2016 წლის ზაფხულის მთავარი სატრანსფერო ინტრიგა დასრულებულია - 9 აგვისტოს პოლ პოგბამ "მანჩესტერ იუნაიტედთან" 5-წლიანი კონტრაქტი გააფორმა. პოგბა "იუნაიტედში" 6-ნომრიანი მაისურით ითამაშებს.ხელშეკრულების ვადის ამოწურვის შემდეგ მხარეები დასხდებიან და იმსჯელებენ, ღირს თუ არა დამატებით კიდევ ერთწლიანი თანამშრომლობა.
მაგრამ იქამდე ბევრი წყალი ჩაივლის და ახლა ჯერ ისაა მთავარი, 23 წლის ფრანგმა სუპერვარსკვლავმა იმედები და "იუნაიტედის" ასტრონომიული დანახარჯი (89.5 მილიონი გირვანქა) გაამართლოს.
"მანჩესტერ იუნაიტედი" მოხარულია, გაუწყოთ, რომ პოლ პოგბამ სრულყო მისი ტრანსფერი "იუვენტუსიდან", - ვკითხულობთ ოფიციალურ პრესრელიზში.
თავის მხრივ, "იუვენტუსის" ვებგვერდმაც აუწყა
არ დაგავიწყდეთ, ლაპარაკია ფეხბურთელზე, რომელიც რამდენიმე წლის წინ, სერ ალექს ფერგიუსონის დროს, უკვე იყო "მანჩესტერ იუნაიტედში" და სულ რაღაც 7 მატჩი ჩაატარა.
18 წლის ბიჭში პერსპექტივა რომ ვერ დაინახეს, ადგნენ და "იუვენტუსს" 800 ათას ფუნტად დაუთმეს, გუშინ კი ერთ დროს დაწუნებული ფეხბურთელი თავადვე აქციეს მსოფლიოს უძვირეს ვარსკვლავად.
გაირკვა, რომ პოგბა "იუნაიტედში" წლიურად 13 მილიონ ევროს მიიღებს. სატრანსფერო თანხასთან შედარებით, ეს ვერ არის მაინცდამაინც შთამბეჭდავი მაჩვენებელი, თუ გავითვალისწინებთ, რომ ფრანგზე მაღალანაზღაურებადი ფეხბურთელი შვიდია საფეხბურთო პლანეტაზე.
აი, იმ მოთამაშეთა ათეულიც, ყველაზე დიდი ჯამაგირი რომ აქვთ (მითითებულია წლიური ხელფასი ევროებში):
ფეხბურთელი კლუბი ხელფ
კრიშტიანო რონალდო რეალი 21,0 მლნ
ლიონელ მესი ბარსელონა 20,0 მლნ
ჰალკი შანხაი ჩინ. 20,0 მლნ
ნეიმარი ბარსელონა 19,0 მლნ
ზლატან იბრაჰიმოვიჩი მანჩესტერი 16,0 მლნ
გრაციანო პელე შანდონგი ჩინ. 16,0 მლნ
თომას მიულერი ბაიერნი 13,5 მლნ
პოლ პოგბა მანჩესტერი 13,0 მლნ
ესეკილ ლავეცი ჰებეი ჩინ. 13,0 მლნ
ჯექსონ მარტინესი გუანჯოუ ჩინ. 12,0 მლნ
გიორგი ნინიძე
(იბეჭდება მცირე ცვლილებით)
ყოველდღიური სპორტული გაზეთი "ლელო"
