მატჩის პერიპეტიების აღწერას აღარ მოვყვებით და მხოლოდ რამდენიმე ფაქტზე გავამახვილებთ ყურადღებას. შესანიშნავად ითამაშა მირალემ პიანიჩმა და გარდა იმისა, რომ მოედნის ცენტრის სრული ბატონი იყო, ორი გოლი მიითვალა აქტივში. განსაკუთრებით ეფექტური მისი მეორე, "რომასთვის" კი მეოთხე გოლი იყო, როდესაც საჯარიმო დარტყმით ბურთი ცხრიანში მოათავსა.
რომაელთა შორის ჟერვინიოც უნდა გამოვარჩიოთ, რომელმაც რამდენიმე შთამბეჭდავი სოლო-რეიდი მოაწყო. ყველაფერს რომ თავი დავანებოთ, ანგარიში სწორედ მან გახსნა. და, რა თქმა უნდა, ფრანჩესკო ტოტი, რომელიც ჩვეულად დირიჟორობდა საკუთარი გუნდის თამაშს და არიგებდა ჩინებულ პასებს.
ტოტიმ საგოლე გადაცემა მიითვალა აქტივში, როდესაც ორ მეტოქესთან ჭიდილში შეინარჩუნა ბურთი და წაქცეულმა დაუგორა დასარტყმელად პიანიჩს. მოკლედ, "რომას" შეტევამ ივარგა, თუმცა შეტევით ფაზაში მცველმაც იყოჩაღა და ეს მცველი ჰოლებასი გახლავთ - მეორე ტაიმი ახალი დაწყებული იყო, როდესაც მარცხენა ფრთა გაარღვია, ორ მეტოქეს აუარა გვერდი და უძლიერესი დარტყმით ცხრიანი დალაშქრა.
მოკლედ, "სტადიო ოლიმპიკოზე" შეკრებილმა გულშემატკივრებმა კარგი სანახაობა იხილეს, მატჩის შემდეგ კი მწვრთნელებმა კომენტარები ჩამოარიგეს...
რუდი გარსია (რომა): "ცსკა-სთან მატჩი ცუდად ჩავატარეთ და დასანანი ქულები დავკარგეთ. მაშინვე ვთქვი, რომ თავის მართლებას არ ვაპირებდი და ჩვენი პასუხი მოედანზე გამოჩნდებოდა. ჩვენ ეს შევძელით და ყველას დავანახვეთ, რომ ბევრად უკეთ შეგვიძლია თამაში.
რამდენჯერაც ტემპს მოვუმატეთ, მეტოქე გამოუვალ მდგომარეობაში ჩავარდა. "ინტერი" ძლიერი გუნდია და ასეთ უპირატესობას არც ველოდი. მადლობა შეგირდებს, რომლებსაც თავი არ დაუზოგავთ, თუმცა ჩვენ მეტი შეგვიძლია".
რობერტო მანჩინი (ინტერი): "საინტერესო თამაში იყო, რომლისგანაც სწორი დასკვნები უნდა გამოვიტანოთ. პერიოდულად კარგად ვთამაშობდით, მაგრამ უმეტეს შემთხვევაში, მეტოქე გვჯობდა. ეს არცაა გასაკვირი, რადგან რუდი გარსია დიდი ხანია, ამ გუნდს აკეთებს, ჩვენ კი ჩამოყალიბების სტადიაში ვართ.
ყველა კომპონენტში უნდა მოვუმატოთ, რომ ასეთ ძლიერ გუნდებს ტოლ-სწორად ვეპაექროთ. ჩემპიონატის დასრულებამდე დიდი დროა დარჩენილი და კიდევ გვაქვს შანსი, რომ მესამე ადგილისთვის ვიბრძოლოთ".
მანჩინის მაცარი შემოელანძღა
მეორე დღეს რობერტო მანჩინი კიდევ ერთხელ გაესაუბრა ჟურნალისტებს და განაცხადა, რომ "ინტერი" ჯერ გუნდად უნდა აქციოს და შემდეგ ძლიერ გუნდად. ეს სიტყვათა თამაში ვალტერ მაცარის კრიტიკაა, რადგან მანჩინის თქმით, მას მძიმე მემკვიდრეობა ერგო...რას აკეთებდა მაცარი "ინტერში" წელიწადნახევრის განმავლობაში? - რისთვის აიღო მილიონები, თუ ისიც ვერ შეძლო, რომ რობერტო მანჩინისთვის გუნდი გადაებარებინა? - "გაძეტა დელო სპორტმა" ეს თემა აიტაცა და თავად მაცარის შეეხმიანა, მისი პასუხი კი ასეთია:
"არ ვიცი, რა განცხადება გააკეთა მანჩინიმ, მაგრამ "ინტერში" მუშაობისას თავი არ დამიზოგავს. შესაძლოა, ნელი ტემპით, მაგრამ მაინც ვპროგრესირებდით და დარწმუნებული ვარ, შედეგი მალე მოვიდოდა. "ინტერი" ერთ მუშტად შეკრული გუნდია, დაბალანსებული შემადგენლობით და ტაქტიკურად ორგანიზებული - ვინც ამას ვერ დაინახავს, მისი პრობლემაა. რობერტო მანჩინი კარგი მწვრთნელია და მას წარმატებას ვუსურვებ".
ყოველდღიური სპორტული გაზეთი "ლელო"
