ზაზა ფაჩულია: ლარი დრიუს ეგოისტი კალათბურთელები არ უყვარს

2013-14 წლების სეზონი ზაზა ფაჩულიამ ეფექტურად დაიწყო. მისდამი ჟურნალისტების ინტერესი გასაკვირი სულაც არ არის. ფაჩულიას ინტერვიუებს, ამერიკელების გარდა, ევროპელებიც წერენ. მაგალითად, ბერძენმა ხარის სტავროუმ ვრცელი, საინტერესო მასალა მოამზადა 29 წლის ქართველი ცენტრის შესახებ.

აი, რას წერს ჟურნალისტი შესავალში:

"ზაზა ფაჩულია 2003 წელს დრაფტის 42-ე ნომრად "ორლანდო მეჯიქმა" აირჩია. 2004-05 წლები "მილუოკი ბაქსში" გაატარა, რის შემდეგაც "ატლანტა ჰოქსში" გადავიდა და 2013 წლამდე ჯორჯიის შტატში ითამაშა.

მიმდინარე სეზონის დასაწყისში ფაჩულია "მილუოკიში" დაბრუნდა.

იგი გულახდილად გველაპარაკა როგორც "ბაქსზე", ასევე მწვრთნელ ლარი დრიუზე, ბერძენ თანაგუნდელ ჯონ ანტეტოკუონმპოსა და ევროპულ კალათბურთზე. გირჩევთ, წაიკითხოთ პასუხები.

- დიდი ხნის შესვენების შემდეგ "მილუოკიში" დაბრუნებული თავს როგორ გრძნობთ?
- სასიამოვნოა ისეთ გუნდში თამაში, რომელშიც NBA-ური კარიერის საწყისი პერიოდი გავატარე.

ამერიკელებთან ინტერვიუშიც აღვნიშნე, რომ აქ დამხვდნენ იგივე ხელმძღვანელები, ასევე, "ატლანტადან" გადმოსული სამწვრთნელო შტაბი. ასე რომ, თავს უცხოდ ნამდვილად არ ვგრძნობ, ნამდვილად არ მჭირდება დრო სათამაშო სტილთან შესაგუებლად.

- საინტერესოა, რომ 29 წლისა გუნდში ერთ-ერთი ყველაზე გამოცდილი ბრძანდებით. ამ ასაკში რამდენად რთულია თანაგუნდელი მოწაფეების დამოძღვრა?
- გამიმართლა, რომ ასეთ სიტუაციაში აღმოვჩნდი. 29 წლისას NBA-ში თამაშის ათწლიანი გამოცდილება მიმაგრებს ზურგს. გარდა ამისა, ამერიკაში წასვლამდე ევროპაშიც ვთამაშობდი პროფესიონალურ დონეზე. ყველაფერი ადრე დაიწყო, პროფესიონალად ადრე ჩამოვყალიბდი.

ახალგაზრდა თანაგუნდელების დარიგება არ მეზარება და მეც ბევრს ვსწავლობ. "მილუოკიში" ბევრი ნიჭიერი ახალგაზრდაა, რომლებსაც არც ვარჯიში ეზარებათ, არც სწავლა და ბევრსაც მიაღწევენ.

- "მილუოკის" პოტენციალზე რას იტყვით?
- როგორც აღვნიშნე, გუნდში ბევრი ახალგაზრდაა, არიან გამოცდილებიც, გვყავს ბევრი ახალი სახე და ახალი მწვრთნელი. ზუსტად გეტყვით - "ბაქსში" 11 ახალწვეულია!

ასეთ სიტუაციაში სეზონის დასაწყისში გუნდურად და შედეგიანად თამაში მეტად რთულია.

სტაბილურობის მისაღწევად დრო დაგვჭირდება. გვაქვს ახალი სისტემები როგორც დაცვაში, ასევე შეტევაში. ამ ყველაფერს ათვისება სჭირდება. ჩვენი ამოცანაა, ბევრი ვიშრომოთ და შედეგს დაველოდოთ.

რაც მეტად შევთამაშდებით, მით უფრო სახალისო იქნება სეზონი და მეტ სიამოვნებას მივიღებთ თამაშისგან. ბოლო 6 წლის განმავლობაში ჩემი გუნდი, "ატლანტა ჰოქსი" პლეი ოფში თამაშობდა. მისი ნაწილი მეც ვიყავი და მინდა სერია მიმდინარე სეზონშიც განვაგრძო.

- ლარი დრიუ წლეულს "ატლანტადან" "მილუოკიში" გადმოვიდა და თქვენც მიგიპატიჟათ. რა იყო დათანხმების მთავარი მიზეზი?
- ჩემს კარიერაში ლარი დრიუს გამორჩეული ადგილი უკავია. საკალათბურთო თვალსაზრისით, სწორედ მაშინ მოვმწიფდი, როცა მასთან ერთად "ატლანტაში" ვმუშაობდი. "ჰოქსში" 8 წელი გავატარე. აქედან 5 წლის განმავლობაში გუნდის სათადარიგოებს ამზადებდა, ხოლო ბოლო წელი მთავარ მწვრთნელად მუშაობდა.

ლარი დრიუმ ბევრი რამ მასწავლა. ჩემს მწვრთნელს იმიტომაც ვაფასებ, რომ ხისტ კალათბურთს გვათამაშებს, ბურთის "დატრიალებაც" უყვარს და არ მოსწონს ეგოისტი კალათბურთელები. მეც სწორედ ასეთი ტიპის კალათბურთი მომწონს.

- "მილუოკის" ახალბედა ჯონ ანტეტოკუონმპოს შესახებ რას იტყვით?
- პირველად რომ ვნახე, მის აღნაგობას დავაკვირდი და დავრწმუნდი, რომ კალათბურთელადაა დაბადებული. რამდენიმე ვარჯიშის შემდეგ კი მივხვდი, რომ ძალიან ნიჭიერი კალათბურთელია და NBA-ში დიდი მომავალი აქვს.

აჩქარება არ მართებს, ვარჯიში არ ეზარება და დროთა განმავლობაში მაღალი დონის კალათბურთელად ჩამოყალიბდება. მოხარული ვარ, რომ გუნდში ასეთი კალათბურთელი გვყავს.

- ევროპულ კალათბურთს თუ ადევნებთ თვალს და რას იტყვით თქვენს ყოფილ გუნდებზე, "ფენერბაჰჩესა" და "გალათასარაიზე", რომლებიც ევროლიგის ფინალურ ოთხეულში მოხვედრისთვის იბრძვიან?
- ყოველთვის ვცდილობ, ევროპულ კალათბურთს თვალი ვადევნო, მაგრამ, სიმართლე გითხრათ, ეს საქმე კარგად არ გამომდის, რადგან ამერიკასა და ევროპას შორის დროში დიდი განსხვავებაა.

სოციალურ მედიასა და ინტერნეტში ვკითხულობ სიახლეებს. "ფენერბაჰჩემ" სეზონი კარგად დაიწყო და რეალურად შეუძლია, ევროლიგის ნახევარფინალში ითამაშოს. რაც შეეხება "გალათასარაის", მასში NBA-ს ლოკაუტის დროს ვთამაშობდი. ახლა კი "გალაში" ჩემი უახლოესი მეგობარი მანუჩარ მარკოიშვილი ასპარეზობს.

სამწუხაროდ, მანუ ტრავმის გამო რამდენიმე თვეს გამოტოვებს. როცა გუნდის ერთ-ერთი წამყვანი მოთამაშე ტრავმას ღებულობს, ეს გუნდზე ყოველთვის უარყოფითად აისახება. მანუჩარს მალე გამოჯანმრთელებას და "გალათასარაისთან" ერთად წარმატებებს ვუსურვებ.

15 წლისა ვიყავი, როცა საქართველოდან თურქეთში გადავედი. თურქულადაც კარგად ვლაპარაკობ. გამიმართლა იმაშიც, რომ "მილუოკი ბაქსში" ჩემს გვერდით ერსან ილიასოვა ასპარეზობს."

ყოველდღიური სპორტული გაზეთი "ლელო"

ასევე იხილეთ:
ზაზა ფაჩულია: ჩემი ოცნებაა, თბილისში NBA-ს გუნდის პარკეტზე ითამაშონ