საქართველოს ნაკრების ფორვარდი ვიქტორ სანიკიძე მომავალ სეზონში იტალიური გრანდის, სიენას "მონტეპასკის" ღირსებას დაიცავს. ვიქტორს სიენელებმა ხელშეკრულება მაისში შესთავაზეს, თუმცა ქართველმა თავდამსხმელმა მოსაფიქრებლად დრო ითხოვა. ამასობაში განიხილა სხვადასხვა ვარიანტი, რომელთა შორის იყო სანკტ-პეტერბურგის "სპარტაკი", ესპანეთის "ვალენსია". ველოდით, რომ ამერიკული "სან ანტონიოც" გამოიჩენდა ინტერესს, რის შესახებაც ოკეანისგაღმური გაზეთები წერდნენ, თუმცა საბოლოოდ სანიკიძე მიდის იქ, სადაც მისდამი მეტი ინტერესი გამოავლინეს - "მონტეპასკიში".
სიენელთა რიგებში მომავალი სეზონისთვის სერიოზული ცვლილებები იგეგმება. გუნდი დატოვა მთავარმა მწვრთნელმა სიმონე პიანიჯანიმ, რომელიც თურქულ "ფენერბაჰჩეში" გადავიდა. რეფორმების შესახებ ილაპარაკა "მონტეპასკის"
"ბო მაკალები და დევიდ ანდერსენი გაისად სიენაში არ ითამაშებენ. თავისუფალი აგენტის სტატუსი მიიღეს კშიშტოფ ლავრინოვიჩმა და რიმანტას კაუკენასმაც. სეზონის დასრულებისთანავე ვთქვი, რომ ახალ პროექტს ვამზადებდით.
ჩვენი ამოცანა, კარგი შემადგენლობის შეკრებასთან ერთად, კლუბის ფუნდამენტის გამყარებაა.
ობრი კოულმენი, ვიქტორ სანიკიძე და ბენჟამინ ეზე? თანმიმდევრობით მივყვეთ. ეზის იმედი გვაქვს, მაგრამ მან ჯერ "მილანი" უნდა დატოვოს.
ძალიან გვინდა სანიკიძის დამატება, ძალიან. რაც შეეხება კოულმენს, იგი ამერიკელია. ჯერ იტალიელებსა და "ბოსმანის ზონის" კალათბურთელებს გავუფორმებთ ხელშეკრულებებს, შემდეგ ამერიკელებს. ამასთან, არ უნდა დაგვავიწყდეს, რომ გუნდში რჩება დევიდ მოსი".
ლიტვურმა გამოცემა "ბასკეტნიუსმა" გამოაქვეყნა ინფორმაცია, რომლის თანახმად, ვიქტორსა და "მონტეპასკის" შორის შეთანხმება მიღწეულია. აი, რა დაწერეს ლიტველებმა:
"სიენელები კონტრაქტს გაუფორმებენ 26 წლის 203 სმ სიმაღლის ფორვარდ ვიქტორ სანიკიძეს, რომელიც გასულ სეზონში ბოლონიის "ვირტუსში" გამოდიოდა და საშუალოდ 12 ქულასა და 10.9 მოხსნას აგროვებდა.
სანიკიძის შემდეგ "მონტეპასკის" ხელმძღვანელობა ეზესა და კოულმენის დამატებაზე იზრუნებს".
უცხოურ პრესაში გავრცელებული ინფორმაცია ერთია და უშუალოდ სანიკიძის ნათქვამი მეორე.
დავინტერესდით, რამდენად რეალურია ლიტვური გამოცემის ინფორმაცია და 8 ივლისს ვიქტორ სანიკიძეს დავუკავშირდით.
- კონტრაქტი ჯერ არ გამიფორმებია, თუმცა ბევრი რამ შეთანხმებულია. თამაში "მონტეპასკიში" გადავწყვიტე და ხელშეკრულებას ამ დღეებში მოვაწერ ხელს, - გვითხრა ვიქტორ სანიკიძემ.
სანიკიძის დასტური: სიენას მონტეპასკი (იბეჭდება მცირე ცვლილებით)
ყოველდღიური სპორტული გაზეთი "ლელო"
