იტალიის ჩემპიონატის ნახევარფინალური სერიის მეორე მატჩში "კანტუმაც" გაამეორა და მანუჩარ მარკოიშვილმაც: "კანტუმ" მეორედაც დაამარცხა "მილანი" (ამჯერად 70:64), ხოლო მანუჩარმა წინა მატჩის სტატისტიკა გაიმეორა -7 ქულა ჩააგდო, ფარიდან ასხლეტილი ბურთი 4-ჯერ მოხსნა, 2 შედეგიანი გადაცემა მიითვალა და 4-ჯერ დაჯარიმდა. პირველ და მეორე შეხვედრებს შორის მხოლოდ ის სხვაობა იყო, რომ გუშინ მარკოიშვილმა 9-ით მეტი, 24 წუთი ითამაშა და 1 ჩაჭრაც მიითვალა. მან 4-დან 2 ორქულიანი და 3-დან 1 სამიანი ჩააგდო."კანტუმ" ამჯერადაც გუნდური თამაშის წყალობით მოიგო, რასაც მექულეთა სტატისტიკაც მეტყველებს:
კალათბურთელებმა ქულები
"მილანმა" 64 ქულა მოაგროვა, რაც იმას ნიშნავს, რომ მასპინძლებმა დაცვაშიც მწყობრად ითამაშეს. დიდი დატვირთვა მოდიოდა მანუჩარზე, რომელსაც მეტოქეთა ლიდერის, დევიდ ჰოუკინსის მეურვეობა უწევდა. ამერიკელი ლეგიონერი სეზონში საშუალოდ 13 ქულას აგროვებს, გუშინ,1ივნისს ღამით კი 6 ბალს დასჯერდა.
კანტუელებმა პირველი ტაიმი დამაჯერებლად ჩაატარეს და დიდ შესვენებაზე 12-ქულიანი ფორით გავიდნენ - 45:33. საინტერესოა, რომ მანუს თანაგუნდელებს საწყის 20 წუთში 7 სამქულიანი ჰქონდათ ჩაგდებული.
მეორე ტაიმში მილანელებმა პერიმეტრი კარგად გადაკეტეს, ასევე შედეგიანად ათამაშდნენ სამწამიან ზონაში და სხვაობაც ნელ-ნელა მცირდებოდა. სირენამდე 2 წუთით ადრე სტუმრები "კანტუს" 3 ქულით მიუახლოვდნენ (ჰოუკინსი, 59:62) და მას მერე განზრახ ჯარიმების ტაქტიკას მიჰყვეს ხელი. თუმცა, კანტუელები საჯარიმოს ხაზიდან ბურთს არ აცილებდნენ და მეტოქეც იძულებული გახდა მოგებაზე ფიქრი მესამე თამაშისთვის გადაედო.
საინტერესოდ იქცეოდა "კანტუს" მწვრთნელი ანდრეა ტრინჩიერი: როცა ჯარიმას კანტუელები ისროდნენ, მოედანზე ბენჟამინ ორტნერი შეჰყავდა, ხოლო "მილანის" შეტევისას ორტნერს დენის მარკონატოთი ცვლიდა. ამას ობიექტური მიზეზი ჰქონდა: ორტნერი სწრაფია და მეტოქის ნახევრიდან საკუთარზე სწრაფად ბრუნდებოდა, სამაგიეროდ მარკონატო უფრო მაღალი, ათლეტურია და საკუთარ ფარზე ბურთს არავის ანებებდა.
ტრინჩიერის ტაქტიკამ ამჯერადაც გაამართლა: "კანტუ"-"მილანი" 2:0. სერია სამ მოგებამდეა. მომდევნო მატჩი მილანში 3 ივნისს გაიმართება.
