პრემიერლიგა. V ტურის წინ: გადამწყვეტი არა, მაგრამ გარდამტეხი

როდესაც"მანჩესტერი"-"ლივერპულია" ყველა სხვა მატჩი ჩრდილში ექცევა ხოლმე. მერე რა, რომ ლიდერი ამჟამად არცერთი არ არის.

საერთო ამ ისტორიულად დაპირისპირებულ და ინგლისის ყველაზე ტიტულოვან გუნდებს შორის ისიცაა, რომ სანაკრებო პაუზაზე ორივე გუნდი ცუდ ხასიათზე, მარცხით გავიდა, არადა იქამდე ორივეს 3 მატჩიდან 7 ქულა ჰქონდა და აგრეთვე ერთნაირად მოპოვებული - ორი 1:0-ითა და ერთი უგოლო ფრის წყალობით.

აი, მე-4 ტურში კი მათ გაუშვეს კიდეც და წააგეს, რაც განსაკუთრებულად მოულოდნელი არ ყოფილა, რადგან ისინი კარგი შედეგის მიუხედავად, არადამაჯერებლად გამოიყურებოდნენ.

ახლა კი ერთმანეთში ექნებათ ძალიან პრინციპული დუელი, რომლის საბოლოო შედეგიც გადამწყვეტი არ იქნება, მაგრამ გარდამტეხი როლი შესაძლოა, ნამდვილად ითამაშოს, რადგან ამ წყვილში, თან ასეთ დროს, დამარცხებული დიდ ფსიქოლოგიურ დარტყმას მიიღებს, გამარჯვებული კი პირიქით.

რადგან ფსიქოლოგიურ მხარეზე ჩამოვაგდეთ საუბარი, ბარემ აქვე ისიც აღვნიშნოთ, რომ ამჟამად მენტალური მზაობა პირადად უეინ რუნის საუკეთესო ექნება, რისი მიზეზიც ისაა, რომ მან სან მარინოსაც გაუტანა, შვეიცარიასაც და ინგლისის ნაკრების ყველა დროის საუკეთესო ბომბარდირი გახდა, გადაასწრო რა სერ ბობი ჩარლტონს.

აი, პრემიერლიგაში კი "შრეკს" ჯერ არ გაუტანია და ასეთ კარგ ტალღაზე მყოფი შეეცდება მასზევე დარჩეს და ნავსი საძულველ "ლივერპულთან" გატეხოს, მას ხომ ორმაგი მიზეზი აქვს იმისა, რომ "ენფილდის" ბინადრები არ უყვარდეს - ექსევერტონელია და "მანჩესტერის" ამჟამინდელი კაპიტანი გახლავთ. "იუნაიტედის" რიგებში წესით, ანტონი მარსიალის დებიუტი უნდა შედგეს და ესეც ერთ-ერთი მთავარი თემაა.

ყველა ელოდება იმის ხილვას, რაც მანჩესტერელებს ასე ძვირი დაუჯდათ, რამდენად გამართლებული გახლდათ ამხელა თანხის გადახდა და გაამართლებს თუ არა ეს ძვირი სიამოვნება მოლოდინს.

ბრენდან როჯერსს კი თავისი საფიქრალი და გეგმები აქვს, მისი "ლივერპული" წინა სეზონებში ძალიან მძიმედ იწყებდა და პირველ წრეში იმდენ ქულას კარგავდა, რომ მეორეში საგრძნობი გააქტიურება საკმარისი აღარ გახლდათ ხოლმე. ამჟამად ჩრდილოირლანდიელი განსაკუთრებულად ფრთხილობს და თითოეულ ქულას დასტრიალებს თავს. მის გუნდშიც რომ ბევრი ცვლილებაა ახლაწვეულების კუთხით, ალბათ კარგად იცით და საინტერესოა, როგორ წარმოაჩენენ ისინი თავს "მანჩესტერის" წინააღმდეგ.

მოკლედ, ამ ჩემპიონთა ლიგის საგზურისა და გულის სიღრმეში, ჩემპიონობისთვის მებრძოლ გუნდებს ქულები ძალიან სჭირდებათ და მატჩიც საინტერესო უნდა გამოვიდეს. წაგებას ძალიან დიდი ვარდნა შეიძლება მოჰყვეს, დამარცხებულზე ეს ცუდად აისხება, ჩამორჩენაც გაიზრდება და ფანებიც უაღრესად მტკივნეულად მიიღებენ, ამიტომაც, სავარაუდოდ, ორივე საკმაო სიფრთხილეს გამოიჩენს მაგრამ იმედია ეს შეხვედრის სანახაობრივ მხარეზე არ აისახება.

მოქმედი ჩემპიონი "ჩელსი" "გუდისონ პარკზე" "ევერტონს" სტუმრობს. გუნდებს განსხვავებული სტარტი აქვთ, მერსისაიდელები ცოტა უკეთაც კი გამოიყურებიან, ვიდრე ჟოზე მოურინიოს მრისხანე გუნდი. "ლურჯები" ედენ აზარის ფანტაზიის გარდა, ახლა უკვე პედროს იმედადაც არიან, ესპანელმა პრემიერლიგას ალღო მალე აუღო. ასე რომ, "ჩელსიმ" უცილობლად უნდა მოიგოს, თორემ ჩამორჩენა უკვე ისეთია, რომ მერე გვიანი იქნება. "ჩელსის" ვარჯიშზე ტრავმა მიიღო ბელგიელმა გოლკიპერმა ტიბო კურტუამ.

"ევერტონი" კი იმით არის შეგულიანებული, რომ ჯონ სტოუნსი შეინარჩუნა და ის სწორედ "ჩელსის"არ დაუთმო. არსად წასულან არც როს ბარკლი და რომელუ ლუკაკუ. ასე რომ, თუ რობერტო მარტინესი ახალი ფეხბურთლებითა და ხმაურიანი ტრანსფერებით არ გაუნებივრებიათ, იმით მაინც გაახარეს, რომ წამყვანი მოთამაშეები არ გაუყიდეს.

ერთპიროვნულად, შთამბეჭდავად და დამაჯერებლად გალიდერებული "სიტი" ალან პარდიუს მაღლა მფრინავ "არწივებს" ესტუმრება. "კრისტალ პალასმა" მართლაც კარგი თამაში შემოგვთავაზა და რამდენიმე ახალწვეულითაც გვარიანად მოძლიერებულია, მაგრამ იქნება ეს ყველაფერი საკმარისი ასეთ ფორმაში მყოფი "ქალქელების" შესაჩერებლად?

თანაც, რაჰიმ სტერლინგი ნელ-ნელა, თამაშს იწყებს, სერხიო აგუერომ კი ორ სანაკრებო შეხვდრაში 3 გოლი გაიტანა და 4 საგოლე პასი გააკეთა. რაც მთავარია, ყველანი კევინ დე ბრუინს ველოდებით, ბელგიელმა "სიტის" შემტევი პოტენციალი ერთიორად უნდა გაზარდოს. მოკლედ, მანუელ პელეგრინის ბიჭებმა ასე ნაადრევად მოიპოვეს მთავარი ფავორიტის სტატუსი და ვნახოთ, რამდენად გაამართლებენ მას "სელჰარსტ პარკზე".

აი, ვინც ვერანაირი სტატუსი ვერ მოიპოვა და სტარტზე იმაზე გაცილებით ცუდად გამოიყურება, ვიდრე ველოდით "სტოკია". მარკ ჰიუზს ამ ტურშიც გაუჭირდება რაიმე განსაკუთრებულის შემოთავაზება, რადგან მისი ბიჭები "მეთოფეებს" სტუმრობენ. არსენ ვენგერის "არსენალის" არსენალი მხოლოდ 7 ქულის მოპოვებისთვის გამოდგა საკმარისი.

ეპიზოდურად ლონდონელები ძალიან კარგ თამაშს აჩვენებენ, მაგრამ სტაბილურობა ისევ პრობლემად რჩება. ასეა თუ ისე, მაღალ მიზნებზე თუ ვსაუბრობთ, ეს შეხვედრა ფრანგი სპეციალისტისთვის აუცილებლად მოსაგებთა კატეგორიაში შედის.

ცუდად დაიწყო "სანდერენდმაც" და საკუთარ "ლაითზე" "ტოტენჰემთან" შეეცდება მდგომარეობის გამოსწორებას, რაშიც "შავ კატებს" მთავარი "შავი კატა" ექსტოტენჰემელი ჯერმინ დეფო უნდა დაეხმაროს. თუმცა არც ის დაგვავიწყდეს, რომ მათ განკარგულებაში უკვე დაბრუნებული ფაბიო ბორინია, ასევე ოლა ტოივონენი და ჟერმინ ლენსიც მშვენივრად გამოიყურება. "დეზებზე" რაღა ვთქვათ? ჯერჯერობით ყველაზე დიდი იმედგაცრუება სწორედ მაურისიო პოჩეტინოს გუნდია.

"ტოტენჰემის" თამაში შეიძლება კატასტროფული არ არის, მაგრამ ფაქტია, შედეგი არ ჩანს. ამის ერთ-ერთი უპირველესი მიზეზი ის გახლავთ, რომ საწყის ტურებში ჰარი კეინი ვერ ბრწყინავდა, მაგრამახლა მან ორი სანაკრებო გოლის გატანა შეძლო და წესით, ძალიან კარგ ხასიათზე და დიდი შემართებით უნდა გავიდეს მინდორზე.

საინტერესოა, შეძლებს თუ ვერა ბირმინგემის "ასტონ ვილა", რომელსაც ქულები ნამდვილად სჭირდება ჯერაც დაუმარცხებელი "ლესტერის" შეჩერებას. სულ ცუდ სტარტზე ვსაუბრობდით და მოულოდნელად, ყველაზე კარგი სტარტის შემოქმედი სწორედ კლაუდიო რანიერია, თავისის "მელიებითურთ".

ორი-სამი სიტყვით ტურის დამაგვირგვინებელი, ორშაბათის მატჩიც ვახსენოთ და მარტო წყვილის დასახელებაც კმარა იმის წარმოსადგენად, თუ როგორი გემრიელი და პრემიერლიგურად ჯაჯგურ-ჯაგაჯუგური მატჩი გველოდება - "ვესტ ჰემი"-"ნიუკასლი".

პრემიერლიგა. V ტური
შაბათი. 12 სექტემბერი
ევერტონი-ჩელსი 15:45
დისკვალიფიკაცია: არავინ
ტრავმა: გოლოუეი, პიენაარი, ბეინსი - ოსკარი
ურთიერთშეხვედრები
სულ 152 თამაში: +49 =47 -56 (227-236)

ნორვიჩი-ბორნმუთი 18:00
დისკვალიფიკაცია: ვიტეკერი -
ტრავმა: ლაფერტი - გრადელი, მინგსი
ურთიერთშეხვედრები
სულ 0 თამაში: +0 =0 -0 (0-0)

კრ. პალასი-სიტი 18:00
დისკვალიფიკაცია: არავინ
ტრავმა: იედინაკი, შამახი, კემპბელი, აპია - ბონი, ფერნანდო, საბალეტა
ურთიერთშეხვედრები
სულ 52 თამაში: +15 =13 -24 (59-82)

ვესტ ბრომვიჩი-საუთჰემპტონი 18:00
დისკვალიფიკაცია: არავინ
ტრავმა: ბრანტი, ფოსტერი - ვანიამა, კლასი, რამირესი, გარდოში, ფორსტერი
ურთიერთშეხვედრები
სულ 40 თამაში: +14 =13 -13 (44-44)

არსენალი-სტოკი 18:00
დისკვალიფიკაცია: - ადამი, აფელაი
ტრავმა: როსიცკი, უილშირი, უელბეკი - ოდემვინგი, შოუკროსი
ურთიერთშეხვედრები
სულ 88 თამაში: +44 =20 -24 (137-82)

უოტფორდი-სუონსი 18:00
დისკვალიფიკაცია: ბრიტოსი -
ტრავმა: დოილი, ეკსტრანდი -
ურთიერთშეხვედრები
სულ 2 თამაში: +2 =0 -0 (5-2)

მანჩესტერი-ლივერპული 20:30
დისკვალიფიკაცია: - კოუტინიო
ტრავმა: ჯონსი - ალენი, ლალანა, სტარიჯი, ფლენეგანი
ურთიერთშეხვედრები
სულ 160 თამაში: +63 =44 -53 (220-201)

კვირა. 13 სექტემბერი
სანდერლენდი-ტოტენჰემი 16:30
დისკვალიფიკაცია: არავინ
ტრავმა: მეტიუზი, ჯონსონი - თაუნსენდი
ურთიერთშეხვედრები
სულ 102 თამაში: +34 =28 -40 (134-140)

ლესტერი-ასტონ ვილა 19:00
დისკვალიფიკაცია: არავინ
ტრავმა: ჯეიმსი - ადამა ტრაორე, ხოსე კრესპო
ურთიერთშეხვედრები
სულ 78 თამაში: +32 =21 -25 (154-138)

ორშაბათი. 14 სექტემბერი
ვესტ ჰემი-ნიუკასლი 23:00
დისკვალიფიკაცია: ადრიანი - მიტროვიჩი
ტრავმა: მოზესი, კეროლი, ვალენსია - რივიერი
ურთიერთშეხვედრები
სულ 96 თამაში: +32 =25 -39 (134-150)

ბომბარდირი: 4 - ბაფეტიმბი გომისი (სუონსი), რიად მაჰრეზი (ლესტერი), კალუმ უილსონი (ბორნმუთი).

ყოველდღიური სპორტული გაზეთი "ლელო"