მაურო იკარდი: "ინტერის" ფანი ვარ

ბოლო დღეებში, სულ უფრო აქტიურად იწერება მაურო იკარდის "ინტერიდან" შესაძლო აბარგების შესახებ. 22 წლის ფორვარდი არაერთ კლუბს დაუკავშირეს და მათ შორის, ლონდონის "არსენალს".

ამ თემაზე კომენტარი იკარდის მეუღლემ და ამავდროულად, პირადმა აგენტმა ვანდამ გააკეთა და განაცხადა, რომ მაურო ინტერესით განიხილავდა ყველა შეთავაზებას. მოკლედ, იკარდის წასვლის შანსები ძვირად ფასობდა, მაგრამ ამ თემაზე კომენტარი თავად ფეხბურთელმა გააკეთა და განაცხადა, რომ სურს მილანში კიდევ დიდხანს დარჩეს:

"მე "ინტერის" ფანი ვარ, ეს ჩემი კლუბია და მსურს, აქ რაც შეიძლება დიდხანს დავრჩე. მილანში ბედნიერი ვარ მეც და ბედნიერია ჩემი ოჯახიც. "ინტერში" უკვე სამი წელია ვთამაშობ და მსურს, რომ სწორედ ამ გუნდთან ერთად მოვიგო ტიტულები. მინდა "ნერაძურის" კაპიტანი ვიყო და ამ გუნდის ისტორიაში ჩემი კვალი დავტოვო. ფეხბურთი ბიზნესია და გასაკვირი არაა, რომ კლუბის მესვეურებთან კონტრაქტის პირობებზე მიწევს საუბარი, მაგრამ ეს იმას არ ნიშნავს, რომ "ინტერიდან" აბარგებას ვაპირებ.

მილანში ბედნიერი ვარ და არსად წასვლა არ მსურს. ვფიქრობ, ახალ სეზონში ჩვენ შეგვიძლია არათუ ჩემპიონთა ლიგის საგზურისთვის ბრძოლა, არამედ სკუდეტოს მოგება. მართალია, "იუვენტუსი" ძალიან ძლიერია, მაგრამ სწორი მუშაობით და მაქსიმალური მონდომებით, ჩემპიონატის პირველ ადგილზე დასრულება შესაძლებელია".

ყოველდღიური სპორტული გაზეთი "ლელო"