ამაზე უფრო მნიშვნელოვანი ჰოლანდიის ნაკრებთან ერთად ევროპის ან მსოფლიოს ჩემპიონატის მოგებაა.
.
