გიორგი შერმადინი ევროვარსკვლავებში

მანუჩარ მარკოიშვილისა და გიორგი შერმადინის "კანტუმ" ევროლიგაზე გამოსვლა მეორე ჯგუფურ ეტაპზე დაასრულა. პლეი ოფების დაწყებასთან ერთად, ევროლიგის ოფიციალურ საიტზე დაიწყო გამოკითხვა შეჯიბრების საუკეთესო ხუთეულის გამოსავლენად.

ჩამოთვლილია 51 კალათბურთელი, რომელთაგან გულშემატკივარს რჩეული ხუთეულისთვის ხმის მიცემა შეუძლია. 51-ს შორისაა "კანტუს" ქართველი ცენტრი გიორგი შერმადინი, რომელმაც ევროლიგის წლევანდელი გათამაშება მაღალ დონეზე ჩაატარა. ამას გიორგის მონაგარიც ადასტურებს. იგი საშუალოდ 21:39 წუთში 10.9 ქულასა და 5.5 მოხსნას აგროვებდა.

გიორგის მეტი სათამაშო დრო ერგო მეორე ჯგუფურ ეტაპზე და მარგი ქმედების კოეფიციენტის მიხედვით, მეოთხე იყო (18.83). იგი ნაყოფიერებით მხოლოდ ცსკა-ს ფორვარდ ანდრეი კირილენკოს (19.83), მაქაბელ რიჩარდ ჰენდრიქსსა (19.33) და მონტეპასკელ ბო მაკალებს (19.17) ჩამორჩა.

არანაკლებ მნიშვნელოვანია: ტოპ-16-ში 23 წლის ქართველ ცენტრს ყველაზე მეტი საჯარიმო აქვს ნატყორცნი (40) და ყველაზე მეტი - ჩაგდებული (37).

დავუბრუნდეთ გამოკითხვას. ნებისმიერ ქართველ ქომაგს შეუძლია შერმადინისთვის ხმის მიცემა. ამისთვის საჭიროა ევროლიგის ოფიციალურ საიტზე შესვლა. ხმის მიცემა შეგიძლიათ აქ

ყოველდღიური სპორტული გაზეთი "ლელო"