პრემიერლიგა. VII ტური: მანჩესტერული როქი [VIDEO]

* უეინ რუნი 176 გოლით "იუნაიტედის" მეგოლეებში მესამე ადგილზე გადავიდა, ის დენის ლოუს გაუთანაბრდა.

* დანიელ სტარიჯმა მარტის მერე პირველად გაიტანა.

* ლუი ვან გაალმა მანჩესტერულ კარიერაში პირველად გადაიყვანა გუნდი პირველ ადგილზე.

10 დღეც არ არის გასული, რაც "მანჩესტერ სიტი" ხელშეუხებელი გვეგონა. თუმცა მანუელ პელეგრინის ბიჭებმა "ვესტ ჰემთან" მარცხს კიდევ ერთ ლონდონურ გუნდთან, "ტოტენჰემთან" წაგება მიაყოლეს. საბოლოოდ, ანგარიშის მიხედვით ისე გამოვიდა, რომ "დეზებმა" მეტოქე გაანადგურეს, მაგრამ ამ მატჩში გასული 5 ბურთიდან 3, წესით, თამაშგარეს მიზეზით არ უნდა ჩათვლილიყო.

მათ შორის, კევინ დე ბრუინის გოლიც, რომელიც ბელგიელმა იაია ტურეს პასით შეაგდო. აი, "ტოტენჰემის" პირველი და მესამე ბურთები კი აშკარა ოფსაიდიდან გავიდა. გვერდითმა არბიტრებმა მატჩი ჩააგდეს, მაგრამ "ქალაქელები" მარცხს მარტო ამას ვერ დააბრალებენ. მნიშვნელოვანი გახლდათ ისიც, რომ თავი ჰარი კეინმა გამოიჩინა, რომლის გოლსაც დიდხანს ველოდით.

"ასეთ მეტოქესთან თამაში ადვილი არასდროსაა. "სიტი" ძალიან ძლიერი გუნდია და უამრავი ბრწყინვალე ფეხბურთელი ჰყავს. ჩემს მოთამაშეებს ვულოცავ, რადგან ისინი ბრწყინვალედ გამოიყურებოდნენ და გამარჯვება ნამდვილად დავიმსახურეთ. ყველას გვიხარია ჰარი კეინის გოლი, მართლაც ბედნიერი ვარ ამის გამო, რადგან მას ეს ძალიან სჭირდებოდა. ჩვენ გვჯერა კეინის ტალანტისა და მაღალი კლასის" - თქვა კმაყოფილმა მაურისიო პოჩეტინომ.

მანუელ პელეგრინი: "მეტოქის ორი გოლი თამაშგარედან გავიდა. პრემიერლიგა ძალიან ძლიერი და რთული ტურნირია, რაც ჩვენს შედეგებზეც აისახა. ვფიქრობ, მეორე ტაიმი ცუდად ჩავატარეთ. ახლა მუშაობა უნდა გაგავრძელოთ და შემდეგი მატჩებისთვის მოვემზადოთ. ისე უნდა ვითამაშოთ, როგორც ამას პირველ ნახევარში ვაკეთებდით".

გარდამტეხი ერიკ დაიერის გოლი გახლდათ, რომელმაც კეინის გოლის მსგავსად, ოფსაიდიდან შეაგდო. "სიტის" პირველ 5 ტურში გოლი საერთოდ არ ჰქონდა გაშვებული, ბოლო ორ შეხვედრაში კი 6 მიიღო საკუთარ კარში.

როგორც იქნა, გაიტანა უეინ რუნიმაც. "მანჩესტერ იუნაიტედს" პირველ ადგილზე გადასვლის შანსი ჰქონდა და ამ შესაძლებლობას "წითელი ეშმაკები" ხელიდან, უბრალოდ, ვერ გაუშვებდნენ. ისინი ვალდებულნი იყვნენ, წყალწაღებული "სანდერლენდი" დაემარცხებინათ და მძიმე პირველი ტაიმის მიუხედავად, მიზანს მაინც მიაღწიეს, მეტოქეს "გოლი გასახდელში გაატანეს", მეორე ნახევრის დებიუტში კი მატჩის ბედი გადაწყვიტეს. ანტონი მარსიალმა ამჯერად ვეღარ იხეირა, მაგრამ ცუდად არ უთამაშია. კარგი შთაბეჭდილება დატოვეს დეილი ბლინდმა და ხუან მატამ. შეაგდო მემფის დეპაიმაც, რაც არანაკლებ მნიშვნელოვანი გახლდათ.

"ცხადია, ცხრილის სათავეში ყოფნა ძალიან სასიამოვნო შეგრძნებაა. თანაც, ეს ჩემი აქაური პერიოდისას პირველად ხდება და მოხარული ვარ. ყოველთვის ძნელია ისეთი გუნდის წინააღმდეგ თამაში, რომელიც მთელი შემადგენლობით თავს იცავს და კონტრშეტევებს ელოდება. პირველი ტაიმის მიწურულს გატანილმა გოლმა გამახარა, ეს გადამწყვეტი იყო. ამ გოლით მეტოქე დაისაჯა, რადგან ყველა შანსს იყენებდა დროის გასაყვანად და მსაჯი ამაზე არ რეაგირებდა" - გვითხრა ლუი ვან გაალმა.
მე-7 ტურისთვის ერთადერთი წაუგებელი გუნდი იყო დარჩენილი და ისიც დამარცხდა. არადა, "ლესტერმა" ძალიან მძლავრად დაიწყო, "არსენალის" კართან მომენტებიც შექმნა, ჯეიმი ვარდიმ ზედიზედ მეოთხე შეხვედრაშიც გამოიჩინა თავი და "მელიები" დააწინაურა.

თუმცა ლესტერშირელებს არ გაუმართლათ იმაში, რომ მეორე მალევე ვერ გაიტანეს და პირიქით, "მეთოფეებმა" სწრაფად გაათანაბრეს. თეო უოლკოტი ძირითადში მოხვდა და როგორც ბოლო დროს ასეთ დროს ხდება ხოლმე, კუთვნილი გოლიც გაიტანა. შემდეგ კი ალექსის სანჩესის დრო დადგა. ჩილელის ასეთი თამაში არსენ ვენგერს ძალიან აკლდა და ალექსისმაც გამოიღვიძა, მან ჰეთ-თრიკი შემოგვთავაზა. ბოლოს ვარდის მეორე გოლმა ვეღარაფერი შეცვალა, რადგან შეტევაში გაქცეულ "ლესტერს" უოლკოტის ნაცვლად გამოსულმა ოლივიე ჟირუმაც გაუტანა - 2:5. "არსენალი" ოთხეულში შევიდა.

"ახლა ყველაფერი თავიდან უნდა დავიწყოთ და ისევე გავაგრძელოთ, როგორც სეზონის სტარტზე ვთამაშობდით. პირველ ტაიმში ძალიან გახსნილი ფეხბურთი მიდიოდა და ბევრი მომენტი შეიქმნა. ყველანაირად ვცდილობდით გატანას, მაგრამ ერთზე მეტი ვერ შევაგდეთ. მეორე ნახევარში კი, როდესაც სანჩესმა 1:3 გახადა, ჩვენთვის ყველაფერი დამთავრდა" - თქვა კლაუდიო რანიერიმ.

"კოპა ამერიკის მერე სანჩესს ცოტა დრო სჭირდებოდა, რომ უმაღლეს დონეზე გაეგრძელებინა თამაში და ეს სამი გოლი მას ძალიან დაეხმარება. გვიხარია რომ მას და გუნდს კარგი თამაში გამოუვიდათ" - ესეც ვენგერის სიტყვები.

შაბათის მატჩები საოცარი უხვგოლიანობით გამოირჩა, 8 შეხვედრაში 35(!) ბურთი გავიდა და გამონაკლისი არც "ენფილდზე" გამართული მატჩი გახლდათ, სადაც გოლებმა ასევე მოწვიმა.

კეინის, დეპაის, რუნის, სანჩესის... დარად, დანიელ სტარიჯმაც გამოიღვიძა და მარტის მერე პირველად შეაგდო, თანაც ორი. სტარიჯის გოლები ერთმანეთზე უკეთესი გამოვიდა, ჯერ მას პირველი გოლის ავტორმა ჯეიმს მილნერმა გაატანინა, მეორედ კი კოუტინიოსთან გაათამაშა დახვეწილი და უაღრესად ლამაზი კომბინაცია. მიუხედავად ამ ყველაფრისა, ისე როგორ იქნებოდა, "ლივერპულს" ფანებისთვის სანერვიულო არ გაეჩინა, რუდი ჟესტედმა თავი ორჯერ გამოიჩინა და "ასტონ ვილამ" ბოლომდე იბრძოლა, მაგრამ... ტიმ შერვუდის ბიჭები გასავარდნ ზონაში დაეშვნენ.

ამასობაში ჟოზე მოურინიო მისთვის დაწყევლილ "სენტ ჯეიმს პარკზე" ისევ ვერაფერს გახდა. პორტუგალიელი იმაზეც მადლობელი უნდა იყოს, რომ მისმა გუნდმა იქიდან ქულა წამოიღო, რადგან 79-ე წუთამდე "ლურჯები" 0:2-ს აგებდნენ და მოუმ თავადვე აღიარა, კოშმარულად ვთამაშობდითო. "ნიუკასლი" კი გაცილებით უკეთ გამოიყურებოდა, ვიდრე წინა ტურებში, მაგრამ სტივ მაკლარენს სეზონში პირველ მოგებამდე ძალიან ცოტა დააკლდა.

სამაგიეროდ, მოუგებელთა სიიდან ამოეწერა "სტოკი". "ბრიტანიაზე" მატჩის მსვლელობისას მთავარი ფორვარდის, კალუმ უილსონის ტრავმის გამო მის გარეშე დარჩენილმა "ბორნმუთმა" ანგარიშის გათანაბრება კი მოახერხა და, თითქოს, "ალუბლებს" ქულაც უნდა წამოეღოთ, მაგრამ შეცვლაზე შესულმა მამ ბირამ დიუფმა მარკ ჰიუზს ნანატრი 3 ქულა მოუტანა.

ბევრი გოლი ვნახეთ "ბოლეინ გრაუნდზეც", სადაც "ვესტ ჰემი" მორიგ საშინაო მარცხთან იყო ძალიან ახლოს. "ნორვიჩი" მშვენივრად ბურთაობდა, ნათან რედმონდმა ისევ გაიტანა და ყველაფერი "იადონების" გეგმით მიდიოდა, მაგრამ მათ წამები დააკლდათ, შეიხუ კუიატემ გათანაბრება მოახერხა - 2:2.

"საუთჰემპტონმა" ძალიან ადვილად აჯობა "სუონსის" და, წესით, რონალდ კუმანის ბიჭებმა ნელ-ნელა უნდა ამოიწიონ. ხოლო კვირის ეულ შეხვედრაში იოან კაბაის პენალტით "კრისტალ პალასმა" 3 ქულა გამოგლიჯა "უოტფორდს", რომელიც მიმდინარე სეზონში მხოლოდ მეორედ დამარცხდა და პირველად უშუალოდ საკუთარ კედლებში.

VII ტური
26 სექტემბერი
ტოტენჰემი-სიტი 4:1
გოლები: 0:1 დე ბრუინი (25), 1:1 დაიერი (45), 2:1 ალდერვეირელდი (50), 3:1 კეინი (61), 4:1 ლამელა (79)
ტოტენჰემი (4-2-3-1): ლორისი - უოკერი, ალდერვეირელდი, ვერტონგენი, დეივისი - დაიერი, ალი - სონი (77. ნ’ჟიე), ლამელა (87. კეროლი), ერიკსენი (68. შადლი) - კეინი
სიტი (4-2-3-1): კაბალიერო - სანია, ოტამენდი, დემიკელისი, კოლაროვი - ფერნანდინიო (69. ნასრი), ფერნანდო - იაია ტურე (56. ნავასი), დე ბრუინი, სტერლინგი - აგუერო (86. რობერტსი)
გაფრთხილება: ლამელა, დაიერი, ერიკსენი, ალი, კეინი - დემიკელისი
კუთხური: 5-9 ჯარიმა: 17-6 თამაშგარე: 5-3 კარში დარტყმა: 15(8)-22(8) ბურთის ფლობა: 47%-53%
მაყურებელი: 35 867

მანჩესტერი-სანდერლენდი 3:0
გოლები: 1:0 დეპაი (45+4), 2:0 რუნი (46), 3:0 მატა (3:0)
მანჩესტერი (4-2-3-1): დე ხეა - ვალენსია, სმოლინგი, ბლინდი (74. ფ. ჯონსი), დარმიანი - კერიკი (68. შვაინშტაიგერი), შნეიდერლენი - მატა, დეპაი (77. იანგი), რუნი - მარსიალი
სანდერლენდი (4-1-4-1): პანტილიმონი - ბ. ჯონსი, ო’ში, ქაბული, ვან ანჰოლტი - კატერმოლი - მ’ვილა, ლენსი, ტოივონენი (70. ლარსონი), ჯონსონი (46. ფლეტჩერი) - ბორინი
გაფრთხილება: - ჯონსონი, ბ. ჯონსი, კატერმოლი
კუთხური: 5-2 ჯარიმა: 12-17 თამაშგარე: 0-0 კარში დარტყმა: 12(7)-9(4) ბურთის ფლობა: 63%-37%
მაყურებელი: 75 328

ლივერპული-ასტონ ვილა 3:2
გოლები: 1:0 მილნერი (2), 2:0 სტარიჯი (59), 2:1 ჟესტედი (66), 3:1 სტარიჯი (67), 3:2 ჟესტედი (71)
ლივერპული (3-4-1-2): მინოლე - ჯანი, შკრტელი, სახო - კლაინი, ლუკასი, მილნერი, მორენო - კოუტინიო - ინგსი, სტარიჯი (90+4. ალენი)
ასტონ ვილა (4-3-3): გუზანი - ჰატონი, რიჩარდსი, ლესკოტი, ამავი - სანჩესი (60. ვერეტო), ვესტვუდი. გეიე - გრილიში (69. ტრაორე), სინკლერი, ჟესტედი
გაფრთხილება: ოლბრაიტონი, დაიერი - ამავი
კუთხური: 11-1 ჯარიმა: 2-9 თამაშგარე: 3-1 კარში დარტყმა: 21(12)-10(4) ბურთის ფლობა: 49%-51%
მაყურებელი: 44 228

ლესტერი-არსენალი 2:5
გოლები: 1:0 ვარდი (13), 1:1 უოლკოტი (18), 1:2 სანჩესი (33), 1:3 სანჩესი (57), 1:4 სანჩესი (81), 2:4 ვარდი (89), 2:5 ჟირუ (90+3)
ლესტერი (4-4-2): შმეიხელი - დე ლაეტი, ჰუტი, მორგანი, შლუპი - მაჰრეზი, ოლბრაიტონი (64. ულოა), კანტე, დრინკვოტერი (78. კრამარიჩი) - ვარდი, ოკაზაკი (46. კინგი)
არსენალი (4-2-3-1): ჩეხი - ბელერინი, მერტეზაკერი, კოშელნი, მონრეალი - კასორლა, ფლამინი (21. არტეტა) - რემზი (77. ოქსლეიდ-ჩემბერლენი), იოზილი, სანჩესი - უოლკოტი (80. ჟირუ)
გაფრთხილება: დრინკვოტერი - არტეტა
კუთხური: 6-5 ჯარიმა: 9-12 თამაშგარე: 0-2 კარში დარტყმა: 16(7)-26(12) ბურთის ფლობა: 49%-51%
მაყურებელი: 32 047

საუთჰემპტონი-სუონსი 3:1
გოლები: 1:0 ვან დეიკი (11), 2:0 ტადიჩი (54), 3:0 მანე (61), 3:1 (სიგურდსონი (83-პენ.)
საუთჰემპტონი (4-2-3-1): სტეკელენბურგი - სედრიკი, ფონტე, ვან დეიკი, ბერტრანი - უორდ-პრაუსი, ვანიამა - დევისი (63. რომეუ), ტადიჩი (74. ჯეი როდრიგესი), მანე (86. ხუანმი) - პელე
სუონსი (4-3-2-1): ფაბიანსკი - ნოტონი, ფ. ფერნანდესი, უილიამსი, ტეილორი - შელვი (80. ბრიტონი), კორკი (46. მონტერო), კი - სიგურდსონი, ა. აიუ - გომისი (46. ედერი)
გაფრთხილება: ვანიამა, რომეუ, ფონტე - შელვი
კუთხური: 4-3 ჯარიმა: 18-14 თამაშგარე: 6-3 კარში დარტყმა: 18(7)-11(4) ბურთის ფლობა: 44%-56%
მაყურებელი: 30 704

სტოკი-ბორნმუთი 2:1
გოლები: 1:0 უოლტერსი (32), 1:1 გოსლინგი (76), 2:1 დიუფი (83)
სტოკი (4-2-3-1): ბატლენდი - ჯონსონი, კამერონი, ვოლშაიდი, პიტერსი - ადამი (75. ვან გინკელი), უელანი - ბოიანი (62. დიუფი), შაქირი (45+9), არნაუტოვიჩი - უოლტერსი
ბორნმუთი (4-4-1-1): ბორუცი - ფრენსისი, კუკი, დისტენი, დენიელსი - რიტჩი, გოსლინგი, სურმენი, პიუ (87. სმიტი) - ტომლინი (71. კინგი) - უილსონი (17. მარეი)
გაფრთხილება: უელანი -
კუთხური: 3-7 ჯარიმა: 13-11 თამაშგარე: 2-4 კარში დარტყმა: 8(5)-11(6) ბურთის ფლობა: 44%-56%
მაყურებელი: 27 742

ვესტ ჰემი-ნორვიჩი 2:2
გოლები: 0:1 ბრედი (9), 1:1 სახო (33), 1:2 რედმონდი (83), 2:2 კუიატე (90+3)
ვესტ ჰემი (4-2-3-1): ადრიანი - ჯენკინსონი, ტომკინსი, რიდი, კრისუელი - კუიატე, ნოუბლი (85. სარატე) - მოზესი (57. ობიანგი), სარატე, ლანსინი (72. კეროლი) - სახო
ნორვიჩი (4-2-3-1): რადი - უიტეკერი, მარტინი, ბასონგი, ოლსონი - დორანსი (69. რედმონდი), ტეტი - ბრედი, ჰულაჰანი (85. ო’ნილი), ჰოუსონი - ჯერომი (64. მბოკანი)
გაფრთხილება: -
კუთხური: 7-5 ჯარიმა: 2-11 თამაშგარე: 3-0 კარში დარტყმა: 19(7)-16(7) ბურთის ფლობა: 48%-52%
მაყურებელი: 34 837

ნიუკასლი-ჩელსი 2:2
გოლები: 1:0 ა. პერესი (42), 2:0 ვეინალდუმი (60), 2:1 რამირესი (79), 2:2 ვილიანი (86)
ნიუკასლი (4-4-2): კრული - იანმაატი, მბემბა, კოლოჩინი, მბამბუ - სისოკო (90+2. დე იონგი), კოლბეკი (54. ობერტანი), ანიტა, ვეინალდუმი - პერესი, მიტროვიჩი (85. ტონი)
ჩელსი (4-2-3-1): ბეგოვიჩი - ივანოვიჩი, კეჰილი, ზუმა, ასპილიკუეტა - ფაბრეგასი, მატიჩი (61. ვილიანი) - პედრო, ოსკარი (73. რამირესი), აზარი - რემი (61. ფალკაო)
გაფრთხილება: კოლბეკი - ივანოვიჩი, პედრო
კუთხური: 4-6 ჯარიმა: 12-15 თამაშგარე: 1-3 კარში დარტყმა: 11(5)-16(4) ბურთის ფლობა: 38%-62%
მაყურებელი: 48 682

27 სექტემბერი
უოტფორდი-კრ. პალასი 0:1
გოლი: 0:1 კაბაი (71-პენ.)
უოტფორდი (4-4-2): გომესი - ნიომი (75. აკე), პრიოდლი, კატკარტი, ანია - კაპუ, აბდი (64. ბერგუისი), უოტსონი (82. იბარბო), ხურადო - იგალო, დინი
კრ. პალასი (4-2-3-1): ჰენესი - კელი, დანი, ჰანგელანდი, სუარე - კაბაი (77. მაკარტური), ლედლი - პანჩონი, საკო (62. ზაჰა), ბოლაზი - გეილი (85. კემპბელი)
გაფრთხილება: აბდი, ხურადი, პრიოდლი, კატკარტი - კაბაი, პანჩონი, ზაჰა, ჰენესი
კუთხური: 6-4 ჯარიმა: 17-22 თამაშგარე: 0-0 კარში დარტყმა: 15(2)-16(3) ბურთის ფლობა: 54%-46%
მაყურებელი: 20 057

28 სექტემბერი
ვესტ ბრომვიჩი-ევერტონი 23:00

ბომბარდირები: 6 - ჯეიმი ვარდი (ლესტერი); 5 - რიად მაჰრეზი (ლესტერი), კალუმ უილსონი (ბორნმუთი)

მომდევნო ტური
3 ოქტომბერი:
კრ. პალასი-ვესტ ბრომვიჩი, ნორვიჩი-ლესტერი, სიტი-ნიუკასლი, ასტონ ვილა-სტოკი, ბორნმუთი-უოტფორდი, სანდერლენდი-ვესტ ჰემი, ჩელსი-საუთჰემპტონი

4 ოქტომბერი:
ევერტონი-ლივერპული, არსენალი-მანჩესტერი, სუონსი-ტოტენჰემი.

ყოველდღიური სპორტული გაზეთი "ლელო"