სლოვენიის ფინალური სერიის დაწყებამდე გიორგი შერმადინმა აღნიშნა:- მართალია, რეგულარულ ეტაპზე კრკა-მ გვაჯობა და ფინალში მოედნის უპირატესობა მოიპოვა, მაგრამ ეს ჩვენთვის არაფერს ნიშნავს. შეგვიძლია მეტოქის დამარცხება როგორც საკუთარ ასევე მისსავე მოედანზე.
სერიის ორი მატჩის შემდეგ ანგარიში 1:1 იყო. მესამე შეხვედრა კრკა-ს მოედანზე, ნოვო მესტოში გაიმართა და გიორგის სიტყვების სიმართლეშიც დავრწმუნდით: "ოლიმპიამ" შეხვედრა მეტად დამაჯერებლად ჩაატარა და დამსახურებულად გაიმარჯვა - 69:63. შესაბამისად, ოლიმპიელები 2:1 დაწინაურდნენ და ჩემპიონის მორიგ ტიტულსაც მიუახლოვდნენ. სერია სამ მოგებამდეა და ლიუბლიანელებს მომდევნო მატჩში, საკუთარი ქომაგის თვალწინ შეძლიათ
მწვრთნელმა მირო ალილოვიჩმა ვლადიმერ ბოისა სასტარტო ხუთეულში დააყენა, თუმცა მხოლოდ 11 წუთი ათამაშა. ბოისამ მატჩი 3 მოხსნით დაასრულა (მეტოქის კალათის მიმართულებით ერთხელაც არ უსვრია). გიორგი შერმადინს 14 წუთი ერგო. ჩვეული ეფექტურობით ვერც ის გამოირჩა: 3 ქულა, 4 მოხსნა და 1 პასი მიითვალა. გიორგიმ 3 ორქულიანი ააცილა და 4-დან 3 საჯარიმო გამოიყენა.
მწვრთნელმა სასტარტო ხუთეულში ნომინალური ცენტრი არ დააყენა, რითაც მიგვანიშნა, რომ აქცენტს სწრაფ თამაშსა და პერიმეტრზე აკეთებდა. ჩანაფიქრმა გაამართლა - ოლიმპიელებმა 10 სამქულიანი ჩააგდეს (17-დან), მაშინ როცა მასპინძლებმა 19-დან 4 სამიანი გამოიყენეს.
საოცარი სამქულიანი ჩააგდო სირენამდე 37 წამით ადრე კრკა-ს ფორვარდმა კრივეჩმა - შორეული ტყორცნის შემდეგ ბურთი რგოლს მოხვდა და ფარს ზემოთ ავარდა, იქიდან კი პირდაპირ კალათაში ჩაეშვა. ამ სამქულიანის წყალობით კრკა-მ ჩამორჩენა 2 ქულამდე დაიყვანა. საპასუხო შეტევაში "ოლიმპიას" ბურთი რომ არ ჩაეგდო, მასპინძლებს გამარჯვების რეალური შანსი უჩნდებოდათ, მაგრამ სირენამდე 26 წამით ადრე მოედნის კუთხიდან კენი გრეგორიმ ორქულიანი გამოიყენა, სხვაობა 4 ქულამდე გაზარდა და მატჩის ბედიც გადაწყვიტა. საფინალო ანგარიშიც გრეგორიმ დააფიქსირა - 69:63.
