დიდი აურზაური იკარდის წიგნის გამო - მაუროს კლუბშიც ერჩიან და ნაკრებშიც

დიდ უსიამოვნებაში გაეხვა "ინტერის" არგენტინელი ლეგიონერი მაურო იკარდი, რომელიც ამავდროულად, გუნდის კაპიტანია... როგორც ჩანს, უკვე მომდევნო შეხვედრაში მას სამკლაურის გარეშე მოუწევს მოედანზე გასვლა.

დიახ, დიდი ალბათობით, 23 წლის თავდამსხმელი "ნერაძურის" კაპიტანი აღარ იქნება და ეს მხოლოდ საკუთარ თავს უნდა დააბრალოს.

ყველასთვის მოულოდნელად, მაურო იკარდიმ 23 წლის ასაკში გადაწყვიტა, რომ პირველი ავტობიოგრაფიული წიგნი გამოეცა. მაურომ დეტალებში აღწერა თუ, როგორ დაიწყო მისი და ვანდა ნარას რომანი, რომელსაც ქვემოთ დავუბრუნდებით, თუმცა ულტრასების აღშფოთება იმ თავმა გამოიწვია, სადაც ის სწორედ მათთან დაპირისპირების დეტალებს იხსენებს - მაურო წერს, რომ 2015 წლის თებერვალში, "სასუოლოსთან" მარცხის შემდეგ, ის ულტრასების სექტორთან მივიდა და თავისი მაისურა ბავშვს უსახსოვრა, თუმცა ტიფოზების ლიდერმა ეს მაისურა გამოგლიჯა ხელიდან და იკარდის ესროლა.

ამას მაუროს აღშფოთება მოჰყვა და ის ღია დაპირისპირებაში შევიდა გულშემატკივრებთან, რამაც, როგორც წიგნიდან იკვეთება, ის სიამაყით აავსო და როგორც თვოთონვე წერს, ამან მისი თანაგუნდელების აღფრთოვანებაც გამოიწვია. შემდეგ, იკარდი კიდევ უფრო უცნაურ განცხადებას აკეთებს და პირდაპირ მიმართავს "ინტერის" გულშემატკივრებს:

"რამდენი ხართ ჩემს მიმართ მტრულად განწყობილი: 50? 100? 200? - ჩამოვიყვან არგენტინიდან 100 მკვლელს და ისინი ყველას დაგხოცავენ".

რთულად დასაჯერებელია, რომ ფეხბუფრთელის ავტობიოგრაფიულ წიგნში მსგავსი ამბები წერია, მაგრამ რეალობას ვერსად გავექცევით - როგორც "გაძეტა დელო სპორტი" წერს, მაურო იკარდი იმაზე უფრო სულელი აღმოჩნდა, ვიდრე ეს შეიძლებოდა წარმოგვედგინა.

"ინტერის" გულშემატკივრები ამტკიცებენ, რომ იკარდიმ ყველაფერი მოიგონა და "სასუოლოსთან" მატჩის შემდეგ, მისთვის მაისურა არავის უსვრია. ბუნებრივია, ისინი განსაკუთრებით აღშფოთებულნი არიან იმით, რომ ფეხბურთელი მათ მოკვლით დაემუქრა და, როგორც თვითონვე წერს, არგენტინიდან მკვლელების ჩამოყვანას აპირებს მათთან ანგარიშის გასასწორებლად.

"კალიარისთან" მატჩის დროს, იკარდი დიდ წნეხში მოაქციეს და ობსტრუაქცია მოუწყვეს, თუმცა, როგორც ულტრასები გვპირდებიან, ეს მხოლოდ დასაწყისია - მათ იკარდის საგანგებო მიმართვა გაუგზავნეს:

"გვეგონა, რომ ბევრი სისულელე, რომელსაც აკეთებ, შენი ახალგაზრდული ასაკით იყო გამოწვეული და ზოგადად, კარგი ბიჭი ხარ, მაგრამ აშკარად ვცდებოდით. ყველა კავშირი გაწყვიტე "ინტერის" გულშემატკივრებთან და აღარ იმსახურებ გუნდის კაპიტნობას. შენ ჩვენთვის მკვდარი ხარ, რადგან მასხარა ხარ, მასხარამ კი კაპიტნის სამკლავური უნდა მოიხსნას".

"ინტერის" გულშემატკივართა აღშფოთებას მაურო იკარდიმ თავის ინსტაგრანზე გაკეთებული განცხადებით უპასუხა:

"ძვირფასო გულშემარტკივრებო, ძალიან ვწუხვარ, რომ ჩემმა წიგნმა ასეთი უარყოფითი რეზონანსი გამოიწვია. უბრალოდ მინდოდა, რომ გადმომეცა ის ემოციები, რაც მაშინ დუღდა და ის ატმოსფერო, რაც მაშინ იყო შექმნილი. გუნდს მძიმე დროება ედგა, მე კი ადრენალინი მომაწვა და გულშემატკივრებს დავუპირისპირდი. დიახ, წიგნში რაღაცეები გადავამეტე და შევალამაზე, მაგრამ ეს მხოლოდ წიგნია და მეტი არაფერი. ვწუხვარ, რომ ამ ისტორიას ასეთი ქაოსი მოჰყვა, რადგან "ინტერის" გულშემატკივრების მიმართ ყოველთვის დიდი სიყვარული მამოძრავებდა".

როგორც უკვე აღვნიშნეთ, "კალიარისთან" მატჩის დროს, ულტრასების სექტორზე იკარდის შეურაცხმყოფელი არაერთი ბანერი გამოკიდეს, მათ შორის ყველაზე დიდზე კი ასეთი წარწერა იყო: "განავლის დიდი ნაჭერი ხარ". არაა გასაკვირი, რომ ასეთ ატმოსფეროში იკარდიმ ვერ ითამაშა, გოლიც ვერ შეაგდო და თერთმერტმეტრიანიც გააფუჭა.

მატჩის შემდეგ, "ინტერის" გულშემატკივრებმა მაუროს მანქანა დააზიანეს, თვითონ ფეხბურთელმა კი კარაბინიერების თანხლებით, გაძლიერებული დაცვის ქვეშ დატოვა სტადიონი. მოგვიანებით, მაუროს სახლთან, "ნერაძურის" რამდენიმე ათეული ქომაგი შეიკრიბა, რომლებსაც ბანერი ჰქონდათ გამოფენილი შემდეგი წარწერით: "სად არიან შენი არგენტინელი მკვლელები? - თუ უკვე ჩაისვარე და არავინ აღარ ჩამოჰყავს"? - ულტრასებმა მაუროს სახლში შეჭრაც სცადეს, მაგრამ კარაბინიერებმა რამდენიმე მათგანი დააკავეს და შემდეგ, აქცია დაშალეს.

ბოლო ცნობებით, იკარდიმ პირადი დაცვა აიყვანა, მის სახლთან კი კარაბინიერებმა მორიგეობა დააწესეს. ვითარება უკიდურესად მწვავეა და რთული სათქმელია, რა გაგრძელება ექნება ამ ისტორიას...

"ინტერის" მესვეურები არ მალავენ, რომ მათთვის გულშემატკივართა აზრი განსაკუთრებულად მნიშვნელოვანია და შესაბამისად, დიდი ალბათობით, იკარდის კაპიტნის სამკლაურს ჩამოართმევენ. ამ თემაზე კომენტარი გააკეთა კლუბის ვიცე-პრეზიდენტმა ხავიერ ძანეტიმ:

"მივიღებთ თუ არა ზომებს იკარდისთან დაკავშირებით? - სამწუხაროდ, მოგვიწევს კონკრეტული ნაბიჯების გადადგმა, რადგან ჩვენთვის მთავარი სწორედ გულშემატკივრის პოზიციაა, ამ ვითარებაში კი ისინი ნამდვილად არ ტყუიან. დაუშვებელია, რომ "ინტერის" ფეხბურთელი გუნდის გულშემატკივრებზე წერდეს იმას, რაც პირადად მე წიგნში წავიკითხე და ამაზე დრო დავკარგე".

მაურო იკარდის პრობლემები აქვს არა მარტო კლუბში, არამედ ნაკრებშიც. წიგნში დეტალურად არის აღწერილი, თუ როგორ დაიწყო მისი და ვანდა ნარას რომანი. შეგახსენებთ, რომ ვანდა მაქსი ლოპესის მეუღლე იყო და მისგან სამი შვილი ჰყავს გაჩენილი, იკარდის კი მაშინ დაუახლოვდა, როდესაც ახალგაზრდა ფეხბურთელი რამდენიმე დღით მის სახლში ცხოვრებდა.

იკარდის დიეგო მარადონამ მოღალატე უწოდა და შემდეგი კომენტარი გააკეთა: "იკარდი მოღალატეა და მასზე ლაპარაკიც არ მსურს. იცით, როგორ მოექცეოდნენ ჩემ დროს მაუროს? - გამოათრევდნენ ქუჩაში და სახალხოდ სცემდნენ. დრო შეიცვალა, დღეს არაკაცებს კაცები ჰქვიათ".

ბევრს საუბრობენ იმაზე, რომ იკარდის წინააღმდეგ ლიონელ მესიმაც გაილაშქრა და არგენტინის ნაკრების მწვრთნელს მისი გუნდიდან მოკვეთა ურჩია, ან თუ ლეოს ავტორიტეტს გავითვალისწინებთ, სულაც მოსთხოვა. მოკლედ, მაურო იკარდის ყველგან პრობლემები აქვს...

ყოველდღიური სპორტული გაზეთი "ლელო"