პრემიერლიგა. XXXI ტურის წინ: დერბების ტური

ბოლო წლების გათვალისწინებით, მანჩესტერულ კლუბებს არნახული დღე დაუდგათ, ისინი ოთხეულში მოხვედრისთვის იბრძვიან და ესეც კითხვის ნიშნის ქვეშ დგას.

თავადაც შეგიძლიათ წარმოიდგინოთ, რამდენს ნიშნავს ახლა ეს მანჩესტერული დერბი, რომელსაც "სიტი" და "იუნაიტედი" "ეტიჰადზე" გამართავენ.

ამჟამად ორივეს არასახარბიელო პერიოდი უდგას, ორივეს საკადრო პრობლემები აწუხებს და ორივეს მთავარ მწვრთნელზე დიდი ზეწოლაა - ის, რომ მანუელ პელეგრინი მიდის ოფიციალურად დადასტრებულია, ხოლო ის, რომ ლუი ვან გალს "ოლდ ტრაფორდზე" დიდი დღე არ უწერია, ეჭვგარეშეა.

"სიტიმ" ძალიან არადამაჯერებელი სერია გამოაცხო, "ქალაქელებს" უკანასკნელი 5 ტურიდან მხოლოდ ერთხელ აქვთ გამარჯვება მოპოვებული, ისიც ბირმინგემის "ასტონ ვილასთან". თუ "სიტი" წააგებს, შესანიშნავად მოთამაშე "ვესტ ჰემს" გადასწრების შანსი მიეცემა, ხოლო "მანჩესტერი" ქულაში მოახლოვდება.

"იუნაიტედი" კი ძალიან არასტაბილურად თამაშობს, მაგრამ, თითქოს, ასეთ პრინციპულ შეხვედრებში ვან გაალს ცოტათი უმართლებს ხოლმე და ჰოლანდიელი, ალბათ, ამჯერადაც თავისი აბდაუბდა ექსპერიმენტებისა და ყისმათის იმედზე იქნება.

ნახსენებ "ვესტ ჰემს" მანჩესტერულ დერბიმდე უკვე გადატანილი ექნება ლონდონური დერბი. სლავენ ბილიჩის გუნდი მართლაც კარგია, დიმიტრი პაიე და მისი მეგობრები შესაშურად ბურთაობენ, მაგრამ "სტემფორდ ბრიჯზე" მოგება ადვილი მაინც არ იქნება.

შეიძლება "ჩელსი" ძალიან ჩამორჩება, მაგრამ ფაქტი ჯიუტია, გუს ჰიდინკი პრემიერლიგაში ჯერჯერობით არ აგებს, სარეკორდო მსვლელობის გაგრძელებაც ენდომება და თან "ლურჯებს" ამ სეზონში მეტი აღარც არაფერი დარჩენიათ ჩემპიონთა ლიგიდან და ასოციაციის თასიდან მიყოლებით გამოვარდნის შემდეგ.

კიდევ ერთმა დედაქალაქურმა გუნდმა "არსენალმა" აუცილებლად უნდა ისარგებლოს კონკურენტების ასეთი მძიმე სიტუაციითა და თამაშებით, მაგრამ ვაი რომ, არსენ ვენგერსაც არ ელოდება გასეირნება.

"მეთოფეები" "გუდისონ პარკზე" ჩადიან და "ევერტონი" კი არის სრულიად არაპროგნოზირებადი გუნდი, რომელიც კარგ სეზონს ვერ ატარებს, მაგრამ "კანფეტებმა" თუ თავიანთი თამაში დაიჭირეს ნებისმიერს გაამწარებენ, მით უმეტეს, არცთუ საუკეთესო ფორმაში მყოფ "არსენალს".

"ბობოლებზე" საუბარმა არ მიგვავიწყოს ლიდერები და ჩემპიონობისთვის მებრძოლი ორი მთავარი გუნდი. კლაუდიო რანიერის "ლესტერი" "კრისტალ პალასს" სტუმრობს, რომელსაც 12 ტურია, არ მოუგია (4 ფრე, 8 წაგება) და, თითქოს, "მელიებმა" უპრობლემოდ უნდა იმარჯვონ, მაგრამ, თავადაც ხვდებით, რომ საქმე ისე მარტივად არ იქნება, როგორც ერთი შეხედვით ჩანს. დაჭრილი "არწივები" "მელიების" დაკორტნას შეეცდებიან.

ზედიზედ სამი მოგების მერე, "ბორნმუთმა" თითქმის გაინაღდა პრემიერლიგაში დარჩენა. "ალუბლები" თავს მშვიდად და კომფორტულად გრძნობენ. თუმცა, ედი ჰაუ "ტოტენჰემისთვის" 3 ქულის ჩუქებას სულაც არ გეგმავს და მისი "ალუბლები" "უაით ჰართ ლეინზე" ბოლომდე იბრძოლებენ.

მეორე მხრივ, "დეზებს" მოგების გარდა სხვა გზა არ აქვთ, გუნდს ჩემპიონობის ისტორიული შანსი აქვს, ლესტერშირელები უფრო წინ აღარ უნდა გაუშვას და თან ამის მერე, მაურისიო პოჩეტინოს ორმაგად რთული კალენდარი აქვს - გასვლა "ლივერპულთან", შინ "მანჩესტერი" და სტუმრობა "სტოკთან".

"სუონსიმ" "ლიბერთიზე", წესით, უპრობლემოდ უნდა მოუგოს "ასტონ ვილას" და ცოტა თამამად ამოისუნთქოს. საკუთარი კედლებითა და იგალო-დინის წყვილით შეიარაღებული "უოტფორდი" მარკ ჰიუზის "სტოკს" ჩაყლაპვას უპირებს.

ბოროტი და დაუნდობელი ტონი პულისი შეეცდება კრიზისში მყოფი "ნორვიჩი" დაიბრიყვოს და მორიგი 3 ქულა ჩაიჯიბოს, მაგრამ ალექს ნილმა იცის, რომ ეს მისი ერთ-ერთი ან სულაც ბოლო შანსია. იურგენ კლოპს კი ექსსაუთჰემპტონელების ჩათვლით, თავისი ამალა "საუთჰემპტონთან" "სენტ მერიზე" საჭიდაოდ ჩაჰყავს.

ჩრდილოური დერბი

სულ ბოლოს კი კიდევ ერთი დერბი გამოვარჩიოთ, ბებერი და ტკბილი ტაინ-უირის დერბი. "სენტ ჯეიმს პარკზე" სამკვდრო-სასიცოცხლო ბრძოლა იქნება.

"სანდერლენდს" ისტორიული მსვლელობა აქვს - ზედიზედ 6-ჯერ ჰყავს "ნიუკასლი" დამარცხებული და 8 დერბია, არ აგებს. "კაჭკაჭების" თავკაცის პოსტზე კი უკვე შედგა რაფაელ ბენიტესის დებიუტი.

მის ხელში ჯორდებმა არც ისე ცუდად იომეს ლიდერ "ლესტერთან" ახლა კი თავისი სახელისა და პრესტიჟის დასაბრუნებლად პრემიერლიგაში დაბრუნებული ბენიტესი პრესტიჟული გამარჯვების მოპოვებას ეცდება, რაც შეიძლება მისი გუნდისთვის გარდამტეხი გამოდგეს.

შეგახსენებთ, რომ "სანდერლენდის" ბოლო ოთხმა მწვრთნელმა თავისი სადებიუტო მატჩი წააგო, მეორე შეხვედრა კი "ნიუკასლთან" დებრი იყო ხოლმე და იმ მატჩს სპეციალისტები იგებდნენ. "შავი კატების" ბანაკში დამკვიდრებული ეს "ზაზუნას დღე" ახლა რაფამ ნიუკასლელებისკენ უნდა გადმოჭიმოს.

შაბათი. 19 მარტი
ევერტონი-არსენალი 16:45
დისკვალიფიკაცია: არავინ
ტრავმა: კლევერლი, გიბსონი, ბრაუნინგი, ჰიბერტი - კოშელნი, კასორლა, ჩეხი, უილშირი, რემზი, ოქსლეიდ-ჩემბერლენი, ჯენკინსონი
ბოლო 6 მატჩი
+3 =0 -3 +2 =2 -2
ურთიერთშეხვედრები
სულ 189 თამაში: +55 =42 -92 (229-309)

კრ. პალასი-ლესტერი 19:00
დისკვალიფიკა: არავინ
ტრავმა: ვიქჰემი, მაკარტური -
ბოლო 6 მატჩი
+0 =2 -4 +4 =1 -1
ურთიერთშეხვედრები
სულ 13 თამაში: +5 =4 -4 (12-11)

ვესტ ბრომვიჩი-ნორვიჩი 19:00
დისკვალიფიკაცია: არავინ
ტრავმა: ევანსი, ბრანტი - ბრეიდი, ნეისმიტი, უისდომი, ტეტი
ბოლო 6 მატჩი
+3 =2 -1 +0 =2 -4
ურთიერთშეხვედრები
სულ 27 თამაში: +10 =7 -10 (27-28)

უოტფორდი-სტოკი 19:00
დისკვალიფიკაცია: არავინ
ტრავმა: ეკსტრანდი, ჯილმარტინი - ჯონსონი, გივენი, უილსონი
ბოლო 6 მატჩი
+1 =2 -3 +3 =1 -2
ურთიერთშეხვედრები
სულ 7 თამაში: +6 =0 -1 (14-5)

ჩელსი-ვესტ ჰემი 19:00
დისკვალიფიკაცია: არავინ
ტრავმა: ტერი, ფალკაო, ზუმა -
ბოლო 6 მატჩი
+3 =3 -0 +4 =1 -1
ურთიერთშეხვედრები
სულ 89 თამაში: +37 =18 -34 (146-137)

სუონსი-ასტონ ვილა 21:30
დისკვალიფიკაცია: არავინ
ტრავმა: - გრილიში, სანჩესი, ამავი
ბოლო 6 მატჩი
+2 =1 -3 +1 =0 -5
ურთიერთშეხვედრები
სულ 13 თამაში: +7 =3 -3 (2-2)

კვირა. 20 მარტი
საუთჰემპტონი-ლივერპული 17:30
დისკვალიფიკაცია: არავინ
ტრავმა: ოსტინი, გარდოში, როდრიგესი - როსიტერი, ლუკასი, გომესი, ინგსი
ბოლო 6 მატჩი
+3 =1 -2 +4 =1 -1
ურთიერთშეხვედრები
სულ 77 თამაში: +20 =19 -38 (85-119)

ნიუკასლი-სანდერლენდი 17:30
დისკვალიფიკაცია: არავინ
ტრავმა: კოლოჩინი, ტონი, მბემბა, მბაბუ, სისე, აიდარა, კრული - კატერმოლი, უოტმორი, ლენსი
ბოლო 6 მატჩი
+1 =0 -5 +1 =3 -2
ურთიერთშეხვედრები
სულ 125 თამაში: +46 =36 -43 (194-192)

ტოტენჰემი-ბორნმუთი 20:00
დისკვალიფიკაცია: არავინ
ტრავმა: ვერტონგენი, ნ’ჟიე - არტერი, სტანისლასი, უილსონი, მინგსი
ბოლო 6 მატჩი
+4 =1 -1 +3 =1 -2
ურთიერთშეხვედრები
სულ 1 თამაში: +1 =0 -0 (5-1)

სიტი-მანჩესტერი 20:00
დისკვალიფიკაცია: არავინ
ტრავმა: იაია ტურე, დელფი, ნასრი, დე ბრუინი - ლავი, ბორტვიკ-ჯექსონი, კინი, რუნი, ჯონსი, იანგი
ბოლო 6 მატჩი
+2 =1 -3 +3 =1 -2
ურთიერთშეხვედრები
სულ 141 თამაში: +41 =46 -54 (196-198)

ბომბარდირები: 19 - ჯეიმი ვარდი (ლესტერი), ჰარი კეინი (ტოტენჰემი); 18 - რომელუ ლუკაკუ (ევერტონი); 16 - სერხიო აგუერო (სიტი); 15 - რიად მაჰრეზი (ლესტერი); 14 - ოდიონ იგალო (უოტფორდი); 12 - ოლივიე ჟირუ (არსენალი); 11 - ჯერმინ დეფო (სანდერლენდი), დიეგო კოსტა (ჩელსი); 10 - მარკო არნაუტოვიჩი (სტოკი).

ყოველდღიური სპორტული გაზეთი "ლელო"