"რეინჯერსის" პრობლემებზე ბოლო დღეებში წერა ხშირად გვიწევს. ბუნებრივია, როცა დღის წესრიგში დგას 140-წლიანი ისტორიის, შოტლანდიის 54-გზის ჩემპიონის, თასის 33-გზის გამარჯვებულისა და სუპერთასის 27-ჯერ მფლობელის ყოფნა-არყოფნის საკითხი, ის განსაკუთრებულ ყურადღებას მოითხოვს. 13 თებერვალი კლუბის ისტორიაში ნამდვილად დარჩება ყველაზე შავ დღედ. გარდა იმისა, რომ "რეინჯერსის" ფინანსური აქტივების მართვას მისი ადმინისტრაცია უკვე აღარ ახორციელებს, შოტლანდიის პრემიერლიგამ მას უკვე დააკლო 10 ქულა და სატრანსფერო საქმიანობაზე ემბარგოც დაადო.
რაც ყველაზე სამწუხაროა, "ჩაფრების" გულშემატკივრებმა შეიტყვეს, რომ პრეზიდენტი კრეიგ უაიტი ლონდონში საქმეებზე გაურკვეველი ვადით გაემგზავრა და დაბრუნდება
ბრიტანეთის სამეფოს საგადასახადო და საბაჟო სამსახურმა ედინბურგის სასამართლოსგან დაუყოვნებლივ მოითხოვა "რეინჯერსში" შიდა მმართველობის დანიშვნა. სასამართლომ კლუბს ვადა 13 თებერვლის 15:30 საათამდე მისცა, წინააღმდეგ შემთხვევაში საგადასახადო სამსახურის სარჩელის განხილვას დაიწყებდა.
საქმის მოგების შემთხვევაში კი ეს ორგანო თავად დანიშნავდა ადმინისტრატორს. კრეიგ უაიტმა 15:00 საათზე "აიბროქსის" ოფისში ხელი მოაწერა კონტრაქტს, რომლის თანახმადაც კლუბის საქმეთა მართვა ლონდონში რეგისტრირებულ კომპანია Duff & Phelps-ს დაეკისრა.
ამრიგად, "რეინჯერსის" პრეზიდენტმა ისარგებლა კანონით მისთვის მინიჭებული უფლებით და სახელმწიფო აპარატს დაასწრო. ამის გამო "რეინჯერსის" ყოფილმა მესაკუთრემ, სერ დევიდ მიურეიმ იმედგაცრუება გამოხატა მოქმედი პრეზიდენტის ქმედებით.
რა შედეგიც მოჰყვა ამას, უკვე მოგახსენეთ. კლუბს 10 ქულა ჩამოაკლდა, რაც პრაქტიკულად იმას ნიშნავს, რომ "სელტიკი" შოტლანდიის ჩემპიონი ხდება. გრანდებს შორის სხვაობა ამჟამად 14 ქულაა. ამხელა სხვაობას კი, უტრირებულად რომ ვთქვათ, "რეინჯერსი" მომდევნო სეზონის ბოლომდეც ვერ აღმოფხვრის.
Duff & Phelps-ის აუდიტორებმა დაიწყეს "რეინჯერსის" ფინანსური დოკუმენტაციის შესწავლა და გაოცებულებმა აღმოაჩინეს, რომ უაიტის მიერ კლუბის ყიდვის დღიდან დაწყებული ორგანიზაციას არც ერთი მიმდინარე გადასახადი არ გადაუხდია სახელმწიფოს ბიუჯეტში. ამ პერიოდში დაგროვილი თანხა 9 მილიონ ფუნტს აჭარბებს.
ეს იმის გათვალისწინებით, რომ საგადასახადო სამსახური "რეინჯერსს" იქამდეც ედავებოდა 49 მილიონს. "რეინჯერსის" კრედიტორებს შორის დამატებით გაჩნდნენ ისეთი სახელები, როგორიც არის "ჰართსი" (ლი უოლესის გადაუხდელი ტრანსფერის გამო) და "დანფერმლაინი". უკანასკნელმა გლაზგოელებს 2012 წლის 11 თებერვლის თასის თამაშზე 1500 ბილეთი გამოუყო და მიუხედავად იმისა, რომ ყველა ბილეთი გაიყიდა, მის ანგარიშზე ჯერ ერთი პენსიც არ ჩარიცხულა.
"რეინჯერსის" გულშემატკივრები "ტვიტერსა" და "ფეისბუქში" უკვე იმედგაცრუებულები წერენ, რომ მათი აზრით, პრეზიდენტი ჩვეულებრივი თაღლითი გამოდგა, ვისმა მაქინაციებმაც კლუბი პრაქტიკულად გაკოტრებამდე მიიყვანა.
13-ში საღამოს გულშემატკივრები "აიბროქსთან" შეიკრიბნენ, სადაც უაიტის ოფიციალურ განცხადებას მოუსმინეს და ის სტვენითა და შეურაცხმყოფელი ეპითეტებით შეამკეს, შემდეგ კი პრეზიდენტის კუთვნილი მანქანისთვის გზის გადაკეტვა სცადეს. პოლიციის დახმარებით უაიტმა მშვიდობიანად დააღწია თავი გააფთრებული გულშემატკივარების ალყას და პირდაპირ აეროპორტს მიაშურა, საიდანაც ის ლონდონში გადაფრინდა.
ჟურნალისტებმა კომენტარისთვის "რეინჯერსის" დამრიგებელ ალი მაკოისტის მიმართეს. შოტლანდიური ფეხბურთის 49 წლის ლეგენდა როგორღაც ახერხებს და ჯერ კიდევ ოპტიმისტად რჩება: "ვცდილობ, ცხოვრებას დადებითი კუთხიდან შევხედო. სხვა არჩევანი ელემენტარულად არ მაქვს. აზრი არ აქვს თვალი დახუჭო იმაზე, რაც უკვე მოხდა. ეს დღე ყველაზე შავია ჩვენი კლუბის ისტორიაში, თუმცა რეალობას თვალი უნდა გავუსწოროთ და ყველაფერი გავაკეთოთ, რომ კლუბი წინ წავიდეს.
უკვე ველაპარაკე კრეიგ უაიტს, კლუბის თანამშრომლებს, ფეხბურთელებს და ვიცი, რომ ყველანი გაორმაგებული ენერგიით ვაპირებთ მუშაობას. ჩემი ფეხბურთელები ნამდვილი პროფესიონალები არიან. მათი გული ძველებურად ძგერს და ამიტომ მომავალს შიშით ანთებული თვალებით არ ველოდები. რა თქმა უნდა, ყველა ნერვიულობს, ხალხს ეშინია იმისა, თუ რა მოხდება ხვალ, სამუშაოს ხომ არ დაკარგავენ. ჩვენ ეს გვესმის. სწორედ ამიტომ უნდა ვიდგეთ ერთად. ამ კლუბს 140-წლიანი ისტორია აქვს და თუკი ყველაფერი საჭირო მიმართულებით წავა, ამ ჩავარდნასაც გადავლახავთ და კიდევ უფრო გავძლიერდებით".
ყოველდღიური სპორტული გაზეთი "ლელო"
