ტიკი-ტაკა პრემიერლიგაში - რატომ გაცვალა გვარდიოლამ "ბაიერნი" "სიტიზე"?

საერთოდ, ფეხბურთელებში მიღებული არ არის იმაზე საუბარი, რაც გუნდის შიდა სამზარეულოში ხდება. ჯო ჰარტმა ეს მნიშვნელოვანი წესი დაარღვია. მან სულ ცოტა ხნის წინათ ასეთი განცხადება გააკეთა:

"გვარდიოლა? ყველამ იცის, რომ "სიტიში" მისი მოსვლა გარდაუვალია. რაც შემეხება მე, ესპანელი სპეციალისტის ხელმძღვანელობით დიდი სიამოვნებით ვითამაშებ". მან იქვე დასძინა, რომ "სიტიში" თავს შესანიშნავად გრძნობს მანუელ პელეგრინისთან ერთად, თუმცა ამას უკვე აღარანაირი მნიშვნელობა არ ჰქონდა.

გავიდა სულ ცოტა ხანი და "სიტის" ოფისიდან მოვიდა ცნობა იმის თაობაზე, რომ მომავალი სეზონიდან გუნდს სწორედ ხოსეპ გვარდიოლა გაწვრთნის. გვარდიოლას გარშემო საფეხბურთო საზოგადოებაში ჯერაც არ წყდება კამათი. ფაქტია - თუ მას ინგლისშიც ყველაფერი გამოუვიდა, მაშინ ის მართლაც დიდი ყოფილა.

ვერავინ იტყვის, რომ მანუელ პელეგრინი ცუდი მწვრთნელია, ასეთს "რეალი" და "სიტი" სამსახურს არ შესთავაზებდნენ, მაგრამ ფაქტებიც ჯიუტად ამბობს თავისას. პელეგრინი მხოლოდ იმ კლუბებში აჩვენებდა საკუთარი შესაძლებლობების მაქსიმუმს, რომლებიც ვარსკვლავებით არ იყო დაკომპლექტებული.

ამის მაგალითად ორი კლუბი გამოდგება - "მალაგა" და "ვილიარეალი". პირველი ჩემპიონთა ლიგის მეოთხედფინალში გავიდა და სასწაული ორმატჩიანი, ლამის მოგებული დუელი წააგო "დორტმუნდთან"; მეორემ კი სულაც ლიგის ნახევარფინალს უწია.

"რეალში" ჩილელს არაფერი გამოუვიდა. გუნდმა სეზონის ორი ყველაზე მნიშვნელოვანი შეხვედრა წააგო. ვერაფერი გააწყო ჩემპიონატში თავის მთავარ კონკურენტ "ბარსელონასთან", ჩემპიონთა ლიგაზე კი "ლიონს" მოუხარა ქედი.

"სიტისთან"ერთად პელეგრინიმ მოიგო ინგლისის ჩემპიონატი, მაგრამ კლუბის ხელმძღვანელობა მისგან ევროპაში წარმატებულ თამაშს ითხოვდა. ამ საქმიდან არაფერი გამოვიდა. არის კიდევ ერთი ძალიან მნიშვნელოვანი საკითხი.

ისეთი ამბიციებისა და ფინანსური შესაძლებლობების კლუბს, როგორიც "სიტია", სჭირდება მწვრთნელი - გამარჯვებული. ასეთი კი სწორედ კატალონიელი გახლავთ.

საინტერესოა, რომ გვარდიოლა ტაქტიკური სქემის მიხედვით არჩევს მისთვის საჭირო ფეხბურთელებს. "სიტიში" საძებარნი სულაც არ არიან ასეთი მოთამაშეები.

მაგალითად, პეპის ტაქტიკას კარგად უნდა მოერგოს დაცვის ლიდერი ვენსან კომპანი. სქემაში ადაპტაცია არ უნდა გაუჭირდეთ დავიდ სილვას, სერხიო აგუეროს... სამაგიეროდ, ვერ ვხედავთ გვარდიოლას გუნდში იაია ტურეს, რომელსაც პეპი "ბარსელონაში" ვერ შეეწყო.

ამასთან ერთად, უნდა ვივარაუდოთ, რომ გვარდიოლას სრული კარტ-ბლანში ექნება ახალი ფეხბურთელების შესაძენად. კლუბის ხელმძღვანელობა მას ტრანსფერებზე უარს არ ეტყვის. დიდი შანსია, "ეტიჰადზე" ახალი ვარსკვლავები გამოჩნდნენ.

"ბაიერნი" ამ შემთხვევაში ისე მოიქცა, როგორც დიდ კლუბს ეკადრება.

მიუნხენელებმა ჯერ კიდევ დეკემბერში გამოაცხადეს, რომ გუნდს გვარდიოლას წასვლის შემდეგ იტალიელი სპეციალისტი, კარლო ანჩელოტი ჩაიბარებდა.

რა არის "რეკორდმაისტერის" მთავარი ღირსება საფეხბურთო ასპარეზზე? ვფიქრობთ, ეს არის სტაბილურობა. ანჩელოტი იმ მწვრთნელთა კატეგორიას მიეკუთვნება, რომელთაც გუნდის მართვა ძალიან სტაბილურად შეუძლიათ.

თუ დავაკვირდებით მიუნხენური კლუბის ისტორიას, თითქმის ყველა მწვრთნელს რაღაც "მისეული" მოჰქონდა გუნდში. მაგალითად, იუპ ჰაინკესმა მოიტანა ფორმულა - "გამარჯვება ნებისმიერ ფასად ნებისმიერ შეხვედრაში!" მანვე "გააცოცხლა" არიენ რობენი, რომელიც უკვე გადაღლილი ჩანდა მიუნხენური ცხოვრებით.

პეპ გვარდიოლამ "ბაიერნს" სხვანაირად თამაში ასწავლა. მიუნხენური გრანდი უკვე აღარ კლავდა მოწინააღმდეგეებს თავისი წამლეკავი ძალით. "ბაიერნი" იქცა მკვლელად, რომელიც თან გეფერება და თან სამარისაკენ გისტუმრებს.

"ბაიერნში" გვარდიოლამ ჯერ ვერ მოიგო ჩემპიონთა ლიგა და "რეკორდმაისტერი" ეძებს მწვრთნელს, ვინც ეს საქმე ყველაზე მაგრად იცის. კარლო ანჩელოტი სწორედ ასეთია. ისე, შანსი პეპსაც დარჩა (ისევე, როგორც პელეგრინის "სიტიში") და ვნახოთ...

მოტივაცია

რას მიიღებს გვარდიოლა "სიტიში" გადასვლის სანაცვლოდ? თავი რომ დავანებოთ მართლაც ზღაპრულ, აქამდე სამწვრთნელო საქმეში არნახულ ანაზღაურებას, ეს მისთვის განსაკუთრებული გამოწვევაა.

პეპს საშუალება მიეცემა, საკუთარი შესაძლებლობები დაამტკიცოს "ნისლიან ალბიონზე", სადაც არაერთი გამორჩეული სპეციალისტი მუშაობს. გვარდიოლას ძალიან უნდა არსენ ვენგერთან, მაურისიო პოჩეტინოსთან, ლუი ვან გაალთან და სხვებთან ჭიდილი.

გარდა ამისა, პეპს საშუალება მიეცემა, თვისობრივად ახალ დონეზე გაიყვანოს ფეხბურთელები. ამბობენ, რომ ინგლისური კლუბის ხელმძღვანელობასთან მას უკვე აქვს მიღწეული შეთანხმება რამდენიმე ტრანსფერის თაობაზე. სულაც არის არის გამორიცხული, მალე "სიტის" ფორმა მოირგონ ჯეიმი ვარდიმ, ჯონ სტოუნსმა, ჰარი კეინმა...

კიდევ ერთი და განსაკუთრებული გამოწვევა გვარდიოლასათვის ის უნდა იყოს, რომ "მანჩესტერ სიტიში" მას შეეძლება შექმნას "ბარსელონას" ფილიალი. პეპმა ამის გაკეთება მიუნხენში სცადა, მაგრამ პროექტი ჩავარდა. "ბაიერნი" იმდენად დიდი კლუბია თავისი დიდი ისტორიით, რომ იქ ამის გაკეთება გამორიცხული იყო.
"სიტი" სხვა შემთხვევაა. "სიტიში" ამას მოითმენენ. იქ მთავარია, გუნდმა ტიტულები მოიგოს. კლუბის ხელმძღვანელობა და გულშემატკივრები ერთხმად აღნიშნავენ, რომ გუნდს ბურთი საკმარისი დროის განმავლობაში არ უჭირავს.

პეპმა "სიტი" ნაღდ გრანდად უნდა აქციოს. რა თქმა უნდა, შემადგენლობის გათვალისწინებით ინგლისური კლუბი ასეთია, მაგრამ ფული და ფეხბურთელები ნაღდი გრანდობისათვის საკმარისი არ არის.

ამას კიდევ "სხვა რამეც" სჭირდება და ეს "სხვა რამე" "სიტისათვის" პეპ გვარდიოლა უნდა იყოს. ვნახოთ, ძალიან საინტერესო იქნება.

დოსიე
ხოსეპ (პეპ) გვარდიოლა სალა
დაიბადა: 1971 წ. სანტდეპორი (ესპანეთი)
ფეხბურთელის კარიერა: 1990-2001 - ბარსელონა; 2001-02 - ბრეშა; 2002-03 - რომა; 2003 - ბრეშა; 2003-05 - ალ-აჰლი; 2005-06 - დორადოსი.
მწვრთნელის კარიერა: 2007-08 - ბარსელონა II; 2008-12 - ბარსელონა; 2013-16 - ბაიერნი; 2016-დან - მანჩესტერ სიტი.
სამწვრთნელო ტიტულები: ლა ლიგა (3), კოპა დელ რეი (2), ესპანეთის სუპერთასი (3), ჩემპიონთა ლიგა (2), ევროპის სუპერთასი (2), საკლუბო მსოფლიოს ჩემპიონატი (3), ბუნდესლიგა (2), გერმანიის თასი, გერმანიის სუპერთასი.

ყოველდღიური სპორტული გაზეთი "ლელო"