ევროლიგის მეორე ეტაპის ბოლოსწინა ტურში ღირებული გამარჯვება მოიპოვა გიორგი შერმადინის "ოლიმპიაკოსმა", რომელმაც სტუმრად სტამბოლის "ფენერბაჰჩე" 78:73 დაამარცხა. არადა, საფინალო სირენამდე 5 წუთით ადრე ბერძნები თურქებთან 9 ქულის სხვაობით აგებდნენ. გადამწყვეტი ეისი ლოუსა და ვასილის სპანულისის სამქულიანები გამოდგა.
შერმადინი სასტარტო ხუთეულში იყო და კარგადაც გაისარჯა: 11:29 წუთში 4 ქულა, 5 მოხსნა და 1 დაფარება (1 შეცდომა). გიორგიმ ასპროცენტიანი სიზუსტით სტყორცნა: 1-დან 1 ორქულიანი (ჩატენა) და 2-დან 2 საჯარიმო.
29 მარტს ფიცხელი ბრძოლა გაუმართა სიენაში "ბარსელონას" ვიქტორ სანიკიძის "მონტეპასკიმ".
ქართველი ხუთეულში იყო,
სანიკიძის მონაგარი ასეთი იყო: 18 წუთი, 8 ქულა, 5 მოხსნა, თითო პასი-დაფარება.
"მონტეპასკი" და "ოლიმპიაკოსი" ერთ ჯგუფში არიან. მეოთხედფინალში რვიდან ოთხი გადის. მერვე მოგებით ბერძნებმა თითქმის გაინაღდეს პლეი ოფში თამაში, ხოლო "მონტეპასკის" (7 გამარჯვება) საქმე რთულად აქვს: მეოთხედფინალში რომ მოხვდეს, ბოლო ტურში სტუმრად "კახა ლაბორალი" უნდა დაამარცხოს, ხოლო "ოლიმპიაკოსმა" შინ "ხიმკის" სძლიოს. ასე რომ, შერმადინს შეუძლია მომდევნო კვირას სანიკიძეს ღირებული საჩუქარი გაუკეთოს.
ყოველდღიური სპორტული გაზეთი "ლელო"
