ზაზა ფაჩულია პლეი ოფზე

გამოცემა "ფოქსსპორტის" ჟურნალისტმა ჯონ მანასომ კიდევ ერთი სტატია მიუძღვნა "ატლანტას". პუბლიკაცია ზაზა ფაჩულიას სიტყვებზე დაყრდნობითაა აგებული და ქართველ ქომაგსაც დააინტერესებს.

"ჯორჯიელი კალათბურთელები "სან ანტონიოსთან" დამარცხების შემდეგ გასახდელში ადევნებდნენ თვალს "ბოსტონი"-"ფილადელფიას" მატჩის ბოლო წუთებს. "სელტიქსის" მოგებამ საბოლოოდ გაარკვია, რომ პლეი ოფის პირველ ეტაპზე "ატლანტა" (მეხუთე ადგილი აღმოსავლეთის კონფერენციაში) "ორლანდოს" (მეოთხე) შეხვდება.

- "მეჯიქთან" შეხვედრა სასიამოვნოა. თუმცა, პლეი ოფზე ლაპარაკი ჯერ ადრეა, რადგან მანამდე კიდევ 4 თამაში გვაქვს ჩასატარებელი. ახლა მთავარია რეგულარული ეტაპის კარგად ჩატარება, რათა პლეი ოფს გამარჯვებულის მენტალიტეტით შევხვდეთ. ასევე მნიშვნელოვანია ტრავმებს ავცდეთ, - აღნიშნა ფაჩულიამ, რომელიც პარასკევს "ბოსტონთან" მატჩში შთამბეჭდავად გაისარჯა. "სან ანტონიოსთან" კი ნაკლებად ეფექტური სტატისტიკა ჰქონდა, თუმცა მწვრთნელმა 28 წუთი ათამაშა, რასაც ორი მიზეზი ჰქონდა: ფაჩულიას ენერგიული მოქმედება, ჯოშ სმიტისა და ჯეისონ კოლინზის ტრავმები.

- კოლინზმა კოჭი იტკინა, თუმცა იმედია, ტრავმა სერიოზული არაა და პლეი ოფს მწყობრში შევხვდებით. "ორლანდოსთან" მატჩებისთვის მზადება უკვე დავიწყეთ. ამ გუნდს შარშანდელ პლეი ოფშიც დავუპირისპირდით და კარგად ვიცნობთ. ვიცით, როგორ უნდა ვითამაშოთ "ორლანდოს" წინააღმდეგ, რაც ოპტიმიზმის საფუძველს მაძლევს.

"სან ანტონიოსთან" ბოლო მატჩზე "ატლანტას" მეფარე ელ ჰორფორდი მოგვითხრობს:

- "სპურსი" ლიგის ერთ-ერთი საუკეთესო კლუბია. სან ანტონიოს კალათბურთელები ყველა მატჩს მაღალ დონეზე ატარებენ, სწორ გზაზე დგანან... ჩვენც ურიგოდ არ გავრჯილვართ და პლეი ოფისთვის დამახასიათებელი კალათბურთი გამოვიდა. ბოლოს ზედიზედ რამდენიმე ტყორცნა გავაცუდეთ, რამაც საბოლოო შედეგზე მოახდინა გავლენა."


ზაზამ პარკერსაც ჩაუჭრა და ჯინობილისაც, მაგრამ სან ანტონიო ვერ ჩაჭრა
NBA-ს რეგულარული ეტაპის დასრულებამდე "ატლანტას" 4 მატჩი დარჩა. იგი 5 მოგებით ჩამორჩება "ორლანდო მეჯიქს" (49 გამარჯვება), ხოლო ორლანდოელებს მესამეადგილოსან "მაიამიმდე" ასევე ხუთი გამარჯვება აშორებთ. შესაბამისად გადაწყვეტილი ამბავია: პლეი ოფის პირველ ეტაპზე "ატლანტა" "მეჯიქს" დაუპირისპირდება (მოედნის უპირატესობა ფლორიდელთა მხარეს იქნება). ამ თემასთან დაკავშირებით ზაზა ფაჩულია გვერდით მდებარე სტატიაში ილაპარაკებს, აქ კი "სან ანტონიოსთან" მის გარჯაზე ვთქვათ.

გასულ კვირას "ორლანდოსა" და "ბოსტონის" ძლევის შემდეგ ატლანტელებს თვითრწმენა დაუბრუნდათ და თამამად შეუტიეს დასავლეთის კონფერენციის ლიდერ "სან ანტონიოს". თავის მხრივ, ტეხასელები მატჩს არცთუ კარგი ფსიქოლოგიური განწყობით შეხვდნენ - ატლანტაში ჩასვლამდე ზედიზედ 6 საგარეო შეხვედრა ჰქონდათ წაგებული. თუმცა, "სან ანტონიოს" მწვრთნელმა გრეგ პოპოვიჩმა საკუთარი უპირატესობა მაინც დაამტკიცა. მართალია, მისი შეგირდები გუნდურ კალათბურთს თამაშობენ, მაგრამ სამი ლიდერი მაინც გამოირჩევა: პარკერი (26 ქულა), ჯინობილი (18) და დანკანი (17). სწორედ მათი კარგი გარჯის შედეგად "სან ანტონიომ" მეოთხე პერიოდის ბოლოს 11:3 გაქცევა მოაწყო და 2-ქულიანი უპირატესობა 10-ქულიან ფორად აქცია - 92:82. დარჩენილ 3 წუთში მასპინძელთა მონდომების მიუხედავად, ტეხასელებმა მიღწეული შეინარჩუნეს.

ბოლო წუთებზე ფაჩულიაც მოედანზე იყო, თუმცა სტუმრები ვერც მან შეაჩერა. ზაზა შავი სამუშაოთი იყო დაკავებული. ეს საბოლოო სტატისტიკითაც დასტურდება: 28 წუთში 3 ქულა, 2 მოხსნა, 3 ჩაჭრა. ზაზამ თამაშიდან ერთადერთხელ ისროლა, ჩააგდო - მეორე პერიოდში "ატლანტას" უპირატესობა 9 ქულამდე გაზარდა. სხვათა შორის, 3 ჩაჭრა ზაზას საამსეზონო რეკორდია.

მისი სათამაშო დროის მატებაზე დიდი გავლენა მოახდინა ცენტრის, ჯეისონ კოლინზის ტრავმამ - პირველ ტაიმში კოჭი იტკინა და თამაში ვეღარ განაგრძო. თუ ტრავმა სერიოზულია, პლეი ოფში ეს "ატლანტასთვის" დიდი დანაკლისი იქნება, რადგან "ორლანდოს" ცენტრ დუაით ჰოვარდს მხოლოდ ერთი ცენტრი ვერ გასწვდება.

ტრადიციულად გამოირჩნენ ჯორჯიელი უკანახაზელები ჯო ჯონსონი და ჯამალ კროუფორდი. პირველმა 21 ქულა ჩააგდო, მეორემ - 20.

ზაზა ფაჩულიას გარჯა "ატლანტას" ოფიციალურ საიტზე ასე შეაფასეს: "სათადარიგოების კარგი თამაშის შედეგად მეორე პერიოდში "ჰოქსმა" 11-ქულიანი უპირატესობა მოიპოვა. სიზუსტით თავი დაგვამახსოვრეს ტიგმა და კროუფორდმა (6-6 ქულა). ზაზას გარჯა მატჩის ოქმზე არ აისახა, მაგრამ დიდი მოცულობის სამუშაო შეასრულა - მოედანზე მყარად იდგა, დაცვაში ბევრი ღირებული გააკეთა."

8 აპრილს "ატლანტა" ინდიანაში "პეისერსთან" ითამაშებს.

ატლანტა-სან ანტონიო 90:97
ზაზა ფაჩულია: 27:40 წუთი, 3 ქულა (1-დან 1 ორქულიანი, 2-დან 1 საჯარიმო), 2 მოხსნა, 1 პასი, 3 ჩაჭრა, 4 ფოლი

ქრონოლოგია
I პერიოდი
03:26 ზაზამ კოლინზი შეცვალა
02:46 პასი: 1 (კროუფორდი 2ქ, 16:14)
02:20 მოხსნა: შეტ-0, დაც-1
01:45 ჩაჭრა: 1 (პარკერს ჩაუჭრა)
II პერიოდი
11:20 საჯარიმოები: 2/1 (1ქ, 22:18)
10:30 ფოლი: 1
08:40 ჩაჭრა: 2 (ჰილს ჩაუჭრა)
07:22 ორქულიანი: 3ქ (35:26)
06:07 ფოლი: 2
06:07 კოლინზმა ზაზა შეცვალა
III პერიოდი
09:56 ფოლი: 3
07:44 ჩაჭრა: 3 (ჯინობილის ჩაუჭრა)
05:01 მოხსნა: შეტ-0, დაც-2
00:18 უილიამსმა ზაზა შეცვალა
IV პერიოდი
07:50 ზაზამ უილიამსი შეცვალა
01:54 ფოლი: 4
01:10 ტიგმა ზაზა შეცვალა.






.