ზაზა ფაჩულიას მე-4 ორმაგი დუბლი და გამარჯვება "კლიპერსთან" [VIDEO]

შთამბეჭდავად ჟღერს: ნოვიცკი-ფაჩულიას ტანდემმა აჯობა გრიფინ-ჯორდანის დუეტს და "დალასმა" 118:108 დაამარცხა დასავლეთ კონფერენციის ერთ-ერთი ფავორიტი "კლიპერსი".

ჩამოთვლილ კალათბურთელებთან ერთად აღნიშნულ გუნდებში სხვა სახელიანი კალათბურთელებიც თამაშობენ, თუმცა ფარქვეშა ბრძოლის მოგება ლოსანჯელესური მონსტრის დასამარცხებლად მთავარი განმსაზღვრელი კომპონენტია.

კრის პოლი გენიოსი გამთამაშებელია, ჯამალ კროუფორდი და ჯეიჯეი რედიკი - დიდებული მსროლელები, თუმცა მათი გარჯა "კლიპერსისთვის" დიდი ვერაფერი უპირატესობაა, თუკი წინა ხაზი ვერ იქნება მოწოდების სიმაღლეზე.

ბლეიკ გრიფინი და დეანდრე ჯორდანი ლოსანჯელესელებისთვის მთავარ დამრტყმელ ძალას წარმოადგენენ და როცა მათ საქმე არ წაუვათ, კალიფორნიელებს, დიდი ალბათობით, წაგება არ ასცდებათ.

ასე იყო დღეს, რამდენიმე საათის წინ დასრულებულ მატჩში, როცა შორეულ ტეხასის შტატში "დალასმა" "კლიპერსს" უმასპინძლა და დასავლეთ კონფერენციის ერთ-ერთი ფავორიტი ბეჭებზე დასცა.

ამ საქმეში დიდი წვლილი შეიტანა ზაზა ფაჩულიამ. ქართველმა ცენტრმა "დალასში" სარეკორდოდ ბევრი - 31 წუთი ითამაშა და სეზონის რიგით მე-8 მატჩში მე-4 ორმაგი დუბლი გაიფორმა.

ფაჩულიამ 6-დან 2 ორქულიანი და 8-დან 6 საჯარიმო ჩააგდო. 10 ქულასთან ერთად ზაზამ 10 მოხსნა, 3 პასი და 2 დაფარება მიითვალა.

შეუდარებელი იყო ფაჩულიას მეწყვილე დირკ ნოვიცკი, რომელმაც 33 წუთში 31 ქულა და 11 მოხსნა დააგროვა. ამ 2 კალათბურთელის საერთო სარგებლიანობა ბევრად აღემატება გრიფინ-ჯორდანის ტანდემის მონაგარს.

21 ქულა, ზოგადად, არაა ცოტა, მაგრამ ნოვიცკის ოპონენტ ბლეიკ გრიფინისთვის, რომელიც მიმდინარე სეზონში საშუალოდ 28 ქულაზე მეტს აგროვებს, ვერაფერი შედეგია.

რაც შეეხება ფაჩულიას ვიზავი ჯორდანს, ამ უკანასკნელმა 9 ქულა და 11 მოხსნა მიითვალა. ერთი სიტყვით, თავში ნახსენები დუეტების მონაგარი რომ შევადაროთ, ქულებში 41:30 იგებს ნოვიცკი-ფაჩულია, ხოლო მოხსნებში - 21:20.

4 მოგებითა და 4 მარცხით "დალას მავერიკსი" დასავლეთ კონფერენციაში მე-8 ადგილზეა. მორიგი მატჩი დალასელებს 14 ნოემბერს, შინ მეორე ლოსანჯელესურ გუნდ "ლეიკერსთან" ელით.

მომზადებულია gbf.ge-ს მიხედვით