"არსენალს" საკუთარ "ემირატებზე" ბურთის ფლობა 62% ჰქონდა და "ვესტ ჰემთან" ლონდონურ დერბიში მეტოქის კარში 22-ჯერ დაარტყა, მაგრამ მაინც დამარცხდა და თან ისე, რომ გოლიც კი ვერ გაიტანა. შედეგი, ცხადია, მოულოდნელი გახლდათ, მით უფრო, "მეთოფეების" ბოლოდროინდელი შთამბეჭდავი თამაშის ფონზე, რის გამოც ბევრი სერიოზულად საუბრობდა და საუბრობს არსენ ვენგერის გუნდის რეალურ საჩემპიონო შანსებზე.
"შესაბამისი რეაქცია უნდა მოვახდინოთ. "ვესტ ჰემთან" შეხვედრაში, ალბათ, ზედმეტად ვნერვიულობდით. შესაძლოა, ბიჭებმა საკუთარი თავი ზედმეტი წნეხის ქვეშ მოაქციეს.
ეს ფსიქოლოგიური დარტყმა და მტკივნეული მარცხი გახლდათ, რომელმაც უნდა გამოგვაფხიზლოს და
"ჩაქუჩებთან" მარცხმა კარგი მასალა მისცა "მეთოფეთა" ფანებისა და ფეხბურთის სპეციალისტების იმ ნაწილს, რომლებიც მიიჩნევენ, რომ "არსენალს" ჯერ კიდევ გვარიანად სჭირდება შემადგენლობის გადახალისება-გაძლიერება. განსაკუთრებით კი თავდასხმაშია სიახლე და ახალი ფორვარდი საჭირო.
თუმცა ვენგერი "პირველ ჩვენებას" არ ცვლის და ამბობს, რომ ამჟამინდელი შემადგენლობითაც კმაყოფილია და არსებული რესურსის გამოყენებითაც უნდა მოდიოდეს შედეგი. თუმცა ამ წაგების მერე მუსიე არსენი ისეთივე ომახიანი ვეღარ იყო და ვეღარ ამბობდა - შეხედეთ, როგორ დავფარფატებთ და რა მრავალმხრივები ვართ შეტევაშიო. თვითტკბობის ხარისხმა და დოზამ იკლო.
"მირჩევნია, ვიფიქრო და სწორედ ასე ვფიქრობ, რომ ტრანსფერების საჭიროებასა და ახალ ფეხბურთელებზე გადაწყვეტილებას ჩვენ ვიღებთ და პასუხისმგებლებიც ჩვენ ვართ და არა მედია.
ხოლო, როდესაც პროფესიონალი ხარ, პასუხისმგებლობა უნდა აიღო და გამართლება თუ გამოსავალი სხვა რამეში არ უნდა ეძიო. საჭიროა დაფიქრება და გააზრება იმისა, რომ საკმარისად კარგები არ ვიყავით. მომავალში უკეთ უნდა ვითამაშოთ და იგივე შეცდომები აღარ გავიმეოროთ", - დასძინა ვენგერმა.
"ვესტ ჰემს" კი ქების მეტი არაფერი ეკუთვნის. "ჩაქუჩების" ექსფეხბურთელმა სლავენ ბილიჩმა, პრემიერლიგაში თავისი სამწვრთნელო კარიერა ასეთი ხმაურიანი გამარჯვებით დაიწყო. თანაც, ხორვატმა თავიდანვე რამდენიმე საინტერესო გადაწყვეტილება მიიღო, სარისკოც კი... და ხაზი გაუსვა, რომ სემ ალარდაისის პერიოდთან შედარებით, რაღაც-რაღაცების შეცვლას აპირებს.
ენერგიულმა და ექსცენტრიკულმა ხორვატმა სპეციალისტმა მიგვანიშნა, რომ მაურო სარატეს მეტი სათამაშო დრო და შანსი მიეცემა. არგენტინელმაც ბილიჩს ნდობა გაუმართლა და გოლი გაიტანა.
მეორე ბურთი მშვენივრად მოთამაშე შეიხუ კუიატეს აქტივშია. ძალიან კარგი შთაბეჭდილება დატოვეს ახალწვეულმა დიმიტრი პაიემ და 16 წლის დებიუტანტმა ჰარის ოქსფორდმა. გასული სეზონის დაწყებიდან დღემდე, ევროპის ხუთ უძლიერეს საკლუბო ჩემპიონატს თუ გავითვალისწინებთ, პაიეზე მეტი საგოლე პასი მხოლოდ ვოლფსბურგელ კევინ დე ბრუინს (20) აქვს გაკეთებული, დიმიტრის აქტივში კი 18 საგოლე გადაცემაა. ფრანგმა "ვესტ ჰემშიც" კარგად დაიწყო.
რაც შეეხება ოქსფორდს, ის ჯერ მხოლოდ 16 წლისაა და ექსევერტონელის, ჟოზე ბაქსტერის შემდეგ პრემიერლიგის ისტორიაში მეორე ყველაზე ახალგაზრდა ფეხბურთელია, ვინც მინდორზე გასულა.
ბილიჩი და არა მარტო ის ნორჩი ტალანტით აღფრთოვანებული გახლდათ.
"მეკითხებოდნენ - დარწმუნებული ხარ, რომ ის 16 წლისაა? ეს ერთგვარი რისკი იყო, მაგრამ მჯეროდა მისი და ცდად ღირდა. გვჭირდებოდა ფეხბურთელი, რომელიც მცველების წინ იმოქმედებდა და საჭიროების შემთხვევაში, მესამე ცენტრალური მცველი გახდებოდა, მაგრამ, ამავდროულად, ბურთთან "შენობით" იქნებოდა და წინაც წავიდოდა. ძალიან ვამაყობ ჰარისით. ფურცელზე 16 წლისაა, მაგრამ იგი ამ ახალი თაობის წევრია და უკვე მაღალ დონეზე თამაშობს.
ვიცი, რომ კარგი გუნდი გვყავს, ეს ბიჭებმაც იციან, მაგრამ საკითხავი იყო - რამდენად გამოვიდოდა მინდორზე ამის ჩვენება. მიხარია, რომ პოტენციალი გამოვავლინეთ", - აღნიშნა ბილიჩმა.
ალბათ, ისიც იცით, რომ ლონდონურ დერბიში პეტრ ჩეხმა დამაჯერებლად ვერ ითამაშა და დამნაშავე იყო პირველი გაშვებული გოლისას - კარიდან ცუდად გამოვიდა და კუიატს გაატანინა. ვენგერმა ამ თემაზე საუბარს თავი აარიდა და ვეტერან ჩეხ გოლკიპერზე ცუდი არაფერი უთქვამს.
თავად პეტრის კომენტარი კი ასეთი გახლდათ: "თითქოს ეს სცენარში არ უნდა ყოფილიყო და სამწუხაროა, რომ პრემიერლიგის ახალი სეზონი ასე დაიწყო - შეცდომით და უქულოდ. თუმცა ახლა მომავალ შეხვედრაზე უნდა ვიფიქროთ და მოვემზადოთ".
"ჩაქუჩებს" "არსენალთან" მიჯრით 9 წაგება ჰქონდათ და 2007 წლის შემდეგ "ემირატებზე" არ გაემარჯვათ, როდესაც "მეთოფეებს" ახალ სტადიონზე პირველი მარცხი აგემეს.
(იბეჭდება მცირე ცვლილებით)
ყოველდღიური სპორტული გაზეთი "ლელო"
