საქართველოს ნაკრების გამთამაშებელმა გიორგი ცინცაძემ უკრაინულ "ბუდიველნიკში" ძველი დრო გაიხსენა. იგი 2008 წელს ევროჩელენჯზე "ტარტუ როკს" ფინალური ოთხეულისკენ გაუძღვა - რუსულ "ურალ გრეიტთან" გადამწყვეტ შეხვედრაში მეოთხე პერიოდში 15 ქულა ჩააგდო...
ევროსარბიელზე დაბრუნებულმა "ბუმ" კიდევ ერთი ეფექტური მატჩი ჩაატარა: 14 ნოემბერს ღამით ევროთასის ჯგუფური ეტაპის მეორე ტურში ლიტვურ "პრიენაის" ფაქტობრივად მარტომ მოუთავა საქმე.
გადამეტებით რომ არაფერს ვამბობთ, მატჩის ქრონოლოგიაც "დაგვეთანხმება": მესამე პერიოდის შუაში "ბუდიველნიკი" ორი ქულის სხვაობით იგებდა (40:38), როცა ცინცაძემ ორქულიანი ჩააგდო, ამას კიდევ ოთხი ქულა მიაყოლა და მის მიერ
ცინცაძე ამაზე არ შეჩერებულა, მესამე მეოთხედში კიდევ ერთი ორქულიანი, ორი საჯარიმო გამოიყენა, რომლის შემდეგაც "ბუდიველნიკის" უპირატესობა 13 ქულამდე გაიზარდა - 55:42. ეს უკვე გამარჯვებას ნიშნავდა.
მატჩის დასრულებიდან რამდენიმე წუთში უკრაინულ საიტ "ისპორტზე" გამოქვეყნდა შეხვედრის ვრცელი მიმოხილვა, რომელშიც ერთი აბზაცი ქართველ გამთამაშებელს დაეთმო:
"მატჩის გარდამტეხი ცინცაძე იყო, რომელიც მეტოქეებზე ჭკვიანი, სწრაფი და მოხერხებული ჩანდა. გიორგიმ თავადაც მნიშვნელოვანი ქულები მოუტანა გუნდს და მეგობრებიც აიყოლია."
ციფრებს მივხედოთ. "ბუდიველნიკმა" "პრიენაი" 84:57 დაამარცხა. გიორგი ცინცაძე თანაგუნდელ ლეო ლაიონსთან ერთად მატჩის სნაიპერი გახდა, ორივემ 16-16 ქულა მიითვალა. თუმცა, მარგი ქმედების კოეფიციენტის მიხედვით, "ბუს" ბადალი არ ჰყავდა: +24. გიორგიმ 27 წუთში 7-დან 6 ორქულიანი, 4-დან 4 საჯარიმო ჩააგდო, 4 ჩაჭრა, 4 მოხსნა და 3 შედეგიანი გადაცემა მიითვალა.
* * *
ამავე ჯგუფის ორმა ბინადარმა ერთმანეთთან ურთიერთობა იერუსალიმში გაარკვია. "ჰაპოელმა" ჩეხურ "ნიმბურკს" უმასპინძლა და მეოთხე პერიოდში დაშვებული შეცდომების გამო დიდი სხვაობით წააგო - 69:86.
ჰაპოელელების შემადგენლობაში მხოლოდ ორი კალათბურთელი გადასცდა 10-ქულიან ნიშნულს - კრეიგ სმიტი და ჯეიკობ პულენი. პირველმა 23 ქულა ჩააგდო, ხოლო საქართველოს ნაკრების უკანახაზელმა - 14. ჯეიკობის ანგარიშზე 8-დან 4 ორქულიანი, 7-დან 2 სამიანი, 3-3 მოხსნა-ჩაჭრა და 1 შედეგიანი გადაცემაა.
მომდევნო კვირაში, 21 ნოემბერს, პულენის "ჰაპოელი" ცინცაძის "ბუდიველნიკს" მიიღებს.
| ა | გუნდი | თ | მ | წ | ქ |
| 1 | ნიმბურკი (ჩეხ) | 2 | 2 | 0 | 4 |
| 2 | ბუდიველნიკი (უკრ) | 2 | 1 | 1 | 3 |
| 3 | პრიენაი (ლიტ) | 2 | 1 | 1 | 3 |
| 4 | ჰაპოელი (ისრ) | 0 | 0 | 2 | 2 |
ყოველდღიური სპორტული გაზეთი "ლელო"
