ამ წყვილში მეოთხედფინალური პლეი ოფის პირველი მატჩი რუსთავში უნდა გამართულიყო, მაგრამ თამაში ახალი დაწყებული იყო, როცა დარბაზში ელექტროენერგია გაითიშა და შეხვედრა 28 აპრილისთვის გადაიდო. ასე რომ, "ქუთაისისა" და "რუსთავის" პირველი საპლეიოფო დაპირისპირება ზურაბ საკანდელიძისა და მიხეილ ქორქიას სახელობის სპორტის სასახლეში შედგა.
თამაში უაღრესად დაძაბული და საინტერესო გამოდგა, გამარჯვებულის ბედი ბოლო წამებზე გადაწყდა.
შესანიშნავი მატჩი ჩაატარა რუსთაველთა ლეგიონერმა ნეით ბოუიმ, რომელმაც სტუმართა რიგებში შეუცვლელად ითამაშა და 31 ქულით მატჩის საუკეთესო კალათბურთელი გახდა.
შეხვედრა თავიდანვე დინამიურად დაიწყო, რევაზ დიდიასა და რიჩარდ მათიაშვილის
რუსთაველებმა მდგომარეობა მალევე გამოასწორეს და თამაში ქულა-ქულაში გაგრძელდა. მასპინძელთაგან ამ პერიოდში შეუჩერებელი იყო გიგი ბარბაქაძე, რომელმაც ზედიზედ სამი სამქულიანი ჩააგდო, რუსთაველთაგან კი საუკეთესო თავიდანვე ბოუი გახლდათ, სტუმართა გამთამაშებელმა ორი საჯარიმოთი და ზუსტი სამქულიანით ანგარიში გაათანაბრა - 7:7. შემდეგ კი ბარბაქაძის მესამე სამქულიანს ასევე შორეული ზუსტი ტყორცნით უპასუხა.
გიგის უფროსი ძმა დავითიც აჰყვა და შესანიშნავი კომბინაციის დაგვირგვინების შემდეგ, ქუთაისელებმა პირველი პერიოდი 25:21 მოიგეს.
მეორე მეოთხედი პერიმეტრიდან ბოუის ზუსტი სამქულიანი სროლით დაიწყო, თუმცა შემდეგ ბუბა კვიმსაძემ ზედიზედ ორი სამქულიანითვე უპასუხა, რასაც მათიაშვილის შესანიშნავი თამაშიც თან დაერთო და უსტიაშვილის გუნდი წინ 12 ქულით გავიდა - 36:24.
ამის შემდეგ ხმელიძემ და ბოუიმ ანგარიში 8 ქულამდე შეამცირეს, ეს უკანასკნელი კვლავ გაუჩერებელი იყო, მასპინძელთაგან კი ამ პერიოდში ზაურ ფაშაევის თამაშია აღსანიშნავი, რომელმაც ზედიზედ 5 ქულა დააგროვა. პერიოდის ბოლოს რუსთაველებმა მდგომარეობის გამოსწორება მოახერხეს და ანგარიში 5 ქულამდე შეამცირეს - 41:36.
მესამე პერიოდის დასაწყისში ქუთათურებმა შეტევებში ზედიზედ რამდენიმე შეცდომა დაუშვეს და ბოუიმ ეს კარგად გამოიყენა, მისი შესანიშნავი გარჯის წყალობით სტუმრებმა 1 ქულამდე შეამცირეს სხვაობა - 41:40.
გიგი ბარბაქაძე და რიჩარდ მათიაშვილი კვლავ მოწოდების სიმაღლეზე იყვნენ და მათი კარგი თამაშის გამოისობით ქუთათურებმა სტუმრებს დაწინაურების საშუალება არ მისცეს. პერიოდის მიწურულს ათანელიშვილმა 3 ქულამდე დაიყვანა სხვაობა -57:54.
გადამწყვეტი მეოთხედი ქუთაისელთა შედეგიანი შეტევით დაიწყო, თითქოსდა უპირატესობა დავით უსტიაშვილის გუნდის ხელში გადადიოდა, მაგრამ აქ კვლავ ბოუიმ ითავა რუსთაველთა ლიდერობა, საკუთარ თავზე აიღო თამაში, ზედიზედ ორ სამქულიანს ერთი ორიანიც მიაყოლა და საკუთარი გუნდი წინ გაიყვანა - 72:70.
ფაშაევმა ანგარიში გაათანაბრა - 72:72, თუმცა არც ცეკვავამ გააცუდა სროლა და ისევ "რუსთავი" დაწინაურდა.
ფაშაევმა ორიდან ერთი საჯარიმო ჩააგდო, მატჩის დასრულებამდე 23.2 წამი იყო დარჩენილი, ცეკვავამაც ორიდან ერთი სროლა გამოიყენა, ქუთაისელები სამქულიანის ჩაგდების შემთხვევაში წინ გადიოდნენ, მაგრამ დიდიას სროლა გაუცუდდა.
დარჩენილ 8 წამში რუსთაველებმა ტუჯანის ორი საჯარიმოთი საბოლოო ანგარიში დააფიქსირეს 73:77 და ნახევარფინალისკენ მნიშვნელოვანი ნაბიჯი გადადგეს.
ბოუის 31 ქულაზე რეპორტაჟის დასაწყისშიც ვთქვით, ქუთაისელთაგან კი საუკეთესოები გიგი ბარბაქაძე (18 ქულა), ზაურ ფაშაევი (15 ქულა, 6 პასი) და რიჩარდ მათიაშვილი (16 ქულა 10 მოხსნა) იყვნენ. მატჩის ერთადერთი დაბლ-დაბლიც სწორედ ქუთაისელთა ცენტრფორვარდმა შეასრულა.
სუპერლიგა 2012-13. 1/4-ფინალი. 26 აპრილი, ქუთაისი
ქუთაისი-რუსთავი 73:77
ქუთაისი 25 16 16 16
რუსთავი 21 15 18 23
ყოველდღიური სპორტული გაზეთი "ლელო"
