* შვედეთის ნაკრები ისტორიაში პირველად გახდა ევროპის ახალგაზრდული ჩემპიონატის გამარჯვებული.* შვედეთის ნაკრების გმირი მეკარე პატრიკ კარლგრენია, რომელმაც რიკარდო ეშგაიოს და ვილიამ კარვალიოს პენალტები მოიგერია.
* ორივე ნაკრები თითოჯერ იყო აქამდე ფინალში, 90-იან წლებში და ორივე იტალიასთან დამარცხდა.
* ფინალში პენალტების სერია 2002 წლის მერე პირველად დაინიშნა, როცა ჩეხეთმა აჯობა საფრანგეთს. მაშინ ფინალის გმირი პეტრ ჩეხი გახდა.
პორტუგალიელთა მთავარმა ვარსკვლავმა ვილიამ კარვალიომ უკანასკნელი პენალტი გააცუდა და "ზლატანის შვედმა ვიკინგებმა" ისტორიაში პირველად მოიგეს ევროპის ახალგაზრდული ჩემპიონატი. პრაღაში ძირითადი და დამატებითი ტაიმები
"ჩემი შვედი ვიკინგები" - ასე მოესიყვარულა მსოფლიოში ყველაზე ცნობილი შვედი ფეხბურთელი ზლატან იბრაჰიმოვიჩი ახალგაზრდულ ნაკრებს, მას მერე, რაც გუნდმა ნახევარფინალისა და შესაბამისად, ოლიმპიური თამაშების საგზური მოიპოვა. ამით ზლატანს რიოში თამაშის შანსი მიეცა, თუმცა პსჟ-ის ფორვარდიც კი ვერ წარმოიდგენდა, რომ ამ უდიდეს მიღწევაზე გაჩერებას გუნდი არ აპირებდა.
ფინალის წინ ცხადი გახდა, რომ შვედეთი, ფაქტობრივად, შინ თამაშობდა - ასეულობით სკანდინავიელს კიდევ ათასამდე დაემატა და პრაღის ტრიბუნებზე ჰოკან ერიქსონის გუნდს მხარდაჭერა გარანტირებული ჰქონდა.
ამას არ შეუშინდა ფავორიტი პორტუგალია და მეტოქეს თავიდანვე ეკვეთა, მაგრამ გერმანიასავით მისი მოშთობა ვერ შეძლო. პირველ წუთებში რუი ჟორჟეს ბიჭები აქტიურობდნენ, ბურთი ხარიხასაც გაარტყეს, მაგრამ თანდათან თამაში დაწყნარდა. მეორე ტაიმში კი უკვე ტაქტიკური ბრძოლა გაიმართა ორ აბსოლუტურად სხვადასხვა სტილის გუნდს შორის. დამატებით ტაიმებში შვედების უკეთესი ფიზიკური მომზადება გამოჩნდა, თუმცა ეს არ იყო საკმარისი გასამარჯვებლად.
პენალტების სერიაში პორტუგალიელებმა ჩაიმუხლეს. ტოშეს დარტყმული, როგორღაც, შევარდა კარში, აი, ეშგაიოს და კარვალიოს კი არ გაუმართლათ, კარლგრენმა იყოჩაღა.
ჰოკან ერიქსონი (შვედეთის ნაკრების მწვრთნელი): "სიტყვები არ მყოფნის, თავი სამოთხეში მგონია. შვედეთს გაცილებით ნაკლები რესურსი ჰქონდა, ვიდრე სხვა ევროპულ ქვეყნებს, მაგრამ ჩვენ მოვახერხეთ და გავიმარჯვეთ. ყველაფერი კარგად დასრულებულ, ლამაზ ზღაპარს ჰგავს. დარწმუნებული ვარ, რომ დღეს ჩვენთან ერთად, მთელი შვედეთი ზეიმობს".
***
შვედეთი გახდა მე-10 ქვეყანა, რომელმაც ევროპის პირველობის მოგება შეძლო. ყველაზე მეტჯერ, 5-ჯერ ტიტული იტალიას აქვს მოგებული, შემდეგ მოდიან ესპანელები 4 მოგებით. ტურნირის საუკეთესო ბომბარდირი გახდა და "ოქროს ბუცი" მიიღო ჩეხმა იან კლიმენტმა 3 გოლით. წინა ჩემპიონატის ბომბარდირი ესპანელი ალვარო მორატა იყო 4 გოლით.
რიო დე ჟანეიროს 2016 წლის ოლიმპიურ თამაშებზე ევროპიდან შვედეთი, პორტუგალია, გერმანია და დანია წავლენ.
მომდევნო პირველობა (რიგით 24-ე) 2017 წლის ივნისში პოლონეთში გაიმართება. ამ ტურნირში ერთი სიახლეა: ფინალურ ეტაპზე გუნდების რაოდენობა რვიდან 12-მდე იზრდება. ეს ზრდის საქართველოს ახალგაზრდული ნაკრების შანსებს, რომელმაც საკვალიფიკაციო რაუნდი უკვე დაიწყო გამარჯვებით.
ყოველდღიური სპორტული გაზეთი "ლელო"
