ტრანსფერ ONLINE: ჭორები და ტრანსფერები, 28 ივნისი

13:50 "რეალი" ნებისმიერ შემთხვევაში მიიღებს დე ხეას. მადრიდელები მზად არიან, მეკარეში 18.3 მილიონი ევრო გადაიხადონ ან დაელოდონ "მანჩესტერ იუნაიტედთან" მისი კონტრაქტის ამოწურვას. დე ხეას მოქმედი ხელშეკრულება 2016 წლის ივლისამდეა ძალაში.

14:03 "რეალის" ახალბედას, მარკო ასენსიოს იჯარით გაუშვებენ. Marca-ს ცნობით, "რეალს" დაახლოებით ოცამდე წინადადება აქვს 19 წლის გარემარბთან დაკავშირებით.

14:15 "არსენალის" დამრიგებელი არსენ ვენგერი დაელაპარაკა ვოიცეხ შჩესნის. Football Insider-ის მონაცემებით, ვენგერმა აცნობა მეკარეს პეტრ ჩეხის შეძენის შესახებ და პოლონელს სხვა კლუბის პოვნა შესთავაზა. შჩესნიმ უპასუხა, რომ წასვლას არ აპირებს და ძირითადში ადგილისთვის იბრძოლებს.

15:20 "მონაკოს" მცველი აბდენური ახლოს არის პრემიერლიგის ერთ-ერთ ტოპ-კლუბში გადასვლასთან. ტუნისის ნაკრების 25 წლის ფეხბურთელზე "ლივერპული" და "მანჩესტერ იუნაიტედი" აცხადებენ პრეტენზიას. L’Equipe-ი წერს, რომ ფრანგებს მინიმუმ 30 მილიონი ევროს მიღება სურთ.

16:24 "ატლეტიკოს" ნახევარმცველმა არდა თურანმა საკუთარ "ტვიტერზე" დაწერა: "ჭორები ჩემი მომავლის შესახებ არაკორექტულია. ჩემი აგენტი 3-4 კლუბთან აწარმოებს მოლაპარაკებებს. აუცილებლად შეგატყობინებთ, როგორც კი გარიგება დასრულებული იქნება".

16:36 "შტუტგარტი" აპირებს იჯარით აიყვანოს "ბაიერნის" მცველი ჰოლგერ ბადშტუბერი. Bild-ი გარიგების დეტალებზე არაფერს წერს, მაგრამ ამბობს, რომ ამ ტრანსფერით "შტუტგარტი" რიუდიგერის შეცვლას იმედოვნებს.

17:23 მარიო ბალოტელის ახალი ვარიანტი გამოუჩნდა. ფორვარდით დაინტერესდა "ტრაბზონი", - ამტკიცებს Goal-ი. ადრე იტყობინებოდნენ, რომ იტალიელზე პრეტენზიას მეორე თურქული კლუბი "ბეშიქთაში" აცხადებს.

17:37 პაცინი ახლოს არის "ვერონაში" გადასვლასთან. ფორვარდს დაუმთავრდა კონტრაქტი "მილანთან" და ახლა ოთხწლიანი კონტრაქტის დეტალები შეათანხმა ვერონელებთან, - იტყობინება Sport Mediaset-ი.

18:24 მასიმილიანო ალეგრიმ დიდი ინტერვიუ მისცა La Repubblica-ს. კითხვაზე - ვინ შეცვლის პირლოს, მწვრთნელმა უპასუხა: "საშიში არაფერია, თუ ის ინდივიდუალური მოთამაშე იქნება და არა გუნდური. ნარცისიზმი კარგია, მაგრამ ზომიერად. მომწონს ისეთი მოთამაშეები, როგორებიც არიან ისკო და ოსკარი. ასევე, არიან ახალგაზრდა იტალიელები - ბერარდი და ბერნარდესკი".

19:01 დემბა ბამ კონტრაქტი გააფორმა "შანხაი შენჰუასთან". Transfer Sources-ი ამტკიცებს, რომ "ბეშიქთაში" ფორვარდის ტრანსფერისთვის 13.5 მილიონ ევროს მიიღებს.

19:29 ფილ ნევილი "ვალენსიას" მწვრთნელი გახდა. "მანჩესტერ იუნაიტედის" ყოფილი მოთამაშე მთავარი მწვრთნელის ასისტენტი იქნება. ამის შესახებ დაწერა SKY Sports-ის ესპანელმა ჟურნალისტმა.

19:43 ლუი ვან გაალი არ გაუშვებს დე ხეას - ასე დაწერა "მარკამ". ესპანური გამოცემა გამოვიდა სათაურით - "ნებისმიერ შემთხვევაში, არა". როგორც ჩანს, ინგლისური კლუბი მზად არის, ფეხბურთელი მომავალი წლის ზაფხულში გაუშვას.

20:00 დორტმუნდის "ბორუსიის" მეკარე მიტჩელ ლანგერაკი "შტუტგარტში" გააგრძელებს კარიერას. ამის შესახებ საკუთარ წყაროზე დაყრდნობით "კიკერი" წერს. ელოდებიან, რომ ტრანსფერის დეტალებს უახლოეს დღეებში შეათანხმებენ.

20:37 როგორც Sky Sports-ი იტყობინება, "სოუნსიმ" "ბრაგადან" გამოისყიდა ფორვარდი ედერი. ინგლისელები პორტუგალიის ნაკრების ფორვარდში 5 მილიონ გირვანქას გადაიხდიან.

20:49 გაზეთ Gazzetta dello Sport-ის ინფორმაციით, იევჰენ კონოპლიანკა "ტოტენჰემში" გადავიდა თავისუფალი აგენტის სტატუსით.

21:06 "რეალი" დაინტერესდა "ლაციოს" ნახევარმცველ ლუკას ბილიათი. La Gazzetta dello Sport-ის მონაცემებით, მადრიდელები მზად არიან, 22 მილიონი დოლარი გადაიხადონ. ამასთან, "ლაციო" , პსჟ-ისა და "მანჩესტერ სიტის" ინტერესის გათვალისწინებით, 30 მილიონის მიღებას ფიქრობს.

ყოველდღიური სპორტული გაზეთი "ლელო"