"არმიას" ჯავრი "ბეშიქთაშზე" ვიქტორ სანიკიძემ იყარა [VIDEO]

ვიქტორ სანიკიძის "მონტეპასკიმ" ევროლიგის ტოპ-16-ის მორიგ ტურში თურქულ "ბეშიქთაშს" უმასპინძლა და 63:57 დაამარცხა.

შეგახსენებთ, რომ შარშანდელ სეზონში ბეშიქთაშელები ევროჩელენჯზე "არმიასთან" ერთად D ჯგუფში თამაშობდნენ და თბილისში ბოლო წამებზე 77:75 გაიმარჯვეს. არადა, ის მატჩი არმიელებს რომ მოეგოთ მომდევნო ეტაპზე გავიდოდნენ...

ასეა თუ ისე, თურქული "ბეშიქთაში" მიმდინარე სეზონის წინ იმდენად გაძლიერდა, რომ ევროლიგაზე თამაშობს და საკმაოდ წარმატებითაც.

თუმცა, უფრო წარმატებული იტალიური "მონტეპასკია", რომელიც ტოპ-16-ში ჯერაც დაუმარცხებელია. ხუთი ტურის შემდეგ სიენელები ჯგუფში პირველ ადგილზე არიან და მომდევნო ეტაპზე გასვლა თითქმის განაღდებული აქვთ.

"ბეშიქთაშთან" "მონტეპასკიმ" კარგად დაიწყო, პირველი მეოთხედი 22:13 მოიგო, თუმცა მესამე პერიოდში თურქებმა ანგარიში გაათანაბრეს და ბოლო წამებამდე თამაში ქულა-ქულაში მიმდინარეობდა.

მეოთხე ათწუთეული "მონტეპასკიმ" 20:12 მოიგო და გამარჯვებულის ვინაობასთან დაკავშირებული ყველა კითხვა დღის წესრიგიდან მოხსნა.

ვიქტორ სანიკიძემ 14 ქულა ჩააგდო, რაც სიენელთა ბომბარდირობისთვის საკმარისი აღმოჩნდა.

ვიქტორის სრული მონაგარი ასეთი იყო: 23 წუთი, 14 ქულა (10-დან 7 ორქულიანი), 5 მოხსნა.
ევროლიგაზე მორიგ მატჩს "მონტეპასკი" "ბარსელონასთან" გამართავს. შეხვედრა კატალონიაში 31 იანვარს გაიმართება.



ყოველდღიური სპორტული გაზეთი "ლელო"