ასოციაციის თასი. მეოთხედფინალი: კოშტას ამბორი, არსენის კოშმარი [VIDEO]

"კრისტალ პალასი" 21-წლიანი პაუზის მერე პირველად გავიდა თასის ნახევარფინალში. "არწივები" კრიზისში არიან და პრემიერლიგაში ბოლოს როდის მოიგეს, თავადაც აღარ ახსოვთ, მაგრამ ჩემპიონშიპის მკვიდრ "რედინგთან" თავისის მიღწევა მაინც შეძლეს.

თუმცა ალან პარდიუს კლუბმა "მადეისკიზე" გვარიანად იწვალა. ყველაფერი 85-ე წუთზე გადაწყდა, როდესაც ჯეიკ კუპერმა იანიკ ბოლაზი წააქცია და წითელი ბარათი და პენალტი ერთად აიკიდა. კაბაიმ თერთმეტმეტრიანი გარდასახა, ხოლო მერე ფრეიზერ კემპბელმა გატეხილ მეტოქეს მეორეც შეუგდო.

ბოლოსკენ გადაწყდა ყველაფერი "გუდისონ პარკზეც", სადაც როს ბარკლი ორჯერ მოგვევლინა ასისტენტად, ხოლო რომელუ ლუკაკუმ ორჯერ უსახსოვრა გოლი ყოფილ გუნდს და "ევერტონს" შემდეგ ეტაპზე გაუძღვა.

84-ე წუთზე ანერვიულებული დიეგო კოშტა გარეთ ბერის გაექაჩა და კისერში სწვდა. ვიდეოგამეორებებზე ისე ჩანდა, რომ მან ბერის უკბინა, მაგრამ თავად ფეხბურთელები ამას უარყოფენ და გამოდის, რომ ბრაზილიელი მეტოქეს ეამბორა... ასეა თუ ისე, კოშტა გააძევეს და როგორც ჩანს, მან ბერისაც რაღაც გადასდო, რადგან ცოტა ხანში "კანფეტების" ნახევარმცველმაც გააგდებინა თავი არბიტრს.

"არსენალი" ვერ გახდება საუკუნეზე მეტი ხნის მანძილზე ის გუნდი, რომელიც პირველად მოახერხებს ასოციაციის თასის მიჯრით მესამედ მოგებას.

არსენ ვენგერმა საბრძოლო შემადგენლობით კი ითამაშა, მაგრამ კიკე სანჩეს ფლორესის კერკეტ კაკალ "უოტფორდთან" მაინც წააგო, თანაც საკუთარ "ემირატებზე". ყველაფერი მეორე ტაიმში მოხდა, ოდიონ იგალომ გარკვეული პაუზის მერე გატანა ისევ შეძლო და ნიგერიელმა უოტფორდელები წინ გაიყვანა.

ცოტა ხანში კი გედიურამ ყუმბარისებური დარტყმით დაცხრილა დავიდ ოსპინა. ორივე შემთხვევაში ასისტენტი ტროი დინი გახლდათ. "მეთოფეებმა" ერთი ის შეძლეს, რომ შეცვლაზე შესულმა დენი უელბეკმა ერთი ბურთი გაქვითა და სულ ბოლოს კიდევ ერთი მშვენიერი შანსი გაანიავა, თორემ "არსენალი" კიდევ ერთ გადათამაშებას ითამაშებდა.

სამაგიეროდ, გადათამაშება იქნება "მანჩესტერსა" და "ვესტ ჰემს" შორის. "ჩაქუჩები" "ოლდ ტრაფორდზე" დიმიტრი პაიეს ულამაზესი ჯარიმით იგებდნენ და კარგადაც გამოიყურებოდნენ, მაგრამ ანტონი მარსიალის გოლით ლუი ვან გაალის გუნდმა თამაშის გადარჩენა მოახერხა და ბოლოს კინაღამ მოიგო კიდეც.

თუმცა გაშვებულის მერე შანსი სტუმრებსაც ჰქონდათ, მაიკლ ანტონიოს დავიდ დე ხეამ საოცარი ბურთი მოუხსნა, პაიეს წაქცევისთვის კი, ლონდონელთა აზრით, აშკარა პენალტი არ დაინიშნა. ამ თამაშით "წითელ ეშმაკებს" "ბოლეინ გრაუნდზე" ძალიან გაუჭირდებათ.

რედინგი-კრ. პალასი 0:2
გოლები: 0:1 კაბაი (86-პენ.), 0:2 ფ. კემპბელი (90+4)
გაძევება: კუპერი (85. რედინგი)

ევერტონი-ჩელსი 2:0
გოლები: 1:0 ლუკაკუ (77), 2:0 ლუკაკუ (82)
გაძევება: დიეგო კოსტა (84. ჩელსი)

არსენალი-უოტფორდი 1:2
გოლები: 0:1 იგალო (50), 0:2 გედიურა (63), 1:2 უელბეკი (88)

მანჩესტერი-ვესტ ჰემი 1:1
გოლები: 0:1 პაიე (68), 1:1 მარსიალი (83)

ყოველდღიური სპორტული გაზეთი "ლელო"