ვის აქვს საფეხბურთო სამყაროში ყველაზე მაგარი CV?

ვის აქვს მსოფლიო ფეხბურთში ყველაზე მაგარი CV? ათეულშია ლეო მესი, სადაც "ბარსას" ვარსკვლავთა ცვენაა, მაგრამ ათეულში არ არის კრიშტიანო რონალდო. საერთოდაც, იქ "რეალის" არც ერთი ფეხბურთელია.

აი, ნომერ პირველს კი ვერაფრით გამოიცნობთ. მას არასოდეს უთამაშია, არც "სამეფო კლუბში" და არც "ბარსელონაში"...

კიდევ ერთი საფეხბურთო სეზონი დასრულდა და ტიტულების მორიგი პარტია ჩაიბარეს ფეხბურთელებმა, ამ სეზონის ტრიუმფატორებმა. ფეხბურთი ცოტა უსამართლოა, არიან, ფეხბურთელები, რომლებიც ბევრს შრომობენ, იმსახურებენ კიდეც, მაგრამ არაფერი ან თითქმის არაფერი მოუგიათ.

მაგრამ არიან ისეთებიც, რომელთაც ტიტული ტიტულზე ხვდებათ, თანაც, არცთუ დიდი ძალისხმევის წყალობით. მათი კარადებზე ტროფეების შესანახი ადგილი ამოწურულია. მოდი, ვნახოთ მსოფლიოს მასშტაბით რომელი ათი ფეხბურთელია ყველაზე განებივრებული ჯიდლოებით. ქულების დარიცხვაზე შევთანხმდეთ და ათვლა კი უკუღმა დავიწყოთ:

მსოფლიოს ჩემპიონობა - 10 ქულა
კონტინენტის ჩემპიონობა - 9
კონტინენტური საკლუბო თასი (მაგალითად, ჩემპიონთა ლიგა ევროპაში, ლიბერტადორესის თასი სამხრეთ ამერიკაში) - 8
ქვეყნის ჩემპიონის ტიტული - 7 (აქ ყველა დონის ტურნირი იგულისხმება)
უეფას ევროპალიგა - 6
ქვეყნის თასი - 5
მეორე დონის ქვეყნის თასი - 3
მსოფლიოს საკლუბო ჩემპიონატი - 3
კონფედერაციათა თასი - 3
ნებისმიერი სუპერთასი (მათ შორის უეფას სუპერთასი) - 1
დამატებითი წესი: ფეხბურთელს ერთხელ მაინც უნდა ჰქონდეს მოგებული ტოპ 5 ევროპული ჩემპიონატებიდან ერთ-ერთი.
ითვლება მხოლოდ მოქმედი ფეხბურთელები.

10. ფილიპ ლამი (ბაიერნი, გერმანია)
ბუნდესლიგა - 8; თასი - 7; ლიგის თასი: 1; გერმანიის სუპერთასი - 2; ჩემპიონთა ლიგა - 1; უეფას სუპერთასი - 1; მსოფლიოს საკლუბო ჩემპიონატი - 1; მსოფლიოს ჩემპიონობა - 1.
სულ: 118 ქულა

პეპ გვარდიოლამ ფილიპ ლამი ყველაზე ჭკვიან ფეხბურთელად მოიხსენია, ვისთანაც უმუშავია. ის აგრეთვე ერთ-ერთი ყველაზე წარმატებულია. თუ ცოტა ხნით იჯარას არ ჩავთვლით, მარჯვენა მცველმა მთელი კარიერა მიუნხენის "ბაიერნში" გაატარა.

საკლუბო დონეზე ლამმა მოიგო 8 სინი ბუნდესლიგაში! თანაც, ბოლო ოთხი ტიტული ზედიზედ. ერთხელ ლამმა ჩემპიონთა თასიც აღმართა, ეს 2013 წელს მოხდა, პეპის მოსვლამდე რამდენიმე დღით ადრე. 32 წლის ლამი, 2011 წლიდან მოყოლებული "ბაიერნის" კაპიტანია. კაპიტნის რანგში მან 11 ტიტული მოიგო. ყველაფერს რომ თავი დავანებოთ, სწორედ მან ჩაიბარა უკანასკნელად მსოფლიოს ჩემპიონის ტროფეი.

9. სერხიო ბუსკეტსი (ბარსელონა, ესპანეთი)
ლა ლიგა - 6; კოპა - 4; ესპანეთის სუპერთასი - 4; ჩემპიონთა ლიგა - 3; უეფას სუპერთასი - 3; მსოფლიოს საკლუბო ჩემპიონატი - 3; მსოფლიოს ჩემპიონობა - 1; ევროპის ჩემპიონობა - 1.
სულ: 121 ქულა

ბუსკეტსი ერთ-ერთი ყველაზე ნაკლებად დაფასებული ვარსკვლავია "ბარსელონაში", მისი უსაფრთხო თამაშის გარშემოა აგებული "ბარსას" რევოლუციური წარმატებები. მან ტიტულების მოხვეჭა მხოლოდ 2009 წლიდან დაიწყო, მაგრამ დაიწყო და აღარ გაჩერებულა.

მარტო სამჯერ ჩემპიონთა ლიგის მოგება რად ღირს. არ არის ცუდი შედეგი თუ ამას ევროპისა და მსოფლიოს ჩემპიონობას დავუმატებთ. დიდებულია, რომ "ბარსამ" ეს საყრდენი კიდევ მომდევნო ხუთი წლით დაიბევა.

8. ჩავი ერნანდესი (ალ-საადი, ესპანეთი)
ლა ლიგა - 8; კოპა - 3; ესპანეთის სუპერთასი - 6; ჩემპიონთა ლიგა - 4; უეფას სუპერთასი - 2; მსოფლიოს ჩემპიონობა - 1; ევროპის ჩემპიონობა - 2.
სულ: 131 ქულა

არ არსებობს ფეხბურთელი, რომელიც "ბარსელონას" ბოლო ათი წლის წარმატებაში უფრო მნიშვნელოვანი ფიგურაა, ვიდრე ჩავი. გვარდიოლამ თავის მაგალითზე, ჩავიზე ააწყო "ბარსას" ტიკი-ტაკა. მან "ბარსასთან" ერთად პირველი ტიტული ჯერ კიდევ მე-20 საუკუნეში მოიგო.

შეგახსენებთ, რომ 36 წლის ნახევარმცველი ახლა "ალ-საადში" ბურთაობს. მისტერ ტიკი-ტაკა, რომ არ გადასულიყო არაბულ კლუბში, ვინ იცის, შესაძლოა, ჩვენი ათეულის სათავეშიც ყოფილიყო.

7. ბასტიან შვაინშტაიგერი (მანჩესტერი, გერმანია)
ბუნდესლიგა - 8; გერმანიის თასი - 7; გერმანიის ლიგის თასი - 2; გერმანიის სუპერთასი - 2; ჩემპიონთა ლიგა - 1; უეფას სუპერთასი - 1; მსოფლიოს საკლუბო ჩემპიონატი - 1; ინგლისის თასი - 1; მსოფლიოს ჩემპიონობა - 1.
სულ: 133 ქულა

როცა ლამი იჯარით "შტუტგარტში" თამაშობდა და, რა თქმა უნდა, ვერაფერს იგებდა, შვაინს "ბაიერნიდან" ფეხი არ მოუცვლია, ამიტომაც "ბაიერნის" კაპიტანზე წინაა ტიტულებით. ის მხოლოდ ახლა გადაბარგდა "მანჩესტერ იუნაიტედში", თუმცა უტიტულოდ არც იქ დარჩენილა - ასოციაციის თასი მოიგო. არ დაგვავიწყდეს, რომ ის მოქმედი მსოფლიოს ჩემპიონია.

6. ჟერარდ პიკე (ბარსელონა, ესპანეთი)
პრემიერლიგა - 1; ქომუნითი შილდი - 1; ჩემპიონთა ლიგა - 4; ლა ლიგა - 6; კოპა - 4; ესპანეთის სუპერთასი - 4; უეფას სუპერთასი - 3; მსოფლიოს საკლუბო ჩემპიონატი - 3; მსოფლიოს ჩემპიონობა - 1; ევროპის ჩემპიონობა - 1.
სულ: 137 ქულა

პიკეს ტიტულების თვალსაზრისით, წაადგა "მანჩესტერში" გადასვლა და უკან დაბრუნება. მართალია, ინგლისში ბევრი არ უთამაშია, მაგრამ ტროფეებს მაინც შეწვდა. "ბარსელონაში" დაბრუნებული პიკე კიდევ უფრო წარმატებულია, როგორც საკლუბო, ისე სანაკრებო დონეზე. ის მოქმედი ევროპის ჩემპიონია, რომელსაც მსოფლიოს ჩემპიონობის გემოც არ დავიწყნია.

5. მაქსველი (პსჟ, ბრაზილია)
ბრაზილიის თასი - 1; ერედივიზიე - 2; ჰოლანდიის თასი - 2; ჰოლანდიის სუპერთასი - 2; სერია A - 3; იტალიის სუპერთასი - 2; ლა ლიგა - 2; ესპანეთის სუპერთასი - 3; ჩემპიონთა ლიგა - 1; უეფას სუპერთასი - 2; მსოფლიოს საკლუბო ჩემპიონატი - 2; ლიგა 1 - 4; საფრანგეთის თასი - 1; საფრანგეთის ლიგის თასი - 3; საფრანგეთის სუპერთასი - 3.
სულ: 140 ქულა

ბრაზილიელი მცველი საკლუბო ტიტულებით დახუნძლულია: ის იყო ჰოლანდიის, იტალიის, ესპანეთისა და საფრანგეთის ჩემპიონი, მოიგო ჩემპიონთა ლიგა. აი, ბრაზილიის ჩემპიონი მაქსველი არ ყოფილა და არც სანაკრებო ტიტულები არ აქვს.
ყველაფერი კი 2000 წელს დაიწყო "კრუზეიროსთან" ერთად ბრაზილიის თასის მოგებით.

4. ლიონელ მესი (ბარსელონა, არგენტინა)
ლა ლიგა - 8; კოპა - 4; ესპანეთის სუპერთასი - 6; ჩემპიონთა ლიგა - 4; უეფას სუპერთასი - 3; საკლუბო მსოფლიოს ჩემპიონატი - 3
სულ: 151 ქულა



მსოფლიოს ერთ-ერთ საუკეთესო ფეხბურთელად მიჩნეული ლეო მესი ვერ მოხვდა სამეულში. ამის მიზეზი კი სანაკრებო ტიტულების არქონაა. ჩვენ, რომ ქულებში ოქროს ბურთები მიგვეთვალა, მესის ვერავინ დაეწეოდა, მისი 5 ბურთი ყველაფერს გადაფარავდა (ამ შემთხვევაში რონალდოც მოხვდებოდა ელიტურ ათეულში).

3. დანი ალვეში (ბარსელონა, ბრაზილია)
ლიგა ბაიანო - 1; კოპა - 5; ლა ლიგა - 6; ესპანეთის სუპერთასი - 5; უეფას თასი - 2; უეფას სუპერთასი - 4; ჩემპიონთა ლიგა - 3; საკლუბო მსოფლიოს ჩემპიონთაი - 3; კოპა ამერიკა - 1; კონფედერაციათა თასი - 2;
სულ: 152 ქულა

როგორც ამბობენ, დანი "ბარსელონადან" "იუვენტუსში" გადავა, თუმცა არც იქ უნდა გაუჭირდეს ტიტულების დაგროვება. ალვეშის ტიტულები "ბარსელონაში" არ დაწყებულა, მისთვის ფეხბურთი ლა მასიაში არ უსწავლებიათ. ყველაფერი "ბაიაში" თამაშით დაიწყო, შემდეგ იყო "სევილია"...
და მაინც, დანიმ 23 ტიტული მოიპოვა "ბარსელონასთან" ერთად, 23!

2. ანდრეს ინიესტა (ბარსელონა, ესპანეთი)
ლა ლიგა - 8; კოპა - 4; ესპანეთის სუპერთასი - 6; ჩემპიონთა ლიგა - 4; უეფას სუპერთასი - 3; მსოფლიოს საკლუბო ჩემპიონატი - 3; მსოფლიოს ჩემპიონობა - 1; ევროპის ჩემპიონობა - 2.
სულ: 154 ქულა

"ბარსას" წარმატებას ჩავისთან და მესისთან ერთად ინიესტაც ჭედდა. ის ერთ-ერთი საუკეთესო ნახევარმცველია თანამედროვე საფეხბურთო სამყაროში. 32 წლის ანდალუსიელს ლა ლიგა 8-ჯერ აქვს მოგებული, ჩემპიონთა ლიგა 4-ჯერ, ევროპის ჩემპიონობა ორჯერ და ერთხელ მსოფლიოს ჩემპიონობა და თანაც, ესპანეთმა ტიტული სწორედ მისი დარტყმის წყალობით მოიგო. ანდრესი დამსახურებულადაა მეორე ადგილზე.

1. ჟულიო სეზარი (ბენფიკა, ბრაზილია)
კოპა მერკოსული - 1; ბრაზილიის ჩემპიონთა თასი - 2; კარიოკა - 4; თასი - 3; რიოს თასი - 1; სერია A - 5; იტალიის თასი - 3; იტალიის სუპერთასი - 4; ჩემპიონთა ლიგა - 1; მსოფლიოს საკლუბო ჩემპიონატი - 1; პორტუგალიის ჩემპიონატი - 2; პორტუგალიის თასი - 1; კოპა ამერიკა - 1; კონფედერაციათა თასი - 2
სულ: 155 ქულა



ვერაფრით გამოიცნობდით, რომ მოქმედ ფეხბურთელებში ყველაზე ტიტულოვანი 36 წლის მეკარეა, მაგრამ ბრაზილიაში, იტალიაში და პორტუგალიაში მან უამრავი ტროფეი მოიგო. დავუმატოთ ამას წარმატებები ბრაზილიის ნაკრებში...

ვარსკვლავები, რომლებიც ათეულში ვერ მოხვდნენ, მაგრამ ამას იმსახურებდნენ ან მალე მოხვდებიან იქ:

ზლატან იბრაჰიმოვიჩი (პსჟ, შვედეთი) - ათეულში მოხვდებოდა, რომ არა კალჩოპოლი.

ტიაგო ალკანტარა (ბაიერნი, ესპანეთი) - ტიაგოს უნიკალური რეკორდი აქვს, ბოლო 8 სეზონიდან 7-ში ქვეყნის ჩემპიონის ტიტული მოიგო. მას ყველაფერი წინ აქვს.

კინგსლი კომანი (ბაიერნი, საფრანგეთი) - თინეიჯერი გახდა საფრანგეთის, იტალიისა და გერმანიის ჩემპიონი. და ის მხოლოდ 19 წლისაა.

Sportsmail-ის მიხედვით

ყოველდღიური სპორტული გაზეთი "ლელო"