ლიგის თასი. ფინალის წინ: კლოპის პირველი თუ პელეგრინის უკანასკნელი

"უემბლიზე" სეზონის პირველი ტიტული გათამაშდება - ლიგის თასის ფინალში "ლივერპული" "მანჩესტერ სიტის" დაუპირისპირდება. ეს ტიტული შესაძლოა, პირველი იყოს იურგენ კლოპის ინგლისურ კარიერაში, ან უკანასკნელი მანუელ პელეგრინისთვის "სიტის" თავკაცის რანგში.

"მანჩესტერ სიტიმ" წაგებების სამარცხვინო სამ-მატჩიანი სერია (ბურთების სხვაობით - 3:10) კიევის "დინამოსთან" შეწყვიტა და უკრაინის დედაქალაქში ისეთი ანგარიშით (3:1) მოიგო, რომ შემდეგ ეტაპზე გასვლა აღარ უნდა გაუჭირდეს.

შესაბამისად, ამ რთულ სეზონში მანუელ პელეგრინის ბიჭებითურთ თავისუფლად შეუძლია სრულად გადმოერთოს ლიგის თასის ფინალზე, რადგან ტიტული ტიტულია და "ქალაქელებს" ეს სათქმელად მაინც გამოადგებათ, რაღაც მოვიგეთო. სხვა ტურნირებში ტიტულების მოგება "სიტის" ძალიან გაუჭირდება.

მსგავს სიტუაციაშია "ლივერპულიც". იურგენ კლოპისთვის გამარჯვების მენტალიტეტის დაბრუნება-დანერგვისთვის და მერსისაიდელთა თავდაჯერების ხარისხის აწევისთვის ლიგის თასის დასაკუთრება მშვენიერი იქნება. თანაც, ბოლო დროს "ლივერპული" ოდნავ უკეთ გამოიყურება, რაც დანიელ სტარიჯის და ფილიპე კოუტინიოს დაბრუნებას უკავშირდება, რომლებიც ნელ-ნელა, ფორმაში შედიან და რობერტო ფიმრინოსთან ერთად, მშვენიერ შემტევ ტრიოს ქმნიან.

საინტერესოა, რომ ამ გუნდების უკანასკნელი 4 ურთიერთშეხვედრიდან (იგულისხმება ოფიციალური მატჩები) 3 "ლივერპულს" აქვს მოგებული და ამ თამაშებში 17 გოლი გავიდა... მათ შორის იყო მიმდინარე სეზონის პირველი წრის მატჩი, რომელშიც "კლოპომ" პელეგრინის 4:1 მოუგო.

ასე რომ, ჩილელისთვის ფინალი პრესტიჟის საკითხიცაა. აღსანიშნავია ისიც, რომ რამდენიმე დღეში ეს გუნდები უკვე პრემიერლიგაში შეხვდებიან ერთმანეთს და იქ გაარკვევენ ურთიერთობას, ეს "ენფილდზე" მოხდება. ფინალი კი "უემბლიზეა".

კვირა. 28 თებერვალი
ლივერპული-სიტი 20:30

ყოველდღიური სპორტული გაზეთი "ლელო"