ჰოლანდია-საფრანგეთი 2:3 - ვერც ფეხით, ვერც ხელით [VIDEO]

25 მარტს, ევროპაში რამდენიმე საერთაშორისო ამხანაგური მატჩი გაიმართა.

განსაკუთრებულ ინტერესს ამსტერდამში ჩატარებული შეხვედრა იწვევდა, რომელშიც ჰოლანდიის ეროვნულმა გუნდმა საფრანგეთის ნაკრებს უმასპინძლა. მატჩი სტუმართა გამარჯვებით, 3:2 დასრულდა.

ანგარიში მე-6 წუთზე ფრანგებმა, ანტუან გრიზმანის მიერ საჯარიმოდან გატანილი გოლით გახსნეს. მე-13 წუთზე სტუმართა უპირატესობა ორბურთიანი გახდა - კუთხურის შემდეგ, ოლივიე ჟირუმ ბლეზ მატიუდის პასით ისარგებლა.

მეორე ტაიმის დასაწყისში სხვაობის შემცირება "სტანდარტის" შემდეგ ლუკ დე იონგმა (47) შეძლო, რომლის ხელით აშკარა თამაში მსაჯებმა ვერ შენიშნეს.

86-ე წუთზე ანგარიშის გათანაბრება უკვე იბრაჰიმ აფელაიმ მოახერხა, მაგრამ დარჩენილ დროში ფრანგებმა გამარჯვების მომტანი გოლის გატანა მაინც შეძლეს - თავი მატიუდიმ 88-ე წუთზე გამოიჩინა.

აღსანიშნავია, რომ "ამსტერდამ არენაზე" პატივი ლეგენდარული ჰოლანდიელი ფეხბურთელის იოჰან კრუიფის ხსოვნას მიაგეს, რომელიც ახლახან, 69 წლის ასაკში, ფილტვის სიმსივნით გარდაიცვალა.

რაც შეეხება 25 მარტს გამართულ სხვა საერთაშორისო ამხანაგურ მატჩებს, კრიშტიანო რონალდოს პორტუგალიის ნაკრები შინ ბულგარეთთან მინიმალური ანგარიშით დამარცხდა.

საგულისხმოა, რომ მადრიდის "რეალის" ვარსკლავს გათანაბრების შანსი 66-ე წუთზე ჰქონდა, თუმცა 11-მეტრიანიდან მისი უძლიერესი დარტყმული ვლადისლავ სტოიანოვმა ნახტომში მოიგერია, დამატება კი კრიშტიანოს ბულგარელთა მცველმა აღარ აცალა.

1:0 დაფიქსირდა, ოღონდ მასპინძელთა სასარგებლოდ ირლანდია-შვეიცარიის შეხვედრაშიც. უგოლოდ დაშორდნენ ერთმანეთს სომხეთი-ბელორუსი და სლოვაკეთი-ლატვია.