იაია ტურე: როცა ეს ვთქვი, ჟურნალისტებმა, არა, ისინი ცხოველები არიან, დამცინეს

"მანჩესტერ სიტის" ნახევარმცველმა იაია ტურემ ჟურნალისტების მიმართ საკუთარ ცუდ დამოკიდებულებაზე ისაუბრა.

"არ მესმის, რატომ მაკრიტიკებენ ჟურნალისტები. გასულ სეზონში "სიტიმ" ჩემთან ერთად პრემიერლიგაში, მსოფლიოს ყველაზე რთულ ლიგაში მეორე ადგილი დაიკავა. იმის წინა სეზონში 26 გოლი გავიტანე, აქედან 20 პრემიერლიგაში, მაგრამ ამაზე არაფერი უთქვამთ.

გასულ სეზონში ნაკრებში გამგზავრება მომიწია აფრიკის თასზე. დაახლოებით 2 თვე გამიცდა და ამის შემდეგ მაკრიტიკებენ, რომ იმდენი არ გავიტანე, რამდენიც წინა წელს.

ვფიქრობ, ახლა გესმით ჩემი, თუ რატომ მაქვს ცუდი დამოკიდებულება ჟურნალისტების მიმართ. როცა ცუდად ითამაშებ, ბრიტანელი ჟურნალისტები თითოეულ შენს ქმედებას განიხილავენ. თუ კარგად ითამაშე, ისინი, უბრალოდ, ჩუმად არიან.

ისინი ყოველთვის იყენებდნენ ბინძურ ხრიკებს, რომ მწყობრიდან გამოვეყვანე. ხშირად ვგრძნობდი თავს უკმაყოფილოდ, ძალიან უკმაყოფილოდ.

2010 წელს, როცა "სიტიში" გადავედი, ჩემზე ამბობდნენ, რომ ფეხბურთს მოვკლავდი.

ისინი ჩემს ხელფასს განიხილავდნენ და მას სამარცხვინოს უწოდებდნენ, მაგრამ მე მოვედი "სიტიში", რომ კლუბს განვითარებასა და ტიტულების მოპოვებაში დავხმარებოდი, მაგრამ ადამიანებმა, არა, მაგათზე ადამიანებიც არ ითქმის, ცხოველებმა დამცინეს, როცა ეს ვთქვი.

მათ ვერ წარმოედგინათ, რომ ამ კლუბის შეცვლა შემეძლო. და რა იყო შემდეგ? მოვიგეთ თითქმის ყველაფერი, რაც შეგვეძლო.

საერთოდ, ამ პროფესიის ადამიანები დიდი ჭკუით არ გამოირჩევიან. ამიტომ არ მაქვს ჩვევაში, შოკირებული ინტერვიუები გავცე; უბრალოდ, ვამბობ იმას, რასაც ვფიქრობ.

წლები ვიტანჯებოდი ასეთი მოპყრობისგან, მაგრამ ახლა გადავწყვიტე, ყველაფერი მეთქვა.

თუმცა ბევრი გაბოროტებული ინდივიდი ჩემი სახელის ტალახში ამოსვრას ცდილობს და ჩემზე სხვადასხვა ჭორს ავრცელებს, მაგრამ ვიცი, რომ ბევრი ახალგაზრდისთვის მისაბაძი მაგალითი ვარ.

როცა შეურაცხყოფას გაყენებენ, არ შეიძლება უპასუხო, რადგან ისინი, უბრალოდ, ვერ გაგიგებენ. საბედნიეროდ, ჩემი წარმატება და სტატისტიკა ჩემ სასარგებლოდ ლაპარაკობს", - თქვა ტურემ.

მომზადებულია Goal.com-ის მიხედვით