იტალიის თასი. 1/2 ფინალი. I მატჩი: ფრე "ნაპოლის" სასარგებლოდ

იტალიის თასის ფორმატი ისეა შედგენილი, რომ ერთადერთი ეტაპი, როდესაც გუნდები 2-მატჩიან დუელში ავლენენ გამარჯვებულს, ნახევარფინალია.

სხვა შემთხვევებში, უპირატესობა მასპინძლებს ეძლევათ, რადგან მომდევნო ეტაპზე გამსვლელი იმავე მატჩში ირკვევა - აი, ფინალში მოსახვედრად უკვე თანაბარ პირობებში უწევთ გუნდებს ბრძოლა.

ნახევარფინალური ეტაპის პირველი მატჩი "სტადიო ოლიმპიკოზე" გაიმართა, სადაც "ლაციომ" "ნაპოლის" უმასპინძლა. მატჩი თანაბარი გამოდგა და ორივე კართან სახიფათო მომენტები დაახლოებით თანაბარი ოდენობით შეიქმნა. გუნდებმა თითო გოლი გაცვალეს და შედეგიც სრულიად ლოგიკური დადგა.

ანგარიში "ლაციომ" გახსნა, როდესაც სიღრმიდან წამოწყებული იერიში ფელიპე ანდერსონის ბრწყინვალე პასით და მიროსლავ კლოზეს უზუსტესი დარტყმით დასრულდა - 1:0.

რაც შეეხება "ნაპოლის" გოლს, ასევე ეფექტური გამოდგა - გონსალო იგუაინმა გრძელი გადაცემა მიიღო, მეკარე მოატყუა და კარში სცადა დარტყმა, თუმცა ბურთი მანოლო გაბიადინის მიუგორდა და ცარიელი კარის წინ დარჩენილ ფორვარდს ანგარიშის გაქვითვა აღარ გასჭირვებია - 1:1.

ეს ამბავი 57-ე წუთზე მოხდა და გამომდინარე იქიდან, რომ ეს შედეგი სტუმრებს აძლევდათ ხელს, მატჩის დასკვნითი ნაწილი უფრო მასპინძელთა უპირატესობით წარიმართა. თუმცა, კიდევ ერთხელ აღვნიშნოთ, რომ მთლიანობაში, მატჩი მაინც თანაბარი იყო და შედეგი - ლოგიკური.

განმეორებითი პაექრობის წინ ფავორიტად "ნაპოლი" მოჩანს, მაგრამ არც "ლაციოა" უშანსოდ და წესით, ნეაპოლში ძალიან საინტერესო თამაში უნდა გაჩაღდეს. სწორედ ამის მოლოდინში არიან მწვრთნელებიც...

სტეფანო პიოლი ("ლაციოს" მწვრთნელი): "რთული მატჩი იყო, რომელიც მეტოქისთვის სასურველი შედეგით დასრულდა. თუმცა, მე კმაყოფილი ვარ შეგირდთა თამაშით და მჯერა, რომ ფინალში გასვლის კარგი შანსი გვაქვს. უამრავი ფეხბურთელი გვყავს ტრავმირებული, რამდენიმე მალე დაგვიბრუნდება და კიდევ უკეთ ავთამაშდებით. თასის ფინალში გასვლა ჩვენთვის უმნიშვნელოვანესია. ვფიქრობ, წინ საუცხოო მატჩი გველის".

რაფაელ ბენიტესი ("ნაპოლის" მწვრთნელი): "ძალიან მნიშვნელოვანი გოლი გავიტანეთ, უპირატესობა მოვიპოვეთ და ეს აუცილებლად უნდა გამოვიყენოთ. მართალია, უკვე წინ ვართ, მაგრამ თუ ნეაპოლში ამ უპირატესობის შენარჩუნებისთვის ვითამაშებთ, აუცილებლად დავისჯებით. ჩვენი მიზანი ფინალში გასვლაა, ამისთვის კი მოგებაა საჭირო".

ლაციო-ნაპოლი 1:1
გოლები: 1:0 კლოზე (33), 1:1 გაბიადინი (57)

საპასუხო მატჩი - 8 აპრილს.

ყოველდღიური სპორტული გაზეთი "ლელო"