სუპერლიგის ერთ-ერთი ყველაზე სტაბილური გუნდი "ქუთაისი-2010" ახალ საკალათბურთო სეზონს მნიშვნელოვანი ცვლილებებით ხვდება. მოგეხსენებათ, ცოტა ხნის წინათ დავით უსტიაშვილის ნაცვლად ქუთაისური გუნდის მთავარ მწვრთნელად მალხაზ კოხრეიძე დაინიშნა, რომელიც "ქუთაისს" უსტიაშვილის დანიშვნამდეც ხელმძღვანელობდა.
პირველი ბრინჯაოს მედლები, დუდუ დადიანის სახელობის თასი ქუთათურებმა სწორედ მისი მწვრთნელობისას მოიპოვეს. სიახლეებია გუნდის შემადგენლობაშიც.
მალხაზ კოხრეიძეს "ქუთაისში" მიმდინარე ცვლილებებსა და გუნდის მიზნებზე ვესაუბრეთ.
- როგორ ემზადებით სეზონისთვის და რა ცვლილებებია გუნდში?
- გუნდიდან სამი წამყვანი კალათბურთელი: ბუბა კვიმსაძე, თემურ ბაბუნაშვილი და რიჩარდ
პირველი ორი "არმიაში" გადავიდა, მათიაშვილი კი "ოლიმპს" შეუერთდა. "ქუთაისის" მთავარ მწვრთნელად რომ დავინიშნე, კალათბურთელებთან ხელშეკრულებების 99% უკვე გაფორმებული იყო. გუნდი, ფაქტობრივად, დაკომპლექტებული დამხვდა და მასში კორექტივების შესატანად დროც არ მქონდა.
ჩემპიონატისთვის ქუთაისში ვემზადებით. როგორც ხელმძღვანელობამ გვითხრა, სხვა საშუალება ამ ეტაპზე არ არის. გუნდი მთელი დატვირთვით ვარჯიშობს. ვმუშაობთ საერთო და სპეციალურ ფიზიკურ მომზადებაზე, რეაბილიტაციის მიზნით კი ჩასმული გვაქვს წყლის პროცედურები. პროგრამას მივყვებით და ვფიქრობ, სეზონს სრულ მზადყოფნაში შევხვდებით.
- გუნდში რამდენიმე ახალი კალათბურთელიცაა. მათ შესახებ რას გვეტყვით?
- როგორც გითხარით, შემადგენლობა დაკომპლექტებული დამხვდა. ჩემს დანიშვნამდე გუნდს დაემატნენ აკაკი დვალიშვილი და გიორგი ცირეკიძე (ორივე "ოლიმპიდან"), "ქუთაისში" დაბრუნდა გიორგი ცეკვავა, რომელმაც წინა სეზონი "რუსთავში" ჩაატარა.
მათთან ხელშეკრულებები კლუბის ყოფილმა ხელმძღვანელობამ გააფორმა, ჩვენი მოსვლის შემდეგ კი მხოლოდ დიმიტრი დვალიშვილი დავიმატეთ.
- "ქუთაისი" საქართველოს ნაკრების წევრ ბესიკ ლეჟავათი უნდა გაძლიერებულიყო, თუმცა კალათბურთელმა შეცვლილი პირობების გამო ქუთაისურ გუნდში თამაშზე უარი განაცხადა. ამასთან დაკავშირებით რას იტყვით?
- "ქუთაისის" წინა ხელმძღვანელობას ჰქონდა თუ არა მოლაპარაკება ბესიკ ლეჟავასთან, ამის თაობაზე ვერაფერს გეტყვით. ამ კალათბურთელის საწინააღმდეგო არაფერი მაქვს. პირიქით, "ქუთაისს" ძალიან დიდ სარგებელს მოუტანდა, მაგრამ მატერიალური მხარე ჩემს კომპეტენციაში არ შედის და ამ საკითხს მე ვერ გადავწყვეტდი.
- რა მიზნებისთვის იბრძოლებს "ქუთაისი" ახალ სეზონში?
- ჯერ ჩემპიონატი არ დაწყებულა და ამ თემაზე საუბარი წინასწარმეტყველების ტოლფასი იქნება. ყველაფერს კონკრეტული თამაშები გვიჩვენებს. სათადარიგოთა სკამიც გასათვალისწინებელია. გვაქვს გარკვეული სირთულეები.
ფაქტობრივად, 6-კაციანი გუნდი გვყავს, მათიაშვილის წასვლით ცენტრფორვარდის პოზიციაც შეგვისუსტდა. შეიძლება სეზონის განმავლობაში რომელიმე წამყვანმა კალათბურთელმა ტრავმა მიიღოს...
მოკლედ, ყველა ნიუანსი გასათვალისწინებელია. ამიტომ წინასწარ მიზნებზე საუბარი რთულია.
როგორც ვიცი, პირველი წრის შემდეგ გუნდები უცხოელებით გაძლიერებას აპირებენ. ჩვენც თუ ჩავერთვებით ამ პროცესში და რამდენიმე გამოცდილ კალათბურთელს დავიმატებთ, არა მგონია, ვინმეს რამე დავუთმოთ.
ამის გამოცდილება და ბრძოლისუნარიანობა ბიჭებს საკმარისად აქვთ. ახლაც საკმაოდ შეკრული გუნდია. ვარჯიშებზე ყველა ბოლომდე იხარჯება, კალათბურთელების მონდომებით კმაყოფილი ვარ და გუნდის მიმართ კარგის მეტი არაფერი მეთქმის. დანარჩენი კი სამომავლოდ გამოჩნდება.
- წინა სამ სეზონში "ქუთაისის" ძირითადი კოზირი პერიმეტრზე კარგი თამაში და ზუსტი სამქულიანები იყო. მომავალ სეზონში რა ტაქტიკით ითამაშებს გუნდი?
- ტაქტიკურ სქემებსა და მონახაზებს საიდუმლოდ დავტოვებ. ეს ჩემპიონატის მიმდინარეობისას გამოჩნდება და მისი მართებულობა თქვენ და გულშემატკივრებმა შეაფასეთ.
ახლა მხოლოდ ის შემიძლია ვთქვა, რომ "ქუთაისი" იქნება ბრძოლისუნარიანი და ძლიერი გუნდი, რომელსაც საკუთარი გულშემატკივარი მუდამ ემოციებისა და სიხარულის ქვეშ ეყოლება. თითოეულ მატჩში მთელი სულითა და გულით ვიბრძოლებთ, როგორც ეს გასულ წლებში ხდებოდა.
- ბოლოს ქუთაისის სპორტის სასახლის დარბაზზეც მინდა გკითხოთ, სადაც ბეტონის იატაკია და ეს გუნდებისთვის პრობლემებს ქმნის. დარბაზში პარკეტის დაგება ხომ არ იგეგმება?
- გვპირდებიან და თითქმის გადაწყვეტილიცაა, რომ ეს პრობლემა მოგვარდება. პარკეტი, ალბათ, ჩემპიონატის შუალედში დაიგება და ქუთაისის სპორტის სასახლე საერთაშორისო სტანდარტების შესაბამისი დარბაზი იქნება.
ყოველდღიური სპორტული გაზეთი "ლელო"
