გასული შვიდდღეული უცხოეთში მოთამაშე ქართველი კალათბურთელებისთვის გამორჩეული იყო. ამას თამამად მანუჩარ მარკოიშვილის გარჯის შემყურენი ვწერთ. მან ხომ ლომის წვლილი შეიტანა მადრიდის "რეალის" ძლევაში - 23 ქულა ჩააგდო.
მანუმ ქულაუხვი სერია იტალიის ჩემპიონატშიც განაგრძო და "ბიელას" ძლევაში 17-ბალიანი წვლილი შეიტანა. საინტერესოა, რომ მანუჩარმა 12 ქულა მეოთხე პერიოდში ჩააგდო.
იტალიაში 10 დეკემბერს გვიან დასრულდა ვიქტორ სანიკიძის "მონტეპასკის" მატჩი, რომლის შესახებ ცხრილიდან შეიტყობთ, ისევე, როგორც გიორგი შერმადინის "მაქაბის" შეხვედრაზე. აქ კი გეტყვით, რომ გიორგის ვაჟი შეეძინა, რასაც კალათბურთელს გულითადად ვულოცავთ.
NBA
განვლილი 7
თორნიკე შენგელიას "ბრუკლინმა" პირიქით, გასულ კვირას ყველა მატჩი წააგო. ქართველი თავდამსხმელი კი მწვრთნელს მოედანზე არ გამოუყვანია.
ევროთასი
გიორგი ცინცაძის "ბუდიველნიკმა", ფაქტობრივად, სეზონის მატჩი მოიგო - ჩეხეთის "ნიმბურკთან" გამარჯვებით უკრაინელებმა მომდევნო ეტაპისკენ დიდი ნაბიჯი გადადგეს.
მათ დარჩენილი აქვთ მატჩი ლიტვაში, "პრიენაისთან". მარცხის შემთხვევაშიც კი, ცინცაძის თანაგუნდელებს მომდევნო ეტაპზე გასვლის კარგი შანსი შერჩებათ.
ურთულეს სიტუაციაშია ამავე ჯგუფის ბინადარი ჯეიკობ პულენის "ჰაპოელი", რომელსაც ჩეხეთში ურთულესი მატჩი ელის. "ჰაპოელის" ძლევის შემთხვევაში პირველ ადგილს "ნიმბურკი" დაიკავებს, მეორეს - "ბუდიველნიკი". ჯგუფიდან ორი საუკეთესო გადის.
ევროპაზე წარმატებული სვლა კიეველებმა უკრაინის ჩემპიონატში განაგრძეს. მათ სტუმრად ორი დნეპრისპირული გუნდი დაამარცხეს. განსაკუთრებით ეფექტური ცინცაძე მეორე მატჩში იყო: 7-დან 3 ორქულიანი, 5-დან 2 ორქულიანი, 2-დან 2 საჯარიმო ჩააგდო და 14 ქულას მოუყარა თავი.
აზია
ირანში კიდევ ერთი რეკორდი დაამყარა 224 სმ სიმაღლის ცენტრმა სერგო ათუაშვილმა, რომელმაც 19 მოხსნა მიითვალა. რაც მთავარია, სერგოს ორმაგი დუბლი (19 მოხსნა, 15 ქულა) "ქეშმის" გამარჯვების საწინდარი გახდა - "სანაიეს" 69:57 სძლია.
ირანიდან ლიბანში გადასულ ნიკა ცქიტიშვილს "ჩამპვილის" შემადგენლობაში დებიუტი იორდანიულ "ორთოდოქსთან" მატჩში ჰქონდა. შეხვედრა ლიბანელთა გამარჯვებით დასრულდა, ხოლო ქართველმა თავდამსხმელმა 15 ქულა მიითვალა.
ყოველდღიური სპორტული გაზეთი "ლელო"
